Marko 11

1Walipokuwa wakikaribia Yerusalemu, wakafika karibu na Bethfage na Bethania, kando ya Mlima wa Mizeituni, Yesu aliwatuma wawili wa wanafunzi wake 2akawaagiza, “Nendeni kijijini kilicho mbele yenu. Mara tu mtakapoingia, mtamkuta mwana-punda amefungwa hapo, ambaye hakuna mtu aliyewahi kumpanda. Mfungueni mkamlete hapa. 3Mtu yeyote akiwauliza, ‘Kwa nini mnafanya hivi?’ waambieni, ‘Bwana anamhitaji, naye atamrudisha hapa bila kukawia.’” 4Wakaenda, wakamkuta mwana-punda amefungwa karibu na mlango, nje mtaani, wakamfungua. 5Baadhi ya watu waliokuwa wamesimama karibu wakawauliza, “Mnafanya nini, kumfungua mwana-punda huyo?” 6Wanafunzi wakawajibu kama Yesu alivyowaagiza, nao wale watu wakawaacha waende. 7Wakamleta mwana-punda kwa Yesu, wakatandika mavazi yao mgongoni mwake, naye akaketi juu yake. 8Watu wengi walitandika mavazi yao barabarani, na wengine wakatandika matawi yenye majani waliyoyakata mashambani. 9Watu waliotembea mbele na wale waliofuata nyuma waliendelea kupaza sauti, “Hosana! Amebarikiwa yeye anayekuja kwa jina la Bwana! 10Umebarikiwa ufalme wa baba yetu Daudi, unaokuja sasa! Hosana mbinguni juu kabisa!”

11Yesu aliingia Yerusalemu, akaenda katika nyua za hekalu. Akatazama kila kitu pande zote, lakini kwa kuwa ilikuwa imekwisha kuwa jioni, akaondoka kwenda Bethania pamoja na wale Kumi na Wawili.

12Kesho yake, walipokuwa wakitoka Bethania, Yesu aliona njaa. 13Aliona kwa mbali mtini uliojaa majani, akaenda kuona kama ungekuwa na chochote. Alipoufikia hakukuta kitu ila majani tu, kwa sababu haukuwa msimu wa tini. 14Akauambia mti, “Mtu yeyote asile tena tunda lako kamwe.” Nao wanafunzi wake walisikia.

15Kisha wakaingia Yerusalemu. Aliingia katika nyua za hekalu, akaanza kuwafukuza watu waliokuwa wakiuza na kununua humo. Akazipindua meza za wabadilishaji fedha na viti vya wauza njiwa, 16wala hakumruhusu mtu yeyote kupitisha mizigo katika nyua za hekalu. 17Kisha akawafundisha, akisema, “Je, Maandiko hayasemi, ‘Nyumba yangu itajulikana kuwa nyumba ya maombi ya mataifa yote’? Lakini ninyi mmeigeuza kuwa maficho ya majambazi.” 18Wakuu wa makuhani na waandishi waliposikia habari hii, wakaanza kutafuta njia ya kumwua. Walimwogopa, kwa kuwa umati wote ulivutiwa sana na mafundisho yake.

19Kila jioni walitoka nje ya mji.

20Asubuhi iliyofuata, walipokuwa wakipita njiani, waliuona ule mtini umekauka kuanzia mizizini. 21Petro akakumbuka, akamwambia, “Rabi, tazama! Mtini ulioulaani umekauka kabisa.” 22Yesu akawajibu, “Kuweni na imani kwa Mungu. 23Kweli nawaambia, mtu akiuambia mlima huu, ‘Ondoka, ukatupwe baharini,’ bila kusitasita moyoni mwake, bali akiamini kwamba anachokisema kinatokea, atafanyiwa hivyo. 24Kwa hiyo nawaambia: chochote mnachoomba mnaposali, aminini kwamba mmekipokea, nanyi mtakipata. 25Na kila mnaposimama kusali, ikiwa mna kinyongo na mtu yeyote, msameheni, ili Baba yenu wa mbinguni awasamehe nanyi makosa yenu.”

27Wakaingia tena Yerusalemu. Alipokuwa akitembea katika nyua za hekalu, wakuu wa makuhani, waandishi na wazee walimwendea 28wakamwuliza kwa ukali, “Una mamlaka gani ya kufanya mambo haya? Au ni nani aliyekupa mamlaka hayo ya kuyafanya?” 29Yesu akawaambia, “Nitawauliza swali moja. Nijibuni, kisha nitawaambia nina mamlaka gani ya kufanya mambo haya. 30Ubatizo wa Yohana: ulitoka mbinguni, au ulitoka kwa wanadamu? Nijibuni!” 31Wakashauriana wao kwa wao: “Tutasema nini? Tukisema, ‘Ulitoka mbinguni,’ atatujibu, ‘Basi mbona hamkumwamini?’ 32Lakini tukisema, ‘Ulitoka kwa wanadamu’...” Waliuogopa umati, kwa sababu kila mtu aliamini kwamba Yohana alikuwa nabii kweli. 33Basi wakamjibu Yesu, “Hatujui.” Yesu akawaambia, “Basi mimi pia sitawaambia nina mamlaka gani ya kufanya mambo haya.”