Mathayo 15

1Kisha Mafarisayo na waandishi walifika kutoka Yerusalemu, wakamwuliza Yesu, 2“Kwa nini wanafunzi wako wanakwenda kinyume na mapokeo tuliyoachiwa na wazee? Wanakula chakula bila kunawa mikono kwanza.” 3Aliwajibu, “Na ninyi, kwa nini mnakwenda kinyume na amri ya Mungu kwa ajili ya mapokeo yenu? 4Kwa maana Mungu alisema, ‘Mpe heshima baba yako na mama yako,’ na tena, ‘Mtu anayemtukana baba yake au mama yake lazima auawe.’ 5Lakini ninyi mnafundisha kwamba mtu akimwambia baba yake au mama yake, ‘Msaada wowote ambao ungeweza kuupata kutoka kwangu umetengwa kuwa zawadi kwa Mungu,’ 6basi hana tena wajibu wa kumheshimu baba yake. Hivyo kwa ajili ya mapokeo yenu mmelifuta neno la Mungu. 7Ninyi ni wanafiki, na unabii wa Isaya kuwahusu ninyi ulikuwa sahihi kabisa. Alisema: 8‘Kwa midomo yao watu hawa wananipa heshima, lakini mioyo yao inakaa mbali nami. 9Ibada yao kwangu haina maana, kwa sababu mafundisho wanayofundisha ni amri zilizotungwa na wanadamu.’”

10Kisha Yesu aliuita umati wa watu uje kwake, akasema, “Sikilizeni haya, na myaelewe. 11Mtu hafanywi najisi na kile kinachoingia kinywani mwake. Kinachomfanya mtu kuwa najisi ni kile kinachotoka kinywani.”

12Kisha wanafunzi walimjia, wakamwambia, “Je, unafahamu kwamba Mafarisayo wamechukizwa na maneno uliyosema?” 13Alijibu, “Mmea wowote ambao Baba yangu aliye mbinguni hakuupanda utang’olewa pamoja na mizizi yake. 14Msijali habari zao. Wao ni vipofu, lakini wanawaongoza wengine walio vipofu. Kipofu anapomwongoza kipofu mwenzake, wote wawili huishia kutumbukia handakini.”

15Petro alidakia, “Tueleze maana ya mfano huu.” 16Alisema, “Hata ninyi bado ni wazito kuelewa namna hii? 17Je, hamwoni kwamba kila kinacholiwa hushuka tumboni, kisha hutoka mwilini kwenda chooni? 18Lakini kinachotoka kinywani chanzo chake ni moyoni, na hicho ndicho kinachomfanya mtu kuwa najisi. 19Ni kutoka moyoni ambako hutoka mipango miovu, na mauaji, uzinzi na kila aina nyingine ya uasherati, wizi, ushahidi wa uongo na maneno ya matusi. 20Hayo ndiyo yanayomfanya mtu kuwa najisi. Kula bila kunawa mikono hakumfanyi mtu yeyote kuwa najisi.”

21Yesu aliondoka mahali pale, akaenda katika eneo la Tiro na Sidoni. 22Mwanamke Mkanaani aliyeishi katika eneo lile alikuja, akaendelea kulia kwa sauti, “Bwana, Mwana wa Daudi, nihurumie! Pepo amemshika binti yangu, naye anateseka sana.” 23Lakini yeye hakumpa jibu lolote, hata neno moja. Wanafunzi wake walimjia, wakamsihi tena na tena, “Mwambie aondoke, kwa sababu anaendelea kupiga kelele nyuma yetu.” 24Alijibu, “Nimetumwa kwa kondoo waliopotea tu, yaani watu wa Israeli.” 25Lakini yule mwanamke alikuja, akainama chini mbele yake. Akasema, “Bwana, nisaidie!” 26Alimjibu, “Haifai kuwanyang’anya watoto mkate wao na kuwarushia mbwa wadogo.” 27Akasema, “Ni kweli, Bwana. Hata hivyo, mbwa wadogo hula baadhi ya chembe zinazodondoka kutoka mezani wanapokula mabwana zao.” 28Kisha Yesu alimwambia, “Mama, una imani kubwa. Ufanyiwe kama unavyotaka.” Na tangu wakati ule binti yake alikuwa mzima.

29Kutoka hapo Yesu aliendelea, akafika kando ya Bahari ya Galilaya. Akapanda mlimani, akaketi huko. 30Umati mkubwa wa watu ulimjia, ukiwaleta watu wasioweza kusema, vipofu, viwete, vilema na wengine wengi. Wakawalaza chini ya miguu yake, naye akawaponya. 31Umati ulishangaa kuona bubu wakizungumza, vilema wakifanywa wazima, viwete wakitembea na vipofu wakiweza kuona. Nao wakamtukuza Mungu wa Israeli.

32Yesu aliwaita wanafunzi wake, akasema, “Ninawaonea huruma sana watu hawa. Sasa ni siku tatu wamekaa nami, na hawana chakula kilichobaki. Nikiwaruhusu waende bila kula, wanaweza kuishiwa nguvu njiani, na sitaki kufanya hivyo.” 33Wanafunzi walimwambia, “Hapa mahali hapa pasipo na watu, tungeweza kupata wapi mkate wa kutosha kulisha umati mkubwa kiasi hiki?” 34Yesu aliwauliza, “Mna mikate mingapi?” “Saba,” wakasema, “na samaki wadogo wachache.” 35Aliwaambia watu waketi chini. 36Kisha akachukua ile mikate saba na wale samaki, akashukuru, akaimega. Akawa akiwapa wanafunzi, nao wanafunzi wakawagawia watu. 37Wote walikula mpaka wakashiba. Kisha wakakusanya vipande vilivyobaki, navyo vikajaa vikapu vikubwa saba. 38Wale waliokula walikuwa wanaume elfu nne, na zaidi ya hao walikuwepo wanawake na watoto. 39Baada ya kuuaga umati, aliingia katika mashua, akaenda eneo la Magadani.