Marko 13

1Yesu alipokuwa akitoka hekaluni, mmoja wa wanafunzi wake alimwambia kwa mshangao, “Mwalimu, tazama! Mawe makubwa kama nini! Majengo mazuri kama nini!” 2Yesu akamjibu, “Unayaona majengo haya makubwa? Hapa halitabaki hata jiwe moja juu ya jiwe jingine. Kila moja litabomolewa.”

3Baadaye, alipokuwa ameketi katika Mlima wa Mizeituni akilitazama hekalu, wanne kati yao, Petro, Yakobo, Yohana na Andrea, walimwuliza swali faraghani: 4“Tuambie, mambo haya yatatokea lini? Na kutakuwa na ishara gani wakati yote yatakapokaribia kufikia ukamilifu wake?” 5Yesu akaanza kuwaambia, “Jihadharini, mtu yeyote asije akawapotosha. 6Wengi watakuja wakitumia jina langu na kusema, ‘Mimi ndiye,’ nao watawapotosha watu wengi. 7Mtakaposikia habari za vita, na tetesi za vita vilivyo mbali, msifadhaike. Mambo hayo hayana budi kutokea, lakini huo bado si mwisho. 8Taifa litapigana na taifa, na ufalme na ufalme. Matetemeko ya ardhi yatatokea mahali pamoja baada ya pengine, na kutakuwa na njaa. Yote haya ni mwanzo tu wa utungu wa kuzaa. 9Lakini ninyi, jihadharini. Watu watawakabidhi kwa mabaraza, nanyi mtachapwa viboko katika masinagogi. Mtasimama mbele ya wakuu wa mikoa na wafalme kwa ajili yangu, ili mwe mashahidi mbele yao. 10Na kwanza Injili haina budi kuhubiriwa kwa mataifa yote. 11Watakapowachukua ili kuwakabidhi, msiwe na wasiwasi mapema juu ya mtakalosema. Maneno yoyote mtakayopewa saa ile, yasemeni hayo. Si ninyi mtakaokuwa mkisema, bali ni Roho Mtakatifu. 12Ndugu atamkabidhi ndugu yake auawe, na baba atamkabidhi mtoto wake. Watoto watawaasi wazazi wao na kuwafanya wauawe. 13Watu wote watawachukia kwa sababu ya jina langu. Lakini mtu atakayestahimili hadi mwisho ataokolewa.

14Lakini mtakapomwona ‘chukizo linaloleta maangamizi’ amesimama mahali ambapo hana haki ya kuwa (msomaji na azingatie), basi wale walio Uyahudi wakimbilie milimani. 15Aliye juu ya paa asishuke kuingia nyumbani kuchukua kitu chochote. 16Aliye shambani asirudi kuchukua koti lake. 17Itakuwa vibaya mno siku hizo kwa wanawake wenye mimba na wale wanaonyonyesha! 18Ombeni jambo hili lisitokee wakati wa majira ya baridi. 19Kwa maana siku hizo zitaleta dhiki ambayo haijapata kutokea tangu mwanzo, Mungu alipoumba ulimwengu, hadi sasa, wala haitatokea tena kamwe. 20Kama Bwana asingezifupisha siku hizo, hakuna mtu hata mmoja angenusurika. Lakini kwa ajili ya wateule, wale aliowachagua kuwa wake, amezifupisha siku hizo. 21Wakati huo mtu akiwaambia, ‘Tazameni, Kristo yuko hapa!’ au ‘Tazameni, yuko kule!’ msiamini. 22Kwa maana makristo wa uongo na manabii wa uongo watatokea, nao watafanya ishara na maajabu ili kuwapotosha wateule, kama ingewezekana. 23Kwa hiyo ninyi jihadharini. Nimewaambia yote mapema.

24Lakini katika siku hizo, baada ya wakati ule wa dhiki, jua litatiwa giza na mwezi hautatoa mwanga. 25Nyota zitaanguka kutoka angani, na nguvu zilizo mbinguni zitatikiswa. 26Ndipo watu watamwona Mwana wa Adamu akija katika mawingu, kwa nguvu kuu na utukufu. 27Kisha atawatuma malaika na kuwakusanya wateule kutoka pande zote nne za upepo, kutoka mwisho kabisa wa dunia hadi mwisho kabisa wa anga.

28Jifunzeni mfano huu kutoka kwa mtini. Tawi lake linapoanza kuwa laini na majani yake kuchipua, mnajua kwamba kiangazi kimekaribia. 29Vivyo hivyo nanyi, mtakapoyaona mambo haya yakitokea, jueni kwa hakika kwamba ni karibu, mlangoni kabisa. 30Kweli nawaambia, kizazi hiki hakitapita kamwe kabla mambo haya yote hayajatokea. 31Mbingu na dunia zitatoweka, lakini maneno yangu hayatatoweka kamwe.

32Kuhusu siku ile au saa ile, hakuna anayeijua, wala malaika walio mbinguni, wala Mwana. Ni Baba peke yake anayejua. 33Jihadharini na mkae macho, kwa sababu hamjui wakati huo utafika lini. 34Ni kama mtu anayesafiri mbali na nyumbani. Anaiacha nyumba yake, anawapa watumishi wake mamlaka ya kuisimamia, kila mmoja na kazi yake, na anamwagiza mlinzi wa mlango akeshe. 35Basi kesheni, kwa kuwa hamwezi kujua mwenye nyumba atarudi lini: jioni, usiku wa manane, wakati jogoo anapowika, au alfajiri. 36La sivyo, anaweza kufika ghafla na kuwakuta mmelala. 37Ninachowaambia ninyi, nawaambia watu wote: Kesheni!”