Luka 10

1Baada ya hayo Bwana aliwateua wengine sabini na wawili, akawatuma wawili wawili watangulie mbele yake, waende katika kila mji na kila mahali alipokusudia kwenda. 2Aliwaambia, “Mavuno ni makubwa, lakini wafanyakazi ni wachache tu. Kwa hiyo mwombeni kwa bidii Bwana wa mavuno, awapeleke wafanyakazi wakavune mavuno yake. 3Nendeni zenu. Ninawatuma kama kondoo wachanga kati ya mbwa mwitu. 4Msibebe mfuko wa pesa, wala mkoba, wala viatu; na msisimame njiani kumsalimu mtu yeyote. 5Nyumba yoyote mtakayoingia, anzeni kwa kusema, ‘Amani iwe juu ya watu wa nyumba hii.’ 6Kama yupo huko mtu wa amani, amani yenu itakaa naye. Kama hayupo, itawarudia ninyi. 7Kaeni katika nyumba hiyo hiyo, mkila na kunywa chochote watakachowapa, kwa maana mfanyakazi amestahili malipo yake. Msiwe mkihama kutoka nyumba moja kwenda nyingine. 8Mkiingia katika mji wowote nao wakawakