Marko 1

1Mwanzo wa Injili kuhusu Yesu Kristo.

2Ilitokea kama ilivyoandikwa katika kitabu cha nabii Isaya: “Angalia, ninamtuma mjumbe wangu akutangulie; yeye atakuandalia barabara yako. 3Sauti ya mtu inaita nyikani: ‘Andaeni njia ya Bwana, nyoosheni barabara atakazopita.’” 4Kisha Yohana Mbatizaji akatokea nyikani, akiwahubiria watu ubatizo wa toba ili wasamehewe dhambi zao. 5Watu kutoka nchi yote ya Uyahudi na wakazi wote wa Yerusalemu waliendelea kumwendea. Waliziungama dhambi zao, naye akawabatiza katika Mto Yordani. 6Mavazi ya Yohana yalitengenezwa kwa manyoya ya ngamia, na alijifunga mkanda wa ngozi kiunoni. Chakula chake kilikuwa nzige na asali ya porini. 7Ujumbe wake ulikuwa huu: “Baada yangu anakuja mtu mwenye nguvu kuliko mimi. Mimi sifai hata kuinama na kufungua kamba za viatu vyake. 8Ubatizo niliowapa ulikuwa wa maji; yeye atawabatiza kwa Roho Mtakatifu.”

9Ilikuwa katika siku hizo ambapo Yesu alikuja kutoka Nazareti ya Galilaya, naye Yohana akambatiza katika Yordani. 10Mara moja alipotoka majini, aliona mbingu zimepasuka, na Roho akishuka juu yake kama njiwa. 11Kisha sauti ikasema kutoka mbinguni: “Wewe ni Mwana wangu mpendwa. Nafurahishwa sana nawe.”

12Mara moja Roho alimsukuma aende nyikani. 13Alikaa nyikani siku arobaini, Shetani akimjaribu. Alikuwa kati ya wanyama wa porini, na malaika wakamhudumia.

14Baada ya Yohana kukabidhiwa na kutiwa nguvuni, Yesu alikwenda Galilaya, akihubiri Injili ya Mungu. 15Alisema, “Wakati uliowekwa umewadia kikamilifu, na ufalme wa Mungu umekaribia. Tubuni, mkaiamini Injili.”

16Yesu alipokuwa akitembea ufuoni mwa Bahari ya Galilaya, aliwaona Simoni na Andrea ndugu yake wakirusha wavu baharini. Kazi yao ilikuwa kuvua samaki. 17Yesu akawaambia, “Njooni mnifuate. Nitawageuza muwe wavuvi wa watu.” 18Mara moja waliacha nyavu zao, wakamfuata. 19Alipoendelea mbele kidogo, aliwaona Yakobo mwana wa Zebedayo na Yohana ndugu yake, wakiwa ndani ya mashua yao wakitengeneza nyavu. 20Mara moja akawaita. Wakamwacha baba yao Zebedayo ndani ya mashua pamoja na vibarua, wakaondoka kumfuata.

21Wakafika Kapernaumu. Siku ya Sabato aliingia moja kwa moja katika sinagogi, akafundisha. 22Mafundisho yake yaliwashangaza sana. Hakufundisha kama waandishi; alifundisha kama mtu mwenye mamlaka. 23Wakati huohuo, katika sinagogi lao, kulikuwa na mtu aliyepagawa na pepo mchafu, naye akapiga yowe, 24“Unataka nini kwetu, Yesu wa Nazareti? Je, umekuja hapa kutuangamiza? Ninajua wewe ni nani: Mtakatifu wa Mungu!” 25Yesu akamwamuru kwa ukali, “Nyamaza! Mtoke mtu huyu!” 26Pepo mchafu akamtupatupa yule mtu kwa nguvu, akapiga ukelele mkubwa, akamtoka. 27Wote walishangaa sana, wakajadiliana wao kwa wao: “Ni nini hiki? Ni mafundisho mapya ya aina yake, yenye mamlaka! Kwa amri yake hata pepo wachafu wanatii.” 28Habari zake zikaenea upesi pande zote, katika nchi yote inayozunguka Galilaya.

29Walitoka sinagogini, wakaenda moja kwa moja nyumbani kwa Simoni na Andrea, na Yakobo na Yohana walikwenda pamoja nao. 30Mama mkwe wa Simoni alikuwa amelala kitandani akiugua homa, nao bila kukawia wakamweleza Yesu habari zake. 31Akamwendea, akamshika mkono, akamwinua. Homa ikamwacha, naye akaanza kuwahudumia.

32Jioni ilipofika na jua likiwa limekwisha kutua, watu walianza kumletea wote waliokuwa wagonjwa au waliotawaliwa na pepo. 33Watu wa mji wote walikuwa wamejazana nje ya mlango. 34Aliwaponya watu wengi waliokuwa na magonjwa ya kila aina, akafukuza pepo wengi. Hakuwaruhusu pepo hao kusema lolote, kwa kuwa walimjua.

35Kabla ya kupambazuka, aliamka, akatoka nje. Alikwenda mahali pa faragha, akakaa huko akisali. 36Simoni na wale waliokuwa pamoja naye wakamsaka. 37Walipomkuta, wakamwambia, “Kila mtu anakutafuta!” 38Akawajibu, “Twendeni kwenye miji mingine iliyo jirani, ili nihubiri ujumbe huko pia. Hilo ndilo nililotoka kufanya.” 39Akazunguka Galilaya yote, akihubiri katika masinagogi yao na kufukuza pepo.

40Mtu mmoja mwenye ugonjwa mbaya wa ngozi alimjia. Akapiga magoti, akamsihi, “Ukipenda, una uwezo wa kunifanya safi.” 41Akiwa amejaa hasira, alinyoosha mkono wake, akamgusa. Akamwambia, “Nataka. Uwe safi!” 42Mara moja ugonjwa ule ukamtoka, naye akawa safi. 43Yesu alimwonya kwa ukali, akamwambia aondoke mara moja. 44Akamwambia, “Hakikisha humwambii mtu yeyote habari hii. Badala yake, nenda kwa kuhani akuchunguze. Kisha toa sadaka ambazo Musa aliagiza kwa ajili ya kutakaswa kwako. Hilo litakuwa ushahidi kwao.” 45Lakini yule mtu alikwenda, akaanza kumweleza kila mtu na kueneza habari ya yaliyotukia, hata Yesu hakuweza tena kuingia mjini waziwazi. Alikaa nje mahali pasipo na watu, na bado watu walimjia kutoka pande zote.