Marko 6

1Yesu aliondoka mahali pale, akaenda katika mji wake wa nyumbani, na wanafunzi wake wakaenda pamoja naye. 2Sabato ilipofika, alianza kufundisha katika sinagogi, na wengi waliomsikia walishangaa sana. Wakasema, “Mtu huyu amepata wapi mambo haya yote? Ni hekima gani hii aliyopewa? Na matendo haya makuu yanayofanywa kwa mikono yake ni ya namna gani?” 3Je, yeye si yule seremala, mwana wa Mariamu, na ndugu wa Yakobo, Yose, Yuda na Simoni? Na je, dada zake hawaishi hapa kati yetu? Wakachukizwa naye. 4Yesu akawaambia, “Nabii huheshimiwa kila mahali, isipokuwa katika mji wake mwenyewe, kati ya jamaa zake, na katika familia yake.” 5Huko hakuweza kufanya tendo lolote kuu, isipokuwa kuweka mikono yake juu ya wagonjwa wachache na kuwaponya. 6Kutoamini kwao kulimshangaza. Kisha akapita kijiji kwa kijiji katika eneo lile, akifundisha. 7Akawaita wale Kumi na Wawili kwake, akaanza kuwatuma wawili wawili, akiwapa mamlaka juu ya pepo wachafu. 8Akawaagiza wasichukue chochote kwa safari isipokuwa fimbo ya kutembelea: wasichukue chakula, wala mkoba wa msafiri, wala fedha mishipini mwao. 9Walitakiwa wavae ndara. Akasema, “Wala msivae kanzu ya pili.” 10Akawaambia, “Mkiingia katika nyumba yoyote, kaeni humo mpaka mtakapoondoka katika mji ule. 11Mahali ambapo watu hawatawakaribisha wala kusikiliza mnachosema, mnapoondoka, kung’uteni vumbi la miguu yenu, liwe ushuhuda dhidi yao.”

12Basi wakaenda, wakawaita watu watubu. 13Wakatoa pepo wengi, na wakawapaka mafuta wagonjwa wengi, wakawaponya.

14Mfalme Herode alisikia habari hizi, kwa maana jina la Yesu lilikuwa limejulikana kila mahali. Watu walikuwa wakisema, “Yohana Mbatizaji amefufuliwa kutoka kwa wafu. Ndiyo sababu nguvu hizi zinatenda kazi ndani yake.” 15Wengine walisema, “Ni Eliya,” na wengine tena, “Ni nabii, kama wale manabii wa zamani.” 16Lakini Herode aliposikia habari hizo, alisema, “Ni Yohana, yule mtu niliyemkata kichwa. Amefufuliwa!”

17Herode mwenyewe ndiye aliyekuwa ametuma watu kumkamata Yohana na kumfunga gerezani. Alifanya hivyo kwa sababu ya Herodia, mke wa ndugu yake Filipo, kwa kuwa alikuwa amemwoa. 18Yohana alikuwa amemwambia Herode mara kwa mara, “Sheria haikuruhusu kumchukua mke wa ndugu yako.” 19Basi Herodia alimwekea Yohana kinyongo, akataka auawe, lakini hakuweza kufanikisha hilo, 20kwa sababu Herode alimcha Yohana. Alijua kwamba Yohana ni mtu mwenye haki na mtakatifu, kwa hiyo alimlinda. Kila alipomsikiliza Yohana, alifadhaika sana, lakini bado alipenda kumsikiliza.

21Hatimaye Herodia alipata nafasi yake. Herode alifanya karamu siku ya kuzaliwa kwake, akawaalika wakuu wa baraza lake, maafisa wa jeshi lake, na watu mashuhuri wa Galilaya. 22Binti yake Herodia mwenyewe aliingia akacheza ngoma, naye akawafurahisha Herode na wageni wake waliokuwa mezani. Basi mfalme akamwambia msichana, “Niombe chochote unachotaka, nami nitakupa.” 23Hata akamwapia kiapo: “Kitu chochote utakachoniomba nitakupa, hata kama ni nusu ya ufalme wangu.” 24Msichana akatoka, akamwendea mama yake, akasema, “Niombe nini?” Mama yake akajibu, “Kichwa cha Yohana Mbatizaji.” 25Mara moja akarudi haraka kwa mfalme, akatoa ombi lake: “Nataka kichwa cha Yohana Mbatizaji katika sinia, na ninakitaka sasa hivi.” 26Jambo hili lilimhuzunisha mfalme sana. Lakini alikuwa ameapa mbele ya wageni wake, naye hakutaka kuvunja ahadi yake kwake. 27Mara moja mfalme akamtuma mmoja wa walinzi wake na amri ya kuleta kichwa cha Yohana. Askari huyo akaenda, akamkata Yohana kichwa gerezani. 28Akakileta kichwa katika sinia, akampa msichana, naye msichana akampa mama yake. 29Wanafunzi wa Yohana waliposikia habari hiyo, walikuja kuuchukua mwili wake, wakauzika kaburini.

30Mitume walirudi kwa Yesu, wakampa taarifa ya yote waliyofanya na yote waliyofundisha. 31Akawaambia, “Njooni peke yenu mahali patulivu pasipo na watu, mkapumzike kidogo.” Watu walikuwa wakija na kuondoka bila kukoma, hata hawakupata nafasi ya kula. 32Basi wakaondoka kwa mashua peke yao, wakaenda mahali pa faragha. 33Lakini watu wengi waliwaona wakiondoka, wakawatambua. Watu kutoka miji yote wakaenda mbio huko kwa miguu, wakafika kabla yao. 34Yesu aliposhuka pwani, aliona umati mkubwa. Akawaonea huruma kutoka ndani ya moyo, kwa sababu walikuwa kama kondoo ambao hawana mchungaji. Kwa hiyo akaanza kuwafundisha kwa muda mrefu.

35Siku ilipokuwa imekwenda sana, wanafunzi wake walimjia, wakasema, “Hakuna mtu anayeishi huku, na saa zimekwenda. 36Uwaruhusu watu waende zao, ili wapate kwenda katika mashamba na vijiji vilivyo karibu wajinunulie chakula.” 37Lakini yeye akawajibu, “Ninyi wenyewe wapeni chakula.” Wakamwambia, “Je, twende tukanunue mikate ya mshahara wa zaidi ya nusu mwaka, tuwape wale?” 38Akawauliza, “Mna mikate mingapi? Nendeni mkaangalie.” Walipokwisha kujua, wakamwambia, “Mitano, na samaki wawili.” 39Kisha akawaamuru wawaketishe watu wote katika makundi kwenye nyasi za kijani, kama wageni wanaoketi kula pamoja. 40Basi wakaketi katika makundi kama matuta ya bustani, makundi ya watu mia mia na hamsini hamsini. 41Yesu aliichukua ile mikate mitano na samaki wawili, akatazama juu mbinguni, akatamka baraka. Kisha akaimega mikate, akawa akiwapa wanafunzi tena na tena ili wawagawie watu. Na wale samaki wawili akawagawia wote. 42Wote walikula mpaka wakashiba. 43Kisha wakakusanya vipande vya mikate vilivyobaki, vikajaa vikapu kumi na viwili, na vipande vya samaki pia. 44Wanaume waliokula mikate ile walikuwa elfu tano.

45Mara moja Yesu aliwahimiza wanafunzi wake wapande mashua na kumtangulia kwenda Bethsaida, ng’ambo ya pili, wakati yeye akiuaga umati. 46Baada ya kuwaaga, alikwenda mlimani kuomba.

47Jioni ilipofika, mashua ilikuwa mbali katikati ya bahari, na Yesu alikuwa peke yake nchi kavu. 48Aliwaona wakihangaika kupiga makasia, kwa sababu upepo ulikuwa ukivuma kinyume chao. Karibu na mwisho wa usiku, katika zamu ya nne, akawaendea akitembea juu ya bahari. Alikusudia kuwapita. 49Walipomwona akitembea juu ya bahari, walidhani ni mzimu, wakapiga yowe kwa hofu, 50kwa sababu wote walimwona, wakatetemeka. Lakini mara moja aliongea nao. Akasema, “Jipeni moyo! Ni mimi. Acheni kuogopa.” 51Kisha akaingia mashuani pamoja nao, na upepo ukatulia. Wakastaajabu kupita kiasi, 52kwa sababu hawakuwa wameelewa maana ya ile mikate. Mioyo yao ilikuwa imeshupazwa.

53Walipokwisha kuvuka bahari, walifika pwani huko Genesareti, wakaifunga mashua. 54Mara tu walipotoka mashuani, watu walimtambua. 55Wakakimbia kila mahali katika eneo lile lote, wakaanza kuwabeba wagonjwa juu ya mikeka yao na kuwapeleka popote waliposikia kwamba yupo. 56Kila alipoingia, iwe vijijini, mijini au mashambani, watu waliwaweka wagonjwa wao kwenye viwanja vya soko, wakamsihi awaruhusu waguse angalau upindo wa vazi lake. Kila aliyemgusa alipona.