Mathayo 10

1Yesu aliwaita kwake wanafunzi wake kumi na wawili, akawapa mamlaka juu ya pepo wachafu, wawafukuze, na waponye kila aina ya ugonjwa na maradhi. 2Mitume kumi na wawili walikuwa hawa: wa kwanza Simoni, aliyeitwa Petro, pamoja na ndugu yake Andrea; kisha Yakobo mwana wa Zebedayo, pamoja na ndugu yake Yohana; 3Filipo na Bartholomayo; Tomaso, na Mathayo mtoza ushuru; Yakobo mwana wa Alfayo, na Thadayo; 4Simoni Mkananayo, na Yuda Iskariote, yule aliyemsaliti.

5Yesu aliwatuma hao kumi na wawili, akawapa maagizo haya: “Msishike njia zinazoelekea kwa watu wa mataifa, wala msiingie mji wa Kisamaria. 6Badala yake nendeni kwa kondoo waliopotea, yaani watu wa Israeli. 7Popote mwendapo, hubirini hivi: ‘Ufalme wa mbinguni uko karibu.’ 8Waponyeni wagonjwa, wafufueni waliokufa, watakaseni wenye ukoma, wafukuzeni pepo. Mlipokea bila kulipa, kwa hiyo toeni bila kudai malipo. 9Msijipatie pesa za kuweka mikandani mwenu, iwe dhahabu, fedha au shaba. 10Msichukue mkoba wa safari, wala vazi la pili, wala viatu, wala fimbo. Mfanyakazi amestahili chakula chake. 11Mkiingia katika mji au kijiji, ulizeni ni nani humo anayestahili, mkae kwake mpaka mtakapoendelea na safari. 12Mnapoingia nyumbani, wasalimuni watu wa nyumba hiyo. 13Ikiwa watu wa nyumba hiyo wanastahili, amani mnayowatakia ikae juu yao. Lakini kama hawastahili, amani mliyotoa irudi kwenu. 14Wengine hawatawapokea wala kusikiliza ujumbe wenu. Mnapoondoka katika nyumba hiyo au mji huo, kung’uteni vumbi kutoka miguuni mwenu. 15Kweli nawaambia, siku ya hukumu nchi ya Sodoma na Gomora itapata nafuu kuliko mji huo.

16Kumbukeni, ni mimi ninayewatuma, kama kondoo waliozungukwa na mbwa mwitu. Kwa hiyo kuweni macho na werevu kama nyoka, lakini wasio na madhara kama njiwa. 17Kuweni macho na watu. Watawakabidhi kwa mabaraza ya mahali, na kuwachapa viboko katika sinagogi zao. 18Kwa ajili yangu mtapelekwa mbele ya magavana na wafalme. Huko mtatoa ushuhuda mbele yao na mbele ya watu wa mataifa. 19Lakini mtakapokabidhiwa, msihangaike juu ya jinsi ya kujibu au nini cha kusema. Saa hiyo mtapewa maneno ya kusema. 20Atakayesema si ninyi; atakuwa Roho wa Baba yenu akisema ndani yenu. 21Ndugu atamkabidhi ndugu yake ili auawe, na baba atamkabidhi mtoto wake. Watoto watawageuka wazazi wao na kuwapeleka wauawe. 22Watu wote watawachukia kwa sababu ya jina langu. Lakini yeyote atakayeshikilia imara hadi mwisho ataokolewa. 23Wakiwawinda katika mji mmoja, kimbilieni mji unaofuata. Kweli nawaambia, Mwana wa Adamu atakuja kabla hamjamaliza kazi yenu katika miji ya Israeli.

24Hakuna mwanafunzi aliye juu ya mwalimu wake, wala mtumishi aliye juu ya bwana wake. 25Inamtosha mwanafunzi kufanana na mwalimu wake, na mtumishi kufanana na bwana wake. Ikiwa mkuu wa nyumba wamemwita Beelzebuli, watawatukana zaidi sana watu wa nyumba yake!

26Kwa hiyo msiwaogope. Kila kilichofunikwa sasa kitafunuliwa, na kila siri itajulikana wazi. 27Mambo ninayowaambia gizani, myaseme mahali pa wazi; mnayoyasikia kwa kunong’onezwa, myatangaze kutoka juu ya mapaa ya nyumba. 28Wale wanaoua mwili hawana uwezo wa kuua nafsi, kwa hiyo msiwaogope. Badala yake mwogopeni yeye anayeweza kuangamiza nafsi na mwili pamoja katika jehanamu. 29Je, shomoro wawili hawauzwi kwa mshahara wa chini ya saa moja? Lakini hakuna hata mmoja wao anayeanguka chini pasipo Baba yenu. 30Kwa upande wenu, hata kila unywele wa kichwa chenu umehesabiwa. 31Kwa hiyo msiogope. Ninyi mna thamani zaidi kuliko kundi zima la shomoro.

32Basi kila mtu atakayesema waziwazi mbele ya watu kwamba yeye ni wangu, nami nitamtambua mbele ya Baba yangu aliye mbinguni. 33Lakini yeyote atakayenikataa mbele ya watu atakataliwa na mimi mbele ya Baba yangu aliye mbinguni.

34Msidhani kwamba kuja kwangu kulikuwa kwa ajili ya kuleta amani duniani. Nilikuja kuleta upanga, si amani. 35Kuja kwangu kutamfarakanisha mwana na baba yake, binti na mama yake, na mkaza mwana na mama mkwe wake. 36Adui wa mtu watakuwa watu wa nyumba yake mwenyewe. 37Yeyote anayempenda baba au mama kuliko anavyonipenda mimi hanistahili; na yeyote anayempenda mwana au binti kuliko anavyonipenda mimi hanistahili. 38Yeyote anayekataa kuubeba msalaba wake mwenyewe na kutembea nyuma yangu hanistahili. 39Wanaoyalinda maisha yao watayapoteza, na wanaoyapoteza maisha yao kwa ajili yangu watayapata.

40Kuwakaribisha ninyi ni kunikaribisha mimi, na kunikaribisha mimi ni kumkaribisha yeye aliyenituma. 41Yeyote anayemkaribisha nabii kwa sababu ni nabii atapewa ujira wa nabii; na yeyote anayemkaribisha mtu mwenye haki kwa sababu ni mwenye haki atapewa ujira wa wenye haki. 42Na yeyote atakayempa mmoja wa wadogo hawa hata kikombe kimoja tu cha maji baridi kwa sababu ni mwanafunzi, kweli nawaambia, hatakosa kamwe ujira wake.”