Mathayo 27

1Asubuhi na mapema wakuu wote wa makuhani na wazee wa watu walikutana, wakafikia uamuzi dhidi ya Yesu: lazima auawe. 2Walimfunga, wakamchukua, wakamkabidhi kwa Pilato, mkuu wa mkoa.

3Yuda, aliyekuwa amemsaliti, alipoona kwamba Yesu amehukumiwa, alijawa na majuto, akavirudisha vile vipande thelathini vya fedha kwa wakuu wa makuhani na wazee. 4Akasema, “Nimetenda dhambi. Nimemkabidhi mtu asiye na hatia auawe.” Walimjibu, “Hilo linatuhusu nini? Hilo ni shauri lako.” 5Yuda alivitupa vile vipande vya fedha ndani ya hekalu, akaondoka. Kisha akaenda, akajinyonga. 6Wakuu wa makuhani waliviokota vile vipande vya fedha, wakasema, “Sheria hairuhusu tuviweke katika hazina ya hekalu, kwa sababu vimelipwa ili mtu auawe.” 7Walishauriana, wakaamua kununua Shamba la Mfinyanzi kwa fedha hiyo, liwe mahali pa kuwazika watu wa nchi nyingine. 8Ndiyo sababu shamba hilo limekuwa likiitwa Shamba la Damu tangu wakati huo hadi leo. 9Hapo neno lililosemwa kupitia nabii Yeremia lilitimia: “Walivichukua vile vipande thelathini vya fedha, bei aliyowekewa yule ambaye baadhi ya watu wa Israeli walimkadiria thamani, 10wakavitoa kwa ajili ya shamba la mfinyanzi, kama Bwana alivyokuwa ameniagiza.”

11Yesu sasa alisimama mbele ya mkuu wa mkoa, naye akamwuliza, “Je, wewe ndiwe Mfalme wa Wayahudi?” Yesu alijibu, “Wewe ndiye unayesema hivyo.” 12Lakini wakuu wa makuhani na wazee walipotoa mashtaka yao dhidi yake, hakujibu neno. 13Kisha Pilato alimwambia, “Husikii mashtaka yote haya wanayoleta dhidi yako?” 14Hata hivyo Yesu hakumjibu hata shtaka moja, na mkuu wa mkoa alishangaa sana.

15Kila sikukuu mkuu wa mkoa alikuwa na desturi ya kumwachilia huru mfungwa mmoja kwa ajili ya umati, yeyote waliyemtaka. 16Wakati huo walikuwa wamemfunga mfungwa mmoja aliyejulikana na kila mtu, aitwaye Yesu Baraba. 17Umati ulipokusanyika, Pilato aliwauliza, “Mnataka nimwachilie huru yupi kwa ajili yenu: Yesu Baraba, au Yesu anayeitwa Kristo?” 18Alifahamu kwamba wivu ndio uliowasukuma kumkabidhi Yesu.

19Pilato alipokuwa ameketi katika kiti cha hukumu, mke wake alimtumia ujumbe: “Mwache yule mtu mwenye haki. Leo nimeteseka sana katika ndoto kwa sababu yake.”

20Lakini wakuu wa makuhani na wazee waliwashawishi watu wamwombe Baraba na Yesu auawe. 21Mkuu wa mkoa aliwauliza tena, “Kati ya hawa wawili, mnataka nimwachilie huru yupi kwa ajili yenu?” “Baraba!” walisema. 22Pilato aliwauliza, “Basi nimfanye nini Yesu anayeitwa Kristo?” Wote walipiga kelele, “Asulubiwe!” 23“Lakini amefanya kosa gani?” Pilato aliuliza. Lakini wao walizidi kupaza sauti, “Asulubiwe!” 24Pilato aliona kwamba hapati mafanikio yoyote, bali badala yake fujo zilikuwa zinaanza. Basi alichukua maji, akanawa mikono mbele ya umati, akasema, “Sina hatia juu ya kifo cha mtu huyu. Hilo ni shauri lenu.” 25Watu wote waliokuwa pale walijibu, “Hatia ya kifo chake na iwe juu yetu na juu ya watoto wetu!” 26Basi Pilato alimwachilia huru Baraba, kama walivyotaka. Kuhusu Yesu, Pilato aliamuru apigwe mijeledi, kisha akamkabidhi ili asulubiwe.

27Kisha askari wa mkuu wa mkoa walimpeleka Yesu ndani ya ikulu yake, na kikosi kizima kikakusanyika kumzunguka. 28Walimvua nguo zake, wakamvika joho jekundu la kijeshi. 29Wakasokota matawi yenye miiba kuwa taji, wakaiweka juu ya kichwa chake, wakatia fimbo katika mkono wake wa kulia. Kisha wakapiga magoti mbele yake, wakamdhihaki, wakisema, “Salamu, ee Mfalme wa Wayahudi!” 30Wakamtemea mate, wakaichukua ile fimbo, wakampiga nayo kichwani tena na tena. 31Walipomaliza kumdhihaki, walimvua lile joho, wakamvika tena nguo zake mwenyewe. Kisha wakamtoa nje ili wakamsulubishe.

32Walipokuwa wakitoka, walikutana na mtu mmoja wa Kirene aitwaye Simoni, wakamlazimisha aubebe msalaba wa Yesu.

