Marko 3

1Kwa mara nyingine aliingia katika sinagogi. Huko kulikuwa na mtu ambaye mkono wake ulikuwa umekauka. 2Walikuwa wakimvizia Yesu, waone kama angemponya mtu huyo siku ya Sabato, ili wapate sababu ya kumshtaki. 3Yesu akamwambia yule mtu mwenye mkono uliokauka, “Simama, uje hapa mbele.” 4Kisha akawauliza, “Sheria inaruhusu nini siku ya Sabato: kutenda mema au kutenda mabaya, kuokoa maisha ya mtu au kuua?” Wao hawakusema neno. 5Akawatazama pande zote kwa hasira, akihuzunika sana kwa sababu mioyo yao ilikuwa migumu, akamwambia yule mtu, “Nyoosha mkono wako.” Akaunyoosha, nao ukapona, ukawa mzima tena. 6Mafarisayo walitoka, na mara moja wakaanza kupanga shauri pamoja na wafuasi wa Herode jinsi ya kumwangamiza Yesu.

7Yesu aliondoka pamoja na wanafunzi wake wakaenda baharini, na umati mkubwa wa watu kutoka Galilaya ukawafuata. 8Watu wengi sana pia walisikia habari za mambo yote aliyokuwa akiyafanya, wakaja kwake kutoka Uyahudi na Yerusalemu, kutoka Idumaya na nchi ya ng’ambo ya Yordani, na kutoka maeneo ya kandokando ya Tiro na Sidoni. 9Kwa sababu ya umati wa watu, aliwaambia wanafunzi wake wamwekee tayari mashua ndogo, ili watu wasimsonge. 10Alikuwa amewaponya watu wengi, kwa hiyo wote waliokuwa na maradhi walikuwa wakimsongea ili wamguse. 11Kila mara pepo wachafu walipomwona, walijitupa chini mbele yake na kupiga kelele, “Wewe ni Mwana wa Mungu!” 12Lakini aliwaamuru kwa ukali wasimfanye ajulikane.

13Kisha alipanda vilimani, akawaita wale aliowataka, nao wakaja kwake. 14Aliwaweka kumi na wawili ili wawe pamoja naye, na ili awatume kuhubiri ujumbe 15wakiwa na mamlaka ya kufukuza pepo. 16Basi akawaweka wale kumi na wawili. Simoni alimpa jina Petro. 17Yakobo mwana wa Zebedayo na Yohana, ndugu yake Yakobo, aliwaita Boanerge, yaani, “Wana wa Ngurumo.” 18Kisha kulikuwa na Andrea na Filipo, Bartholomayo na Mathayo, Tomaso na Yakobo mwana wa Alfayo, Thadayo na Simoni Mkananayo, 19na Yuda Iskariote, ambaye baadaye alimsaliti.

20Kisha akaenda nyumbani, na tena umati mkubwa ukakusanyika, hata wao hawakuweza hata kula chakula. 21Watu wa familia yake waliposikia habari hizi, walitoka kwenda kumchukua kwa nguvu, kwa sababu walikuwa wakisema, “Amerukwa na akili.” 22Waandishi waliokuwa wameshuka kutoka Yerusalemu walidai, “Amepagawa na Beelzebuli!” na, “Ni kwa nguvu za mkuu wa pepo anafukuza pepo!” 23Basi akawaita, akasema nao kwa mifano: “Shetani anawezaje kumfukuza Shetani? 24Ufalme ukigawanyika makundi yanayopigana wenyewe kwa wenyewe, hauwezi kudumu. 25Familia ikigawanyika na kupigana yenyewe kwa yenyewe, haitaweza kudumu. 26Basi ikiwa Shetani ameasi dhidi yake mwenyewe na amegawanyika, hawezi kudumu; mwisho wake umefika. 27Kwa kweli, hakuna mtu anayeweza kuvunja na kuingia katika nyumba ya mtu mwenye nguvu na kuchukua mali zake bila kumfunga kwanza. Hapo tu ndipo anaweza kuipora nyumba yake.

28Kweli nawaambia, wanadamu watasamehewa dhambi zao zote na makufuru yao yote, hata yawe mengi namna gani. 29Lakini mtu yeyote atakayemkufuru Roho Mtakatifu hatasamehewa kamwe; mtu huyo ana hatia ya dhambi ya milele.” 30Yesu alisema hivyo kwa sababu walikuwa wakidai, “Ana pepo mchafu.”

31Kisha mama yake na ndugu zake wakafika. Wakasimama nje, wakatuma ujumbe ndani, wakimwita. 32Umati wa watu ulikuwa umeketi kumzunguka, nao wakamwambia, “Tazama, mama yako na ndugu zako wako nje, wanakutaka.” 33Akawajibu, “Mama yangu ni nani? Ndugu zangu ni akina nani?” 34Akawatazama watu waliokuwa wameketi kumzunguka, akasema, “Tazameni, hawa ndio mama yangu na ndugu zangu! 35Mtu yeyote anayefanya mapenzi ya Mungu ndiye ndugu yangu, dada yangu na mama yangu.”