Luka 1

1Watu wengi wamejitahidi kuandaa masimulizi ya matukio yaliyokamilika kati yetu. 2Waliyaandika kama yalivyotufikia kutoka kwa wale walioyaona tangu mwanzo na wakawa watumishi wa neno. 3Kwa hiyo mimi pia, nikiwa nimefuatilia kwa makini mwenendo wote wa mambo tangu mwanzo, niliamua kukuandikia kwa mpangilio, Mheshimiwa Theofilo, 4ili uwe na hakika juu ya mambo uliyofundishwa.

5Katika siku za Herode, mfalme wa Yudea, palikuwa na kuhani mmoja aitwaye Zakaria, wa kikundi cha makuhani cha Abiya. Mkewe naye alikuwa wa ukoo wa Haruni, na jina lake ni Elisabeti. 6Wote wawili walikuwa wenye haki machoni pa Mungu, nao waliishi kwa kufuata kila amri na kila agizo la Bwana bila kosa lolote kuonekana kwao. 7Lakini hawakuwa na watoto, kwa sababu Elisabeti hakuweza kushika mimba, na wote wawili walikuwa wamekwisha kuzeeka.

8Siku moja, kikundi cha Zakaria kilipokuwa zamuni, naye akihudumu kama kuhani mbele ya Mungu, 9alichaguliwa kwa kura, kama ilivyokuwa desturi ya ukuhani, aingie patakatifu pa Bwana na kufukiza uvumba. 10Wakati wa sadaka ya uvumba, umati wote wa watu ulikuwa ukiomba nje. 11Kisha malaika wa Bwana alimtokea, naye alikuwa amesimama kulia kwa madhabahu ya uvumba. 12Zakaria alipomwona alitetemeka, na hofu ikamjaa. 13Lakini malaika akamwambia, “Usiogope, Zakaria. Ombi lako limesikiwa. Mke wako Elisabeti atakuzalia mtoto wa kiume, nawe utampa jina Yohana. 14Yeye atakuwa furaha yako na shangwe yako, na watu wengi watafurahi kwamba amezaliwa. 15Kwa maana atakuwa mkuu machoni pa Bwana. Kamwe hatakunywa divai wala pombe, naye atajazwa Roho Mtakatifu hata kabla hajazaliwa. 16Atawarudisha wengi wa watu wa Israeli kwa Bwana Mungu wao. 17Atatangulia mbele yake akiwa na roho na nguvu za Eliya, ili airudishe mioyo ya akina baba kwa watoto wao, na awarudishe wasiotii kwenye hekima ya wenye haki, na hivyo awaandae kwa Bwana watu waliotayarishwa.” 18Zakaria akamwambia malaika, “Nitawezaje kuwa na hakika na jambo hili? Mimi ni mzee, na mke wangu naye ameshakuwa na umri mkubwa.” 19Malaika akamjibu, “Mimi ni Gabrieli. Ninasimama mbele za Mungu, nami nimetumwa kuzungumza nawe na kukujulisha habari hii njema. 20Sasa utakuwa kimya, usiweze kusema, mpaka siku mambo haya yatakapotokea, kwa sababu hukuamini maneno yangu. Yatatimia wakati wake ufaao utakapofika.”

21Wakati huo watu walikuwa wakimsubiri Zakaria, wakijiuliza kwa nini anakaa muda mrefu hivyo patakatifu. 22Alipotoka, hakuweza kusema nao, nao wakatambua kwamba ameona maono patakatifu. Aliendelea kuwaashiria kwa mikono, lakini akabaki bila kuweza kusema. 23Siku zake za huduma zilipokwisha, alirudi nyumbani.

24Baada ya hapo mkewe Elisabeti alipata mimba, akakaa faraghani kwa miezi mitano. 25“Bwana amenifanyia jambo hili,” alisema. “Siku hizi ameniangalia kwa fadhili na kuiondoa fedheha yangu mbele ya watu.”

26Katika mwezi wa sita, malaika Gabrieli alitumwa na Mungu kwenda Nazareti, mji mdogo wa Galilaya, 27kwa bikira aliyekuwa amechumbiwa na Yusufu, mtu wa nyumba ya Daudi. Bikira huyo aliitwa Mariamu. 28Malaika akamwendea akasema, “Salamu! Mungu amekuonyesha fadhili zake. Bwana yuko pamoja nawe.” 29Maneno yake yalimtia wasiwasi mwingi, naye akaendelea kujiuliza salamu kama hiyo ingeweza kumaanisha nini. 30Malaika akamwambia, “Usiogope, Mariamu. Umepata kibali kwa Mungu. 31Utapata mimba na kuzaa mtoto wa kiume, nawe utampa jina Yesu. 32Atakuwa mkuu, naye ataitwa Mwana wa Aliye Juu Sana. Bwana Mungu atampa kiti cha enzi cha Daudi, babu yake, 33naye atakuwa mfalme juu ya nyumba ya Yakobo milele yote. Ufalme wake hautakoma kamwe.” 34Mariamu akamwambia malaika, “Jambo hili litawezekanaje? Sijawahi kukutana na mwanamume.” 35Malaika akamjibu, “Roho Mtakatifu atakushukia, na uweza wa Aliye Juu Sana utakufunika kwa kivuli chake. Kwa hiyo mtoto atakayezaliwa atakuwa mtakatifu, naye ataitwa Mwana wa Mungu. 36Hata Elisabeti, jamaa yako, amepata mimba ya mtoto wa kiume katika uzee wake. Watu walimwita tasa, lakini sasa ana mimba ya miezi sita. 37Kwa maana kwa Mungu hakuna ahadi itakayoshindikana.” 38Mariamu akasema, “Mimi ni mtumishi wa Bwana. Yanitokee kama ulivyosema.” Kisha malaika akamwacha.