33Walifika mahali panapoitwa Golgotha, jina lenye maana ya Mahali pa Fuvu. 34Huko walimpa divai iliyochanganywa na nyongo anywe. Alipoionja, alikataa kuinywa. 35Walipokwisha kumsulubisha, waligawana nguo zake kwa kutupa kura. 36Kisha wakaketi pale, wakamlinda. 37Juu ya kichwa chake waliweka maandishi ya shtaka dhidi yake: “Huyu ni Yesu, Mfalme wa Wayahudi.”

38Wanyang’anyi wawili walisulubiwa pamoja naye, mmoja upande wa kulia wake na mwingine upande wa kushoto wake. 39Watu waliokuwa wakipita walimtukana sana, wakitikisa vichwa vyao. 40Wakasema, “Ati wewe ndiwe utakayelibomoa hekalu na kulijenga upya kwa siku tatu! Jiokoe mwenyewe! Ikiwa wewe ni Mwana wa Mungu, teremka kutoka msalabani!” 41Vivyo hivyo wakuu wa makuhani pamoja na waandishi na wazee walimdhihaki. Walisema, 42“Aliwaokoa watu wengine, lakini hana uwezo wa kujiokoa mwenyewe. Eti ni Mfalme wa Israeli? Basi ateremke msalabani sasa hivi, nasi tutamwamini. 43Aliweka tumaini lake kwa Mungu; basi Mungu amwokoe sasa, kama kweli anamtaka. Kwa maana alisema, ‘Mimi ni Mwana wa Mungu.’” 44Hata wale wanyang’anyi waliosulubiwa pamoja naye walimtukana kwa matusi yale yale.

45Tangu saa sita mchana giza liliifunika nchi yote, likadumu mpaka saa tisa. 46Karibu saa tisa Yesu alitoa kilio kikubwa: “Eli, Eli, lema sabakthani?” Maana yake ni, “Mungu wangu, Mungu wangu, kwa nini umenitupa?” 47Baadhi ya watu waliokuwa wamesimama karibu waliposikia, walisema, “Huyu jamaa anamwita Eliya!” 48Mara moja mmoja wao alikimbia, akaleta sifongo. Akailowesha katika divai chungu, akaiweka kwenye ncha ya fimbo, akamwinulia ili anywe. 49Lakini wale wengine wakamwambia, “Ngoja, tuone kama Eliya atakuja kumwokoa.” 50Yesu alilia tena kwa sauti kuu, akaiachilia roho yake. 51Kisha pazia la hekalu lilichanika vipande viwili, kuanzia juu kabisa hadi chini. Ardhi ikatikisika na miamba ikapasuka. 52Makaburi yakafunguka, na miili ya watu wengi watakatifu wa Mungu waliokuwa wamelala katika kifo ikafufuliwa. 53Wakitoka makaburini baada ya Yesu kufufuliwa, waliingia katika mji mtakatifu, wakajionyesha kwa watu wengi.

54Akida na askari waliokuwa pamoja naye wakimlinda Yesu waliona tetemeko la ardhi na yote yaliyokuwa yakitukia, wakajaa hofu. Wakasema, “Kwa kweli mtu huyu alikuwa Mwana wa Mungu!”

55Wanawake wengi walikuwa pale wakiangalia kutoka mbali. Wanawake hao walikuwa wamefuatana na Yesu tangu Galilaya, wakimpatia mahitaji yake. 56Miongoni mwao walikuwa Mariamu Magdalene, Mariamu mama wa Yakobo na Yosefu, na mama wa wana wa Zebedayo.

57Ilipokaribia jioni, Yosefu alifika. Alikuwa mtu tajiri wa mji wa Arimathaya, naye pia alikuwa amekuwa mwanafunzi wa Yesu. 58Alikwenda kwa Pilato, akaomba mwili wa Yesu. Ndipo Pilato akaamuru akabidhiwe. 59Yosefu aliuchukua mwili, akauzungushia shuka safi ya kitani. 60Kisha akauweka ndani ya kaburi jipya alilokuwa amejichongea mwambani, akavingirisha jiwe kubwa kuziba mlango wa kaburi, akaenda. 61Mariamu Magdalene alikuwa pale, pamoja na yule Mariamu mwingine; walikuwa wameketi wakilitazama kaburi.

62Siku iliyofuata, yaani siku baada ya Siku ya Maandalio, wakuu wa makuhani na Mafarisayo walikwenda pamoja kwa Pilato. 63Wakasema, “Bwana, tumekumbuka jambo alilosema yule mdanganyifu alipokuwa bado hai: ‘Baada ya siku tatu nitafufuliwa.’ 64Kwa hiyo toa amri kaburi lilindwe vizuri mpaka siku ya tatu. La sivyo, wanafunzi wake wanaweza kuja na kumchukua kwa siri, kisha wakawatangazia watu, ‘Amefufuliwa kutoka kwa wafu.’ Na udanganyifu huu wa mwisho utaleta madhara makubwa kuliko ule wa kwanza.” 65Pilato aliwajibu, “Mnaweza kuchukua walinzi. Nendeni mkalilinde kaburi kwa njia mnayoona ni bora.” 66Walikwenda, wakaweka muhuri juu ya jiwe, na kwa kuwaweka walinzi pale wakalifanya kaburi kuwa salama.