Marko 16

1Sabato ilipopita, Mariamu Magdalene, Mariamu mama yake Yakobo, na Salome walinunua manukato ili waende kuupaka mwili wake. 2Siku ya kwanza ya juma, mapema sana, jua lilipokuwa limechomoza, walikwenda kaburini. 3Walikuwa wakiulizana, “Ni nani atakayetuondolea jiwe kwenye mlango wa kaburi?” 4Walipotazama, waliona kwamba jiwe lilikuwa limekwisha kuvingirishwa, nalo lilikuwa jiwe kubwa sana. 5Walipoingia ndani ya kaburi, walimkuta kijana ameketi upande wa kulia, amevaa vazi jeupe, wakashtuka mno. 6Lakini yeye akawaambia, “Msitishike. Mnamtafuta Yesu wa Nazareti, aliyesulubiwa. Amefufuliwa; hayuko hapa. Angalieni, hapa ndipo mahali walipomlaza. 7Basi nendeni mkawaambie wanafunzi wake, na Petro pia, kwamba anatangulia mbele yenu kwenda Galilaya. Huko mtamwona, kama alivyowaambia.” 8Wakatoka, wakakimbia kutoka kaburini, wakitetemeka na wakiwa wamechanganyikiwa. Hawakumwambia mtu yeyote chochote, kwa sababu waliogopa. [Waliwapa Petro na wenzake taarifa fupi ya yote waliyoambiwa. Baada ya hayo Yesu mwenyewe alituma kupitia wao, kutoka mashariki hadi magharibi, ujumbe mtakatifu usioharibika wa wokovu wa milele. Amina.]

9[Baada ya kufufuka, asubuhi na mapema siku ya kwanza ya juma, alijionyesha kwanza kwa Mariamu Magdalene. Yeye ndiye ambaye Yesu alikuwa amemtoa pepo saba. 10Alikwenda, akawapelekea habari wale waliokuwa pamoja naye, ambao walikuwa wakiomboleza na kulia. 11Lakini waliposikia kwamba yu hai na kwamba Mariamu alikuwa amemwona, hawakukubali kuamini.

12Baada ya hayo aliwatokea wawili kati yao kwa sura tofauti, walipokuwa njiani wakienda mashambani. 13Hao wawili walirudi, wakawaambia wale wengine, lakini nao hawakuwaamini.

14Baadaye aliwatokea wale kumi na mmoja wenyewe walipokuwa wakila. Akawakemea kwa sababu ya kutokuamini kwao na ukaidi wa mioyo yao, kwa kuwa hawakuwaamini wale waliokuwa wamemwona amefufuliwa. 15Akawaambia, “Nendeni katika ulimwengu wote, mkatangaze Injili kwa viumbe vyote. 16Kila aliyeamini na kubatizwa ataokolewa; yeyote anayekataa kuamini atahukumiwa. 17Ishara hizi zitaambatana na wale wanaoamini: kwa jina langu watawafukuza pepo na kunena kwa ndimi mpya; 18watawainua nyoka; wakimeza sumu yoyote ya kuua, haitawadhuru; wataweka mikono yao juu ya wagonjwa, na wagonjwa hao watapata nafuu.”

19Kwa hiyo Bwana Yesu, alipokwisha kuzungumza nao, alipandishwa juu mbinguni, akaketi mkono wa kuume wa Mungu. 20Hao walitoka, wakahubiri ujumbe kila mahali. Bwana alishirikiana nao katika kazi, akalithibitisha neno kwa ishara zilizoambatana nalo.]