Mathayo 23

1Kisha Yesu aliyaambia makundi ya watu na wanafunzi wake, 2“Waandishi na Mafarisayo wamekalia kiti cha Musa. 3Kwa hiyo, fanyeni na kushika kila wanachowaambia. Lakini msifuate mfano wao, kwa sababu hawaishi kwa yale wanayofundisha. 4Wanafunga mizigo mizito na kuirundika juu ya mabega ya wengine, lakini wao wenyewe wanakataa hata kuisogeza kwa kidole. 5Matendo yao yote wanayafanya ili watu wawatazame. Wanapanua visanduku vyao vya maandiko na kurefusha vishada vya mavazi yao. 6Wanapenda viti vya heshima katika karamu na viti vya mbele katika masinagogi, 7salamu za heshima sokoni, na kusikia watu wakiwaita ‘Rabi.’ 8Lakini ninyi, msikubali mtu yeyote awaite ‘Rabi.’ Yupo mmoja tu aliye mwalimu wenu, na ninyi nyote ni ndugu mlio pamoja. 9Tena msimpe mtu yeyote duniani cheo cha ‘baba,’ kwa sababu mnaye Baba mmoja, yule aliye mbinguni. 10Wala msikubali kuitwa wakufunzi, kwa sababu mnaye mkufunzi mmoja, Kristo. 11Yeyote aliye mkubwa kuliko wote kati yenu atakuwa ndiye anayewahudumia. 12Wanaojiinua watashushwa chini, na wanaojishusha watainuliwa juu.

13Ole wenu, waandishi na Mafarisayo, ninyi wanafiki! Mnaziba njia ya kuingia katika ufalme wa mbinguni ili watu wasiweze kuingia. Ninyi wenyewe hamwingii, na wale walio njiani kuingia mnawazuia.

15Ole wenu, waandishi na Mafarisayo, ninyi wanafiki! Mnasafiri baharini na nchi kavu ili kumvuta mtu mmoja aingie katika dini yenu. Naye akishaingia, mnamfanya astahili jehanamu mara mbili kuliko ninyi.

16Ole wenu, viongozi vipofu! Hivi ndivyo mnavyofundisha: ‘Kuapa kwa hekalu si kitu. Lakini mtu akiapa kwa dhahabu ya hekalu, lazima atimize kiapo chake.’ 17Wajinga na vipofu! Basi, kipi ni kikubwa zaidi: dhahabu, au hekalu linaloitenga dhahabu kuwa takatifu? 18Tena mnafundisha: ‘Kuapa kwa madhabahu si kitu. Lakini mtu akiapa kwa sadaka iliyowekwa juu yake, lazima atimize kiapo chake.’ 19Ninyi ni vipofu kweli! Kipi ni kikubwa zaidi: sadaka, au madhabahu yanayoitenga sadaka kuwa takatifu? 20Kwa hiyo mtu anayeapa kwa madhabahu anaapa kwa madhabahu hayo na kwa vyote vilivyo juu yake. 21Na mtu anayeapa kwa hekalu anaapa kwa hekalu hilo na kwa yule anayekaa ndani yake. 22Na mtu anayeapa kwa mbingu anaapa kwa kiti cha enzi cha Mungu na kwa yule aliyeketi juu yake.

23Ole wenu, waandishi na Mafarisayo, ninyi wanafiki! Mnamtengea Mungu fungu la kumi hata la mnanaa, bizari na jira, lakini mmeyaacha yale yenye uzito mkubwa katika sheria: haki, rehema na uaminifu. Hayo ndiyo mliyopaswa kuyafanya, bila kuacha yale mengine pia. 24Viongozi vipofu! Mnachuja kinywaji chenu ili kumtoa usubi, kisha mnammeza ngamia mzima.

25Ole wenu, waandishi na Mafarisayo, ninyi wanafiki! Mnaosha kikombe na sahani kwa nje, lakini ndani vimejazwa kwa unyang’anyi na anasa. 26Farisayo kipofu! Safisha kwanza kikombe na sahani kwa ndani, ili kwa nje pia viwe safi.

27Ole wenu, waandishi na Mafarisayo, ninyi wanafiki! Mko kama makaburi yaliyopakwa chokaa nyeupe. Kwa nje yanapendeza, lakini ndani yamejaa mifupa ya maiti na kila aina ya unajisi. 28Ndivyo mlivyo nanyi. Kwa nje mnaonekana kwa wengine kuwa wenye haki, lakini ndani mmejaa unafiki na dharau kwa sheria ya Mungu.

29Ole wenu, waandishi na Mafarisayo, ninyi wanafiki! Mnawajengea manabii makaburi na kuyapamba makaburi ya ukumbusho ya wenye haki. 30Kisha mnasema, ‘Kama tungaliishi wakati wa mababu zetu, tusingalijiunga nao kamwe katika kuwaua manabii.’ 31Maneno yenu wenyewe yanawashuhudia: ninyi ni wana wa wauaji wa manabii. 32Basi, malizieni kujaza kipimo cha dhambi za mababu zenu! 33Ninyi nyoka! Ninyi ukoo wa nyoka! Mtawezaje kuikwepa hukumu ya jehanamu? 34Ndiyo maana ninawatumia manabii, wenye hekima na waandishi. Baadhi yao mtawaua na kuwasulubisha; wengine mtawapiga mijeledi katika masinagogi yenu na kuwawinda kutoka mji mmoja hadi mwingine. 35Kwa hiyo lawama ya damu yote ya watu wasio na hatia iliyomwagwa duniani itawaangukia ninyi, kuanzia damu ya Habili, mtu mwenye haki, hadi damu ya Zakaria mwana wa Barakia, ambaye mlimuua kati ya hekalu na madhabahu. 36Kweli nawaambia, mambo haya yote yatakiangukia kizazi hiki. 37Yerusalemu, Yerusalemu! Unawaua manabii na kuwapiga mawe wajumbe waliotumwa kwako. Mara ngapi nimetamani kuwakusanya watoto wako pamoja, kama kuku anavyowakusanya vifaranga wake chini ya mabawa yake! Lakini mlikataa. 38Sasa nyumba yenu inaachwa kwenu ikiwa hame. 39Kwa maana nawaambia, tangu sasa hamtaniona tena mpaka mtakaposema, ‘Amebarikiwa yeye anayekuja kwa jina la Bwana.’”