Marko 9

1Akaendelea kuwaambia, “Kweli nawaambia, baadhi ya wale waliosimama hapa hawataonja kifo kabla ya kuuona ufalme wa Mungu umekuja kwa nguvu.”

2Siku sita baadaye Yesu aliwachukua Petro, Yakobo na Yohana, akawapeleka juu ya mlima mrefu, mbali na watu wengine. Huko aligeuzwa sura mbele yao. 3Mavazi yake yakawa yanang’aa na meupe kabisa, meupe kuliko dobi yeyote duniani awezavyo kuyafanya. 4Kisha Eliya akawatokea pamoja na Musa, na hao wawili walikuwa wakizungumza na Yesu. 5Petro akamwambia Yesu, “Rabi, ni vizuri kama nini sisi kuwa hapa! Tujenge vibanda vitatu: kimoja chako, kimoja cha Musa na kimoja cha Eliya.” 6Hakujua aseme nini, kwa sababu wote walikuwa wameingiwa na hofu kuu. 7Kisha wingu likaja, likawafunika kwa kivuli chake, na sauti ikasema kutoka katika wingu: “Huyu ni Mwana wangu ninayempenda sana. Msikilizeni yeye!” 8Ghafla walipotazama huku na huku, hawakumwona tena mtu yeyote pamoja nao, ila Yesu peke yake.

9Walipokuwa wakishuka mlimani, aliwakataza wasimweleze mtu yeyote waliyoyaona, mpaka Mwana wa Adamu atakapofufuka kutoka kwa wafu. 10Wakalishika jambo hilo bila kumwambia mtu, lakini wakajadiliana wao kwa wao maana ya huko “kufufuka kutoka kwa wafu.” 11Wakamwuliza, “Kwa nini waandishi wanadai kwamba Eliya lazima aje kwanza?” 12Akawaambia, “Ndiyo, Eliya anakuja kwanza na kuyatengeneza mambo yote. Basi kwa nini Maandiko yanasema kwamba Mwana wa Adamu atateseka sana na kudharauliwa? 13Lakini nawaambia, Eliya amekwisha kuja kweli, nao wakamtendea kama walivyopenda, kama vile ilivyoandikwa kumhusu.”

14Walipowafikia wanafunzi wengine, waliwakuta wamezungukwa na umati mkubwa, na baadhi ya waandishi wakibishana nao. 15Mara tu watu walipomwona, umati wote ukastaajabu sana, wakamkimbilia ili kumsalimu. 16Akawauliza, “Mnabishana nao juu ya nini?” 17Mtu mmoja katika umati akamjibu, “Mwalimu, nimemleta mwanangu kwako. Ana pepo anayemfanya asiweze kusema. 18Kila anapomshika, humwangusha chini kwa nguvu, naye hutokwa na povu kinywani, husaga meno na kukakamaa mwili. Niliwaomba wanafunzi wako wamfukuze, lakini hawakuwa na nguvu ya kufanya hivyo.” 19Yesu akawajibu, “Ninyi kizazi kisichoamini! Nitakaa nanyi mpaka lini? Nitawachukulia mpaka lini? Mleteni mtoto huyo kwangu.” 20Basi wakamleta mtoto kwake. Pepo yule alipomwona Yesu, mara moja alimtetemesha mtoto kwa nguvu. Mtoto akaanguka chini, akagaagaa huku akitokwa na povu kinywani. 21Yesu akamwuliza baba wa mtoto, “Jambo hili limekuwa likimpata tangu lini?” Akajibu, “Tangu alipokuwa mtoto mdogo. 22Mara nyingi amemtupa motoni au majini ili amwue. Lakini kama unaweza kufanya lolote, utuhurumie, utusaidie!” 23Yesu akamwambia, “’Kama unaweza!’ Kila kitu kinawezekana kwa mtu anayeamini.” 24Mara moja baba wa mtoto akapaza sauti, “Ninaamini! Nisaidie pale imani yangu inapopungua!” 25Yesu alipoona kwamba umati ulikuwa ukikusanyika kwa haraka, alimkemea yule pepo mchafu, akisema, “Wewe pepo bubu na kiziwi, mimi nakuamuru: toka ndani yake, wala usimwingie tena kamwe!” 26Pepo huyo akapiga ukelele, akamtikisa kwa nguvu sana, kisha akatoka. Mtoto akabaki amelala kama maiti, hata wengi wakasema, “Amekufa.” 27Lakini Yesu akamshika mkono, akamwinua, naye akasimama. 28Yesu alipoingia nyumbani, wanafunzi wake walimwuliza faraghani, “Kwa nini sisi hatukuweza kumfukuza?” 29Akawaambia, “Aina hii haiwezi kutolewa kwa njia yoyote ila kwa maombi.”

30Waliondoka mahali pale, wakapita katika Galilaya. Yesu hakutaka mtu yeyote ajue walipo, 31kwa sababu alikuwa akiwafundisha wanafunzi wake. Aliwaambia, “Mwana wa Adamu atakabidhiwa mikononi mwa wanadamu. Watamwua, na siku tatu baada ya kuuawa atafufuka.” 32Lakini hawakuelewa alichomaanisha, na waliogopa kumwuliza.

33Wakafika Kapernaumu. Walipokuwa ndani ya nyumba, aliwauliza, “Mlikuwa mkibishana juu ya nini tulipokuwa njiani?” 34Wakanyamaza kimya, kwa sababu njiani walikuwa wakibishana wao kwa wao ni nani kati yao aliye mkuu kuliko wote. 35Akaketi, akawaita wale Kumi na Wawili, akawaambia, “Mtu yeyote anayetaka kuwa wa kwanza lazima awe wa mwisho kuliko wote na mtumishi wa wote.” 36Akamchukua mtoto mdogo, akamsimamisha katikati yao. Kisha akamkumbatia, akawaambia, 37“Yeyote anayemkaribisha mtoto kama huyu kwa jina langu ananikaribisha mimi. Na yeyote anayenikaribisha mimi, si mimi anayemkaribisha, bali ni yule aliyenituma.”

38Yohana akamwambia, “Mwalimu, tulimwona mtu akifukuza pepo kwa jina lako. Tukajaribu kumzuia, kwa kuwa yeye hakuwa anatembea pamoja nasi.” 39Yesu akasema, “Msimzuie. Hakuna mtu anayefanya tendo kuu kwa jina langu ambaye atakuwa mwepesi kunisema vibaya baadaye. 40Yeyote asiyepingana nasi yuko upande wetu.

41Mtu yeyote atakayewapa kikombe cha maji mnywe kwa sababu ninyi ni wa Kristo, kweli nawaambia, mtu huyo hatakosa kamwe thawabu yake.

42Mtu yeyote atakayemfanya mmoja wa wadogo hawa wanaoniamini aiache imani, ingekuwa afadhali kwake kufungiwa jiwe kubwa la kusagia shingoni na kutupwa baharini.

43Mkono wako ukikuangusha dhambini, ukate. Ni bora kwako kuingia katika uzima ukiwa na kilema, kuliko kwenda Jehanamu na mikono yako yote miwili, kwenye moto usioweza kuzimwa. 45Mguu wako ukikuangusha dhambini, ukate. Ni bora kwako kuingia katika uzima ukiwa kiwete, kuliko kutupwa Jehanamu na miguu yako yote miwili. 47Jicho lako likikuangusha dhambini, ling’oe. Ni bora kwako kuingia katika ufalme wa Mungu ukiwa na jicho moja, kuliko kutupwa Jehanamu ukiwa na macho mawili, 48ambako funza wanaowala hawafi kamwe, na moto hauzimwi kamwe.

49Kila mtu atatiwa chumvi kwa moto. 50Chumvi ni kitu kizuri. Lakini chumvi ikipoteza ukali wake, mtairudishiaje ladha yake? Kuweni na chumvi ndani yenu, na muishi kwa amani ninyi kwa ninyi.”