Marko 5

1Walifika ng’ambo ya bahari, katika nchi ya Wagerasi. 2Mara tu Yesu aliposhuka kutoka mashuani, mtu mwenye pepo mchafu alitoka makaburini akaja kukutana naye. 3Mtu huyo aliishi makaburini, na hakuna mtu aliyeweza kumfunga tena, hata kwa mnyororo. 4Mara nyingi alikuwa amefungwa kwa minyororo na kwa pingu za miguu, lakini aliikata-kata minyororo na kuzivunja pingu. Hakuna mtu aliyekuwa na nguvu za kumdhibiti. 5Usiku na mchana, bila kukoma, alikuwa akipiga makelele makaburini na vilimani, na kujichanja-chanja kwa mawe. 6Alipomwona Yesu kwa mbali, alikimbia akaja akapiga magoti mbele yake. 7Akapiga kelele kwa sauti kubwa, “Yesu, Mwana wa Mungu Aliye Juu Kabisa, una shughuli gani nami? Nakusihi, Mungu akiwa shahidi, usinitese!” 8Alisema hivyo kwa sababu Yesu alikuwa akimwambia, “Pepo mchafu, mtoke mtu huyu!” 9Kisha Yesu akamwuliza, “Jina lako ni nani?” Akamjibu, “Jina langu ni Legioni, kwa maana sisi ni wengi.” 10Aliendelea kumsihi Yesu sana asiwafukuze kutoka katika nchi ile. 11Kundi kubwa la nguruwe lilikuwa likilisha pale kando ya kilima. 12Pepo hao wakamsihi, “Tupeleke kwa wale nguruwe; turuhusu tuingie ndani yao.” 13Akawapa ruhusa. Pepo wachafu wakatoka, wakaingia ndani ya nguruwe. Kundi zima, nguruwe wapata elfu mbili, likatimka mbio kuteremka mteremko mkali, likaingia baharini, nao wakazama humo.

14Wachungaji wa nguruwe walikimbia, wakaeneza habari mjini na mashambani, na watu wakaja kuona yaliyokuwa yametokea. 15Walipofika kwa Yesu, walimkuta yule mtu aliyekuwa amepagawa na pepo ameketi pale, amevaa nguo, na akili zake ziko timamu, yule yule aliyekuwa amepagawa na Legioni. Nao wakaogopa. 16Wale walioyaona yote wakawaeleza yaliyompata yule mtu aliyekuwa na pepo, na pia habari za nguruwe. 17Kisha wakaanza kumsihi Yesu aondoke katika eneo lao. 18Yesu alipokuwa akipanda mashua, yule mtu aliyeachiliwa kutoka kwa pepo alimsihi amruhusu aende pamoja naye. 19Lakini Yesu hakumruhusu, bali alimwambia, “Nenda nyumbani kwa watu wako, ukawajulishe yote ambayo Bwana amekutendea, na jinsi alivyokuonea huruma.” 20Basi akaenda zake, akaanza kutangaza katika Dekapoli yote mambo makuu ambayo Yesu alikuwa amemtendea. Kila aliyesikia alishangaa.

21Yesu alipokwisha kuvuka tena kwa mashua mpaka ng’ambo ya pili, umati mkubwa wa watu ulikusanyika kwake alipokuwa bado kando ya bahari. 22Mmoja wa wakuu wa sinagogi, mtu aitwaye Yairo, alifika. Alipomwona Yesu, alijitupa miguuni pake 23akamsihi tena na tena, “Binti yangu mdogo anakaribia kufa. Tafadhali njoo uweke mikono yako juu yake, ili apone na aishi.” 24Basi Yesu akaondoka pamoja naye. Umati mkubwa wa watu ulimfuata, ukimsonga kila upande. 25Katika umati ule alikuwamo mwanamke mmoja aliyekuwa akitokwa na damu kwa miaka kumi na miwili. 26Alikuwa ameteseka sana mikononi mwa matabibu wengi, na alikuwa ametumia mali yake yote. Badala ya kupata nafuu, hali yake ilizidi kuwa mbaya. 27Alikuwa amesikia habari za Yesu, kwa hiyo alipenya katikati ya umati, akaligusa vazi lake kwa nyuma. 28Alikuwa akijiambia, “Hata nikigusa mavazi yake tu, nitapona.” 29Mara moja damu yake ikaacha kutoka, naye akasikia mwilini mwake kwamba ameponywa mateso yake. 30Mara moja Yesu alitambua ndani yake kwamba nguvu imetoka kwake. Akageuka katikati ya umati, akauliza, “Ni nani aliyegusa mavazi yangu?” 31Wanafunzi wake wakamwambia, “Unaona jinsi umati unavyokusonga. Unawezaje kuuliza, ‘Ni nani aliyenigusa?’” 32Lakini Yesu aliendelea kutazama nyuso za watu waliomzunguka, ili amwone yule aliyefanya hivyo. 33Ndipo yule mwanamke, akiwa na hofu na kutetemeka, akijua yaliyokuwa yamemtokea, alikuja akajitupa chini mbele yake, akamweleza kweli yote. 34Akamwambia, “Binti, imani yako imekuokoa na kukuponya. Nenda kwa amani, ukiwa huru kutoka katika mateso yako.”

35Yesu alipokuwa bado anazungumza, watu fulani walifika kutoka nyumbani kwa mkuu wa sinagogi. Wakasema, “Binti yako amekufa. Hakuna haja ya kuendelea kumsumbua mwalimu.” 36Lakini Yesu hakujali maneno yale waliyosema, akamwambia mkuu wa sinagogi, “Usiogope. Amini tu.” 37Hakumruhusu mtu yeyote kwenda pamoja naye isipokuwa Petro, Yakobo, na Yohana ndugu yake Yakobo. 38Walipofika nyumbani kwa mkuu wa sinagogi, Yesu aliona ghasia, watu wakilia na kuomboleza kwa sauti kubwa. 39Akaingia ndani, akawauliza, “Kwa nini makelele haya yote na kilio hiki? Mtoto hajafa. Amelala tu.” 40Wakamcheka kwa dharau. Lakini Yesu aliwatoa wote nje. Kisha akawachukua wanafunzi waliokuwa pamoja naye, na baba na mama wa mtoto, akaingia chumbani alimokuwa amelala msichana. 41Akamshika mtoto mkono, akamwambia, “Talitha kum,” maana yake, “Msichana, nakuambia, amka.” 42Mara moja msichana akasimama, akaanza kutembea, kwa kuwa alikuwa na umri wa miaka kumi na miwili. Wote waliokuwapo wakashangaa mno papo hapo. 43Yesu aliwapa amri kali wasimruhusu mtu yeyote kujua habari hii, akasema apewe chakula.