39Siku hizo Mariamu alijiandaa, akaharakisha kwenda mji mmoja katika nchi ya milima ya Yuda. 40Aliingia nyumbani kwa Zakaria, akamsalimia Elisabeti. 41Salamu ya Mariamu ilipomfikia Elisabeti, mtoto aliyekuwa tumboni mwake aliruka, naye Elisabeti akajazwa Roho Mtakatifu. 42Akapaza sauti, akasema, “Kati ya wanawake wote, wewe ndiye uliyebarikiwa kuliko wote, na mtoto unayembeba amebarikiwa! 43Mimi ni nani hata mama wa Bwana wangu aje kunitembelea? 44Mara salamu yako ilipoyafikia masikio yangu, mtoto aliye tumboni mwangu aliruka kwa furaha. 45Heri mwanamke aliyeamini kwamba yale Bwana aliyomwambia yatatimizwa!”

46Naye Mariamu akasema, “Nafsi yangu inatangaza ukuu wa Bwana, 47na roho yangu imepata furaha yake katika Mungu Mwokozi wangu, 48kwa kuwa amemwangalia kwa upendo mtumishi wake katika hali yake duni. Tangu leo watu wa kila kizazi wataniita heri, 49kwa maana Mwenye Nguvu amenifanyia mambo makubwa. Jina lake ni takatifu, 50na huruma yake inawafikia wanaomcha, kizazi baada ya kizazi.

51Ametenda kwa nguvu za mkono wake; amewatawanya wenye kiburi pamoja na hila zote za mioyo yao. 52Amewashusha wenye mamlaka kutoka katika viti vyao vya enzi, akawainua walio wa hali ya chini. 53Wenye njaa amewapa vitu vizuri tele, na matajiri amewafukuza bila chochote. 54Amekuja kumsaidia Israeli mtumishi wake, wala hakusahau kuonyesha huruma, 55kama alivyowaambia babu zetu, Ibrahimu na wazao wake milele.”

56Mariamu alikaa na Elisabeti muda wa miezi mitatu hivi, kisha akarudi nyumbani.

57Wakati wa Elisabeti wa kujifungua ulifika, naye akazaa mtoto wa kiume. 58Majirani na jamaa zake walisikia jinsi Bwana alivyomwonyesha huruma yake kuu, nao wakasherehekea pamoja naye.

59Mtoto alipofikisha siku nane, walikuja kumtahiri, nao walitaka kumpa jina la baba yake, Zakaria. 60Lakini mama yake akajibu, “Hapana. Jina lake litakuwa Yohana.” 61“Lakini hakuna mtu katika jamaa yako mwenye jina hilo,” wakamwambia. 62Kisha wakamwashiria baba yake, wakimwuliza alitaka mtoto apewe jina gani. 63Aliomba kibao cha kuandikia, akaandika, “Jina lake ni Yohana.” Kila mtu alishangaa. 64Papo hapo kinywa cha Zakaria kilifunguka na ulimi wake ukafunguliwa, naye akaanza kusema, akimtukuza Mungu. 65Majirani wao wote walijawa na hofu ya Mungu, na katika nchi yote ya milima ya Yudea watu walikuwa wakizungumza juu ya mambo haya yote. 66Kila aliyeyasikia aliyatafakari moyoni mwake, akasema, “Basi mtoto huyu atakuwa mtu wa namna gani?” Kwa maana ilikuwa wazi kwamba mkono wa Bwana ulikuwa naye.

67Kisha baba yake Zakaria akajazwa Roho Mtakatifu, akatamka unabii huu: 68“Ahimidiwe Bwana, Mungu wa Israeli, kwa maana amekuja kuwasaidia watu wake na kuwaweka huru. 69Ametuinulia nguvu kuu ya kutuokoa katika nyumba ya mtumishi wake Daudi, 70kama alivyoahidi zamani kupitia kinywa cha manabii wake watakatifu: 71wokovu kutoka kwa adui zetu na kutoka katika mkono wa wote wanaotuchukia. 72Hivyo ameonyesha huruma aliyowaahidi babu zetu na kulikumbuka agano lake takatifu, 73kiapo alichomwapia baba yetu Ibrahimu: kutujalia 74kwamba sisi, tukiisha kuokolewa kutoka mkononi mwa adui zetu, tumtumikie bila hofu 75katika utakatifu na haki mbele yake siku zetu zote. 76Nawe, mtoto, utaitwa nabii wa Aliye Juu Sana, kwa kuwa utamtangulia Bwana kuzitayarisha njia zake, 77kuwafahamisha watu wake kwamba wokovu unakuja kwa kusamehewa dhambi zao. 78Kwa kuwa Mungu wetu ana moyo uliojaa huruma, mapambazuko kutoka juu yatatujia, 79kuwapa nuru wale wanaoketi gizani na katika kivuli cha mauti, na kuziongoza hatua zetu kwenye njia ya amani.”

80Mtoto alipokuwa akikua, alipata nguvu katika roho, naye akaishi nyikani mpaka siku alipojitokeza mbele ya Israeli.