Marko 10

1Yesu aliondoka pale, akaenda katika wilaya za Uyahudi na nchi iliyo ng’ambo ya Yordani. Umati wa watu ukakusanyika tena kwake, naye akawafundisha tena, kama ilivyokuwa desturi yake.

2Watu fulani walimwuliza kama sheria inamruhusu mume kumpa mke wake talaka. Walikuwa wakijaribu kumnasa. 3Akawajibu kwa swali: “Musa aliwaamuru nini?” 4Wakasema, “Musa alimruhusu mume amwandikie mke wake hati ya talaka, kisha amwache.” 5Lakini Yesu akawaambia, “Ni kwa sababu mioyo yenu ilikuwa migumu ndiyo maana Musa aliwaandikia amri hii. 6Lakini hapo mwanzo, ulimwengu ulipoumbwa, Mungu aliwaumba mwanamume na mwanamke. 7‘Hii ndiyo sababu mwanamume atawaacha baba yake na mama yake na kuungana na mke wake, 8nao wawili watakuwa mwili mmoja.’ Basi hawako tena wawili, bali mwili mmoja. 9Kwa hiyo, kile ambacho Mungu amekifunga pamoja kama kwa nira, binadamu yeyote asikitenganishe.”

10Walipokuwa nyumbani tena, wanafunzi walimwuliza juu ya jambo hilo. 11Akawaambia, “Mwanamume anayempa mke wake talaka na kuoa mwanamke mwingine anazini dhidi ya mke wake. 12Na mwanamke anayempa mume wake talaka na kuolewa na mwanamume mwingine anazini.”

13Watu walikuwa wakimletea watoto wadogo ili awaguse, lakini wanafunzi wakawakaripia. 14Yesu alipoona hivyo, alikasirika, akawaambia, “Waruhusuni watoto waje kwangu. Msijaribu kuwazuia, kwa sababu ufalme wa Mungu ni wa watu walio kama wao. 15Kweli nawaambia, mtu yeyote asiyeupokea ufalme wa Mungu kama mtoto anavyoupokea, hataingia ndani yake kamwe.” 16Kisha akawakumbatia watoto, akaweka mikono yake juu yao, akawabariki.

17Yesu alipokuwa akianza safari yake, mtu mmoja alimkimbilia, akapiga magoti mbele yake, akamwuliza, “Mwalimu mwema, ninapaswa kufanya nini ili niupate uzima wa milele kama urithi?” 18Yesu akamjibu, “Kwa nini unaniita mwema? Hakuna mtu aliye mwema, ila Mungu peke yake. 19Unajua amri zinavyosema: ‘Usiue. Usizini. Usiibe. Usitoe ushahidi wa uongo. Usimdhulumu mtu. Waheshimu baba yako na mama yako.’” 20“Mwalimu,” akajibu, “nimezitii amri hizi zote tangu nilipokuwa mvulana.” 21Yesu akamtazama kwa makini, akampenda. Akamwambia, “Bado unakosa jambo moja. Nenda ukauze mali yako yote, uwagawie maskini fedha hizo. Ndipo utakuwa na hazina mbinguni. Baada ya hapo, njoo unifuate.” 22Aliposikia maneno hayo, uso wake ulionyesha huzuni, akaondoka akiwa amesikitika, kwa sababu alikuwa na mali nyingi.

23Yesu akatazama pande zote, akawaambia wanafunzi wake, “Itakuwa vigumu kama nini kwa watu wenye mali kuingia katika ufalme wa Mungu!” 24Wanafunzi wakastaajabu kwa yale aliyosema. Lakini Yesu akawaambia tena, “Wanangu, ni vigumu kama nini kuingia katika ufalme wa Mungu! 25Ngamia angepita katika tundu la sindano kwa urahisi zaidi kuliko mtu tajiri angeweza kuingia katika ufalme wa Mungu.” 26Walishangaa sana, wakaulizana, “Kama ndivyo, ni nani basi atakayeokolewa?” 27Yesu akawatazama moja kwa moja, akasema, “Kwa wanadamu jambo hili haliwezekani, lakini kwa Mungu sivyo. Mungu anaweza kufanya lolote.”

28Petro akasema, “Angalia, sisi tumeacha kila kitu ili tukufuate!” 29Yesu akasema, “Kweli nawaambia, mtu yeyote aliyeacha nyumba, kaka au dada, mama au baba, watoto au mashamba kwa ajili yangu na kwa ajili ya Injili, 30atapokea mara mia zaidi sasa katika wakati huu wa sasa: nyumba, kaka, dada, akina mama, watoto na mashamba, pamoja na mateso. Na katika enzi inayokuja atapokea uzima wa milele. 31Hata hivyo, wengi walio wa kwanza sasa wataishia kuwa wa mwisho, na walio wa mwisho watakuwa wa kwanza.”

32Walikuwa njiani wakipanda kwenda Yerusalemu, na Yesu alikuwa akiwatangulia. Wanafunzi walishangaa, na wengine waliokuwa wakifuata waliogopa. Akawachukua tena wale Kumi na Wawili kando, akaanza kuwaeleza mambo yaliyokuwa karibu kumpata. 33Akasema, “Sasa tunapanda kwenda Yerusalemu, na huko Mwana wa Adamu atakabidhiwa kwa wakuu wa makuhani na waandishi. Watamhukumu adhabu ya kifo na kumkabidhi kwa watu wa mataifa. 34Watamfanyia mzaha, watamtemea mate, watampiga mijeledi na kumwua; na siku tatu baadaye atafufuka.”

35Kisha Yakobo na Yohana, wana wa Zebedayo, wakamjia, wakasema, “Mwalimu, tungependa utufanyie chochote tutakachokuomba.” 36“Mngependa niwafanyie nini?” akawauliza. 37Wakamjibu, “Utakapokuwa katika utukufu wako, utujalie mmoja wetu aketi upande wako wa kulia na mwingine upande wako wa kushoto.” 38Yesu akawaambia, “Hamjui mnachoomba. Je, mnaweza kunywa kikombe ninachokinywa, au kubatizwa kwa ubatizo ninaoupitia?” 39“Tunaweza,” wakamjibu. Yesu akawaambia, “Kikombe ninachokinywa mtakinywa, na ubatizo ninaoupitia mtabatizwa nao. 40Lakini kuketi upande wangu wa kulia au wa kushoto si langu kutoa. Nafasi hizo ni za wale ambao zimeandaliwa kwa ajili yao.”

41Wale kumi wengine waliposikia habari hiyo, wakawakasirikia Yakobo na Yohana. 42Yesu akawaita kwake, akawaambia, “Mnajua kwamba wale wanaohesabiwa kuwa watawala wa mataifa huwatawala watu wao kwa mabavu, na wakubwa wao huwaonyesha mamlaka yao. 43Lakini kati yenu haiko hivyo. Badala yake, yeyote kati yenu anayetaka kuwa mkuu lazima awe mtumishi wenu, 44na yeyote kati yenu anayetaka kuwa wa kwanza lazima awe mtumwa wa wote. 45Kwa kuwa Mwana wa Adamu mwenyewe hakuja ili wengine wamtumikie, bali kuwatumikia na kutoa uhai wake kama gharama ya fidia badala ya wengi.”

46Kisha wakafika Yeriko. Alipokuwa akitoka Yeriko pamoja na wanafunzi wake na umati mkubwa wa watu, Bartimayo mwana wa Timayo, kipofu mwombaji, alikuwa ameketi kando ya njia. 47Aliposikia kwamba ni Yesu wa Nazareti, alianza kupiga kelele, “Mwana wa Daudi, Yesu, unihurumie!” 48Watu wengi walimkemea, wakamwambia anyamaze, lakini yeye akazidi kupiga kelele, “Mwana wa Daudi, unihurumie!” 49Yesu akasimama, akasema, “Mwiteni aje.” Basi wakamwita yule kipofu, wakamwambia, “Jipe moyo! Simama! Anakuita.” 50Akalitupa joho lake, akasimama upesi, akaja kwa Yesu. 51Yesu akamjibu, “Ungependa nikufanyie nini?” Yule kipofu akamwambia, “Rabuni, nataka kuona tena.” 52Yesu akamwambia, “Nenda. Imani yako imekuokoa na kukuponya.” Mara moja aliweza kuona tena, akamfuata njiani.