Mathayo 3

1Katika siku hizo Yohana Mbatizaji alitokea katika nyika ya Uyahudi akiwa na ujumbe. 2Alitangaza, “Tubuni, kwa sababu ufalme wa mbinguni umekaribia.” 3Yohana ndiye ambaye nabii Isaya alimtaja aliposema, “Sauti inaita nyikani: ‘Mwandalieni Bwana njia, nyoosheni barabara atakazopita.’” 4Yohana mwenyewe alivaa nguo iliyofumwa kwa nywele za ngamia, akiwa na mkanda wa ngozi kiunoni, naye alikula nzige na asali ya porini. 5Umati wa watu uliendelea kumwendea kutoka Yerusalemu, kutoka kila sehemu ya Uyahudi na kutoka nchi yote iliyo kando ya Yordani. 6Wakaungama dhambi zao, naye akawabatiza katika mto Yordani.

7Lakini Yohana alipowaona Mafarisayo na Masadukayo wengi wakija kubatizwa, aliwaambia, “Ninyi jamaa ya nyoka! Ni nani aliyewaonya mkimbie ghadhabu inayokuja? 8Basi zaeni matunda yanayoonyesha kwamba toba yenu ni ya kweli. 9Msidhani mnaweza kujifariji kwa kusema, ‘Ibrahimu ni baba yetu.’ Nawaambia, Mungu anaweza kumfanyia Ibrahimu watoto kutoka katika mawe haya. 10Shoka limekwisha kuwekwa kwenye mizizi ya miti. Mti wowote usiozaa matunda mazuri unakatwa na kutupwa motoni.

11Mimi nawabatiza kwa maji kwa ajili ya toba. Lakini yule anayekuja baada yangu ana nguvu kuliko mimi, nami sifai hata kubeba ndara zake. Yeye atawabatiza kwa Roho Mtakatifu na kwa moto. 12Anacho chombo chake cha kupepetea mkononi mwake, naye atausafisha uwanja wake wa kupuria. Ataikusanya ngano yake ghalani, lakini makapi atayateketeza kwa moto ambao hauwezi kuzimwa.”

13Kisha Yesu alifika kutoka Galilaya, akamwendea Yohana huko Yordani ili abatizwe naye. 14Yohana alijaribu kumzuia. “Mimi ndiye ninayehitaji kubatizwa na wewe,” akasema, “lakini wewe unakuja kwangu?” 15Lakini Yesu alijibu, “Liruhusu kwa sasa. Hii ndiyo njia inayotufaa ya kutimiza haki yote.” Ndipo Yohana akamruhusu abatizwe. 16Yesu alipobatizwa, alitoka majini mara moja. Ghafula mbingu zikafunguka, naye akamwona Roho wa Mungu akishuka kama njiwa na kutua juu yake. 17Na sauti ilinena kutoka mbinguni: “Huyu ni Mwana wangu mpendwa sana; yeye ananifurahisha.”