Marko 15

1Kulipopambazuka tu, wakuu wa makuhani walikutana na wazee, waandishi na Baraza Kuu lote, wakafikia uamuzi. Wakamfunga Yesu, wakampeleka, wakamkabidhi kwa Pilato. 2Pilato akamhoji, “Kumbe wewe ndiwe Mfalme wa Wayahudi?” Akamjibu, “Wewe umesema hivyo.” 3Wakuu wa makuhani waliendelea kuleta mashtaka mengi dhidi yake. 4Basi Pilato akamwuliza tena, “Huna jibu lolote? Angalia mashtaka yote haya wanayoleta dhidi yako!” 5Lakini Yesu hakujibu tena neno lolote, na Pilato akastaajabu.

6Ilikuwa desturi yake, wakati wa sikukuu, kuwaachilia huru mfungwa mmoja waliyemchagua wenyewe. 7Mtu mmoja aitwaye Baraba alikuwa gerezani pamoja na waasi waliokuwa wameua watu wakati wa maasi. 8Umati wa watu ukaja, ukaanza kumwomba Pilato awafanyie kama alivyozoea kuwafanyia. 9Pilato akawajibu, “Je, niwaachilie huru Mfalme wa Wayahudi? Ndivyo mnavyotaka?” 10Pilato aliweza kuona kwamba wivu ndio uliowasukuma wakuu wa makuhani kumkabidhi kwake. 11Lakini wakuu wa makuhani waliuchochea umati, ili Pilato awaachilie Baraba badala yake. 12Pilato akasema nao tena, “Basi mnataka nimfanye nini mtu huyu mnayemwita Mfalme wa Wayahudi?” 13Wakapiga kelele kumjibu, “Msulubishe!” 14Pilato akawauliza, “Kwa nini? Amefanya uhalifu gani?” Lakini wao wakazidi kupiga kelele, “Msulubishe!” 15Kwa hiyo Pilato, akitaka kuuridhisha umati, aliwaachilia huru Baraba. Akaamuru Yesu apigwe mijeledi, kisha akamkabidhi ili asulubiwe.

16Askari walimpeleka ndani ya ua wa ikulu, yaani makao makuu ya mkuu wa mkoa, wakakiita pamoja kikosi chote cha askari. 17Wakamvika vazi la zambarau, wakasuka taji kwa matawi ya miiba, wakaiweka juu ya kichwa chake. 18Kisha wakaanza kumsalimu, “Salamu, ee Mfalme wa Wayahudi!” 19Mara kwa mara walimpiga kichwani kwa fimbo, wakamtemea mate, wakapiga magoti mbele yake kumsujudia. 20Walipomaliza kumdhihaki, walimvua lile vazi la zambarau, wakamvika nguo zake. Kisha wakamtoa nje ili wamsulubishe.

21Mtu mmoja aitwaye Simoni, wa Kirene, alikuwa akipita akitoka mashambani; yeye alikuwa baba yao Aleksanda na Rufo. Askari wakamlazimisha aubebe msalaba wa Yesu. 22Walimpeleka Yesu mahali paitwapo Golgotha, maana yake Mahali pa Fuvu. 23Walijaribu kumpa divai iliyotiwa manemane, lakini yeye hakuikubali. 24Kisha wakamsulubisha. Wakagawana nguo zake kwa kuzitupia kura, ili kuona kila mmoja atapata nini.

25Ilikuwa saa tatu asubuhi walipomsulubisha. 26Tangazo la shtaka lake liliandikwa: “Mfalme wa Wayahudi.” 27Pia walisulubisha wanyang’anyi wawili pamoja naye, mmoja upande wake wa kulia na mwingine upande wake wa kushoto.

29Watu waliopita njiani walimtukana, wakitikisa vichwa vyao. “Aha!” walisema. “Wewe ndiye ambaye ungelibomoa hekalu na kulijenga tena kwa siku tatu! 30Basi jiokoe mwenyewe; shuka kutoka msalabani!” 31Wakuu wa makuhani na waandishi nao walimdhihaki vivyo hivyo wao kwa wao. “Aliwaokoa wengine,” walisema, “lakini hawezi kujiokoa mwenyewe! 32Kristo, Mfalme wa Israeli, na ashuke kutoka msalabani sasa hivi, ili tuone, tupate kuamini!” Hata wale waliosulubiwa pamoja naye walimsuta pia.

33Ilipofika saa sita, giza liliifunika nchi yote mpaka saa tisa. 34Saa tisa Yesu alipaza sauti kwa nguvu, “Eloi, Eloi, lema sabachthani?” Maana yake ni, “Mungu wangu, Mungu wangu, kwa nini umenitelekeza?” 35Baadhi ya watu waliokuwa wamesimama pale walisikia, wakasema, “Sikilizeni, anamwita Eliya!” 36Mtu mmoja akakimbia, akachovya sifongo katika divai chungu, akaiweka kwenye ncha ya fimbo, akampa anywe. Akasema, “Ngojeni! Tuone kama Eliya atakuja kumshusha.” 37Lakini Yesu alilia kwa sauti kuu, akatoa pumzi ya mwisho. 38Na pazia la patakatifu pa hekalu likapasuka vipande viwili, kutoka juu mpaka chini. 39Kamanda wa askari mia aliyekuwa amesimama mbele yake alipoona jinsi alivyokufa, alisema, “Kwa kweli mtu huyu alikuwa Mwana wa Mungu!”

40Wanawake pia walikuwapo, wakitazama kwa mbali. Miongoni mwao walikuwa Mariamu Magdalene; Mariamu, mama yake Yakobo mdogo na Yose; na Salome. 41Wanawake hao walikuwa wakimfuata alipokuwa Galilaya, na kumhudumia katika mahitaji yake. Pia walikuwapo wanawake wengine wengi waliokuja pamoja naye Yerusalemu.

42Jioni ilikuwa tayari imeingia. Kwa kuwa ilikuwa Siku ya Maandalio, yaani siku kabla ya Sabato, 43Yosefu wa Arimathaya alikuja. Alikuwa mjumbe wa Baraza Kuu aliyeheshimika, naye pia alikuwa akiungojea ufalme wa Mungu. Alijipa moyo, akaingia kwa Pilato, akaomba apewe mwili wa Yesu. 44Pilato alishangaa kusikia kwamba alikuwa amekwisha kufa. Akamwita kamanda wa askari mia, akamwuliza kama alikuwa amekufa kitambo. 45Kamanda alipomthibitishia, Pilato akampa Yosefu mwili. 46Yosefu alinunua sanda ya kitani, akamshusha, akamzungushia sanda hiyo. Akamlaza katika kaburi lililokuwa limechongwa mwambani, kisha akavingirisha jiwe kufunga mlango wa kaburi. 47Mariamu Magdalene na Mariamu mama yake Yose walikuwa wakitazama ili waone mahali alipowekwa.