Marko 7

1Mafarisayo walikusanyika kumzunguka Yesu, pamoja na baadhi ya waandishi waliokuwa wamekuja kutoka Yerusalemu. 2Walikuwa wameona kwamba baadhi ya wanafunzi wake walikuwa wakila chakula kwa mikono najisi, yaani, mikono isiyooshwa. 3(Mafarisayo, na kwa kweli Wayahudi wote, hawali chakula bila kunawa mikono kwa taratibu za kidini; kwa njia hiyo wanashika mapokeo ya wazee. 4Wanapotoka sokoni hawali kabla ya kujiosha. Pia wanashikilia desturi nyingine nyingi walizopokezwa, kama vile kuosha vikombe, mitungi, vyungu vya shaba na vitanda vya kuegemea wakati wa kula.) 5Basi Mafarisayo na waandishi wakamwuliza Yesu, “Kwa nini wanafunzi wako hawaishi kufuatana na mapokeo ya wazee? Kwa nini wanakula kwa mikono najisi?” 6Akawajibu, “Isaya alitabiri sawasawa kabisa kuhusu ninyi wanafiki! Kama ilivyoandikwa: ‘Watu hawa hunipa heshima kwa midomo yao, ilhali mioyo yao imekaa mbali nami. 7Ibada yao kwangu haina maana, kwa kuwa amri zilizotungwa na wanadamu wanazifundisha kana kwamba ni mafundisho ya Mungu.’ 8Mnaweka kando kile ambacho Mungu ameamuru, na kushikilia mapokeo ambayo ni ya kibinadamu tu.”

9Akaendelea kusema, “Ninyi ni hodari kweli wa kuiweka kando amri ya Mungu ili mshike mapokeo yenu wenyewe! 10Kwa maana Musa alisema, ‘Mheshimu baba yako na mama yako,’ na tena, ‘Mtu anayemtukana baba au mama yake na auawe.’ 11Lakini ninyi mnafundisha kwamba mtu akimwambia baba au mama yake, ‘Msaada wowote ambao ungepata kutoka kwangu ni Korbani’ (maana yake, sadaka iliyotolewa kwa Mungu), 12basi hammruhusu tena kufanya chochote kwa ajili ya baba au mama yake. 13Mnalifanya neno la Mungu kuwa bure kwa ajili ya mapokeo mnayoyapokezana, na mnafanya mambo mengine mengi ya namna hiyo.”

14Kisha akauita umati tena uje kwake, akasema, “Nisikilizeni, kila mmoja wenu, mwelewe jambo hili: 15Hakuna kitu kilicho nje ya mtu kinachoweza kumfanya najisi kwa kuingia ndani yake. Kinachotoka ndani ya mtu ndicho kinachomfanya mtu kuwa najisi.”

17Alipokwisha kuuacha umati na kuingia nyumbani, wanafunzi wake walimwuliza maana ya mfano huo. 18Akawaambia, “Je, hata ninyi ni wazito hivyo wa kuelewa? Je, hamwoni kwamba hakuna kitu kinachoingia ndani ya mtu kutoka nje kinachoweza kumfanya najisi? 19Hakiingii moyoni mwake bali tumboni, na kutoka hapo kinatoka nje chooni.” Kwa kusema hivyo, Yesu alivifanya vyakula vyote kuwa safi. 20Akaendelea kusema, “Kinachotoka ndani ya mtu ndicho kinachomfanya mtu najisi. 21Kutoka ndani ya moyo wa mwanadamu hutoka mipango mibaya, uasherati, wizi, mauaji, 22uzinzi, tamaa, uovu, udanganyifu, tabia isiyo na aibu, husuda, masingizio, majivuno, na upumbavu. 23Maovu haya yote yanatoka ndani, nayo ndiyo yanayomfanya mtu najisi.”

24Yesu aliondoka huko, akaenda katika eneo la Tiro. Aliingia katika nyumba moja, na hakutaka mtu yeyote ajue, lakini hakuweza kukaa bila kujulikana. 25Mwanamke mmoja ambaye binti yake mdogo alikuwa na pepo mchafu alisikia habari zake mara moja, akaja, akajitupa chini miguuni pake. 26Mwanamke huyo alikuwa mtu wa mataifa, mzaliwa wa Foinike ya Siria. Akaendelea kumsihi amfukuze pepo kutoka kwa binti yake. 27Akamwambia, “Watoto lazima walishwe kwanza mpaka washibe. Si haki kuchukua mkate wa watoto na kuwatupia mbwa wadogo.” 28Mwanamke akajibu, “Bwana, hata mbwa wadogo walio chini ya meza hupata kula makombo yanayoangushwa na watoto.” 29Akamwambia, “Kwa sababu ya jibu lako hilo, nenda zako. Pepo amekwisha kumtoka binti yako.” 30Aliporudi nyumbani, alimkuta binti yake mdogo amelala kitandani, na pepo alikuwa ametoka.

31Kisha akaondoka tena katika eneo la Tiro, akapitia Sidoni hadi Bahari ya Galilaya, akaingia eneo la Dekapoli. 32Wakamletea mtu kiziwi ambaye pia alikuwa na shida ya kusema, wakamsihi aweke mkono wake juu yake. 33Yesu akamchukua kando, mbali na umati, wawe peke yao. Akaingiza vidole vyake masikioni mwa mtu huyo, akatema mate, akaugusa ulimi wake. 34Kisha akatazama juu mbinguni, akaugua, akamwambia, “Efatha,” maana yake, “Funguka.” 35Masikio yake yakafunguka, ulimi wake ukaachiliwa kutoka kwa kile kilichoufunga, naye akasema waziwazi. 36Yesu akawaagiza wasimwambie mtu yeyote. Lakini kadiri alivyozidi kuwaagiza hivyo, ndivyo walivyozidi kueneza habari hiyo kwa bidii. 37Watu walishangaa mno. Wakasema, “Kila kitu amekitenda vyema kabisa! Anawapa viziwi uwezo wa kusikia, na bubu uwezo wa kusema!”