Marko 8

1Katika siku hizo umati mkubwa ulikusanyika tena, nao hawakuwa na chakula. Basi Yesu akawaita wanafunzi wake, akawaambia, 2“Ninawaonea huruma sana watu hawa. Wamekuwa nami kwa siku tatu sasa, nao hawana chochote kilichobaki cha kula. 3Nikiwaaga waende nyumbani bila kula, wataishiwa nguvu njiani. Baadhi yao wamesafiri kutoka mbali.” 4Wanafunzi wake wakajibu, “Huku nyikani, mtu angepata wapi mikate ya kutosha kuwashibisha watu wote hawa?” 5Akawauliza, “Mna mikate mingapi?” “Saba,” wakajibu. 6Akauagiza umati wa watu uketi chini. Akaichukua ile mikate saba, akashukuru, akaimega, akawa akiwapa wanafunzi wake waigawe, nao wakawagawia watu. 7Walikuwa pia na samaki wadogo wachache. Akawabariki, akawaambia wanafunzi wawagawe hao pia. 8Watu wote wakala, wakashiba. Kisha wakakusanya vipande vilivyobaki, vikajaza makapu makubwa saba. 9Watu waliokuwapo walikuwa kama elfu nne. Kisha akawaaga waende zao. 10Mara moja akapanda mashua pamoja na wanafunzi wake, akaenda sehemu za Dalmanutha.

11Mafarisayo walikuja, wakaanza kubishana naye. Walidai awaonyeshe ishara kutoka mbinguni, ili wamjaribu. 12Akaugua kutoka ndani ya roho yake, akasema, “Kwa nini watu wa kizazi hiki wanatafuta ishara? Kweli nawaambia, kizazi hiki hakitapewa ishara yoyote kamwe.” 13Akawaacha, akapanda mashua tena, akaenda ng’ambo ya pili.

14Wanafunzi walikuwa wamesahau kuchukua mikate. Walikuwa na mkate mmoja tu mashuani. 15Akawaonya, “Kuweni macho! Jihadharini na hamira ya Mafarisayo na hamira ya Herode.” 16Wakaanza kujadiliana wao kwa wao: hawakuwa na mikate. 17Yesu alijua walichokuwa wakisema, akawaambia, “Kwa nini mnazungumza juu ya kutokuwa na mikate? Bado hamwoni wala hamwelewi? Je, mioyo yenu imekuwa migumu? 18Mna macho; je, hamwezi kuona? Mna masikio; je, hamwezi kusikia? Je, hamkumbuki? 19Nilipoimega mikate mitano kwa watu elfu tano, mlikusanya vikapu vingapi vya vipande vilivyobaki?” “Kumi na viwili,” wakamjibu. 20“Na nilipoimega mikate saba kwa watu elfu nne, mlikusanya makapu makubwa mangapi ya vipande?” “Saba,” wakasema. 21Akawaambia, “Na bado hamwelewi?” 22Wakafika Bethsaida. Watu fulani wakamletea kipofu mmoja, wakamsihi amguse. 23Akamshika kipofu mkono, akampeleka nje ya kijiji. Kisha akatema mate machoni pake, akaweka mikono yake juu yake, akamwuliza, “Unaweza kuona kitu chochote?” 24Mtu huyo akatazama juu, akasema, “Ninaona watu, lakini kwangu wanaonekana kama miti inayotembea.” 25Kisha Yesu akaweka mikono yake juu ya macho ya mtu huyo tena. Mtu huyo akakaza macho, kuona kwake kukarudi, naye akaweza kuona kila kitu waziwazi. 26Yesu akamtuma aende nyumbani kwake, akimwambia, “Usikanyage hata kijijini.”

27Yesu na wanafunzi wake walikwenda kwenye vijiji vya eneo la Kaisaria ya Filipo. Walipokuwa njiani, aliwauliza, “Watu wanasema mimi ni nani?” 28Wakajibu, “Wengine wanasema Yohana Mbatizaji; wengine, Eliya; na wengine, mmoja wa manabii.” 29“Na ninyi je,” akawauliza, “mnasema mimi ni nani?” Petro akajibu, “Wewe ndiwe Kristo.” 30Akawaagiza kwa ukali wasimwambie mtu yeyote habari zake.

31Kisha akaanza kuwafundisha kwamba ilimpasa Mwana wa Adamu kupitia mateso makubwa, kukataliwa na wazee, wakuu wa makuhani na waandishi, kuuawa, na kufufuka baada ya siku tatu. 32Aliyasema mambo hayo waziwazi kabisa. Petro akamvuta kando, akaanza kumkemea. 33Lakini Yesu akageuka, akawatazama wanafunzi wake, akamkemea Petro. “Rudi nyuma yangu, Shetani!” akasema. “Mawazo yako hayako kwenye mambo anayojali Mungu, bali kwenye mambo wanayojali wanadamu.”

34Kisha akauita umati pamoja na wanafunzi wake, akawaambia, “Mtu yeyote anayetaka kuja nyuma yangu ni lazima ajikatae mwenyewe, abebe msalaba wake, na anifuate. 35Mtu anayeshikilia kuulinda uhai wake ataupoteza, na mtu anayeupoteza uhai wake kwa ajili yangu na kwa ajili ya Injili atauokoa. 36Mtu anapata faida gani kwa kuushinda ulimwengu wote, ikiwa itamgharimu uhai wake? 37Mtu angeweza kutoa nini ili kuukomboa uhai wake? 38Mtu yeyote anayenionea aibu mimi na maneno yangu, hapa kati ya kizazi hiki cha uzinzi na dhambi, Mwana wa Adamu naye atamwonea aibu, atakapokuja pamoja na malaika watakatifu katika utukufu wa Baba yake.”