Marko 4

1Kwa mara nyingine alianza kufundisha kando ya bahari. Umati uliokusanyika kumzunguka ulikuwa mkubwa mno, hata akapanda mashua, akaketi ndani yake baharini, na watu wote wakabaki ufuoni kando ya bahari. 2Aliwafundisha mambo mengi kwa kutumia mifano, na alipokuwa akifundisha aliwaambia, 3“Sikilizeni! Mkulima mmoja alitoka kwenda kupanda mbegu. 4Alipokuwa akizitawanya, mbegu nyingine zilianguka kando ya njia, na ndege wakaja wakazila zote. 5Nyingine zilianguka kwenye ardhi yenye mawe, ambako udongo ulikuwa kidogo. Zikaota upesi, kwa kuwa udongo haukuwa na kina. 6Lakini jua lilipochomoza, mimea michanga iliungua, na kwa kuwa haikuwa na mizizi ikakauka. 7Nyingine zilianguka kati ya magugu ya miiba, nayo yakakua yakazisonga, zisitoe nafaka. 8Lakini mbegu nyingine zilianguka kwenye udongo mzuri. Zikaota, zikakua, zikatoa mazao: mara thelathini, mara sitini, hata mara mia ya kile kilichopandwa.” 9Kisha akasema, “Mtu yeyote mwenye masikio ya kusikia, na asikilize.”

10Alipokuwa peke yake, wale kumi na wawili na wengine waliokuwa pamoja naye walimwuliza kuhusu mifano hiyo. 11Akawaambia, “Ninyi mmepewa siri ya ufalme wa Mungu. Lakini kwa wale walio nje, kila kitu huja kwa mifano, 12ili watazame na kutazama lakini wasitambue kamwe, na wasikilize na kusikiliza lakini wasielewe kamwe; la sivyo wangegeuka na kusamehewa.”

13Kisha akawaambia, “Hamwelewi maana ya mfano huu? Basi mtaielewaje mifano mingine yote? 14Mkulima hupanda neno. 15Watu wengine ni kama mbegu iliyopandwa kando ya njia. Neno linapandwa ndani yao, nao wanalisikia, lakini mara moja Shetani anakuja na kulinyakua neno lililopandwa ndani yao. 16Vivyo hivyo, wengine ni kama mbegu iliyopandwa penye mawe. Wanaposikia neno, mara moja hulipokea kwa furaha. 17Lakini neno haliingii ndani yao likapata mizizi, nao hudumu kwa muda mfupi tu. Kisha dhiki au mateso yanapokuja kwa sababu ya neno, mara wanarudi nyuma. 18Wengine ni kama mbegu iliyopandwa kati ya miiba. Hao hulisikia neno, 19lakini wasiwasi wa zama hizi, ahadi za uongo za mali, na tamaa ya mambo mengine huingia na kulisonga neno, hata lisizae matunda. 20Lakini wengine ni kama mbegu iliyopandwa katika udongo mzuri. Hao hulisikia neno, hulikubali, na kuzaa mazao, mara thelathini, mara sitini, au mara mia ya kile kilichopandwa.”

21Akawaambia pia, “Je, taa huletwa ndani ili ifunikwe kwa bakuli au iwekwe chini ya kitanda? Si huletwa ili iwekwe juu ya kinara? 22Kwa maana hakuna kilichofichwa ila ili kifichuliwe, na hakuna kilichowekwa siri ila ili kije kujulikana wazi. 23Mtu yeyote akiwa na masikio ya kusikia, na asikilize.” 24Akawaambia pia, “Zingatieni kile mnachosikia. Kipimo mnachotumia ndicho Mungu atakachotumia kwenu, naye atawaongezea zaidi. 25Wale walio nacho wataongezewa, na wasio nacho watanyang’anywa hata kile walicho nacho.”

26Akasema pia, “Ufalme wa Mungu uko hivi: mtu hutupa mbegu ardhini. 27Usiku analala, mchana anaamka, na mbegu inachipua na kukua, ingawa yeye hajui jinsi inavyokua. 28Ardhi huzaa mazao yenyewe: kwanza chipukizi, kisha suke, kisha suke lililojaa nafaka. 29Na nafaka ikiisha kukomaa, mara moja anatia mundu, kwa sababu wakati wa mavuno umefika.”

30Akasema pia, “Tuufananishe ufalme wa Mungu na nini? Tutumie mfano gani kuueleza? 31Ni kama mbegu ya haradali. Inapopandwa ardhini, ni ndogo kuliko mbegu nyingine zote duniani. 32Lakini ikishapandwa, inakua na kuwa kubwa kuliko mimea yote ya bustanini. Inatoa matawi makubwa, hata ndege wa angani wanaweza kukaa katika kivuli chake.”

33Kwa mifano mingi kama hiyo aliwaambia neno, kwa kadiri walivyoweza kusikia. 34Hakusema nao neno lolote bila mfano, lakini faraghani aliwafafanulia wanafunzi wake wenyewe kila kitu.

35Siku hiyo jioni ilipokaribia, Yesu aliwaambia wanafunzi wake, “Tuvuke twende upande wa pili wa bahari.” 36Wakauacha umati, wakamchukua pamoja nao katika mashua, kwa kuwa alikuwa tayari ndani yake. Mashua nyingine pia zilikwenda pamoja naye. 37Dhoruba kali ya upepo ikavuma, na mawimbi yakawa yakiipiga mashua na kuingia ndani, hata ikaanza kujaa maji. 38Yesu mwenyewe alikuwa amelala nyuma ya mashua, kichwa juu ya mto. Wakamwamsha, wakamwambia, “Mwalimu, hujali kwamba tunakufa?” 39Yesu akaamka, akaukemea upepo, akaiamuru bahari, “Nyamaza! Tulia!” Upepo ukatulia, na shwari kuu ikaenea juu ya maji. 40Akawauliza, “Kwa nini mnaogopa hivyo? Je, hata sasa hamna imani?” 41Hofu kuu ikawajaa, wakawa wakiambiana, “Huyu ni nani basi, hata upepo na bahari vinamtii?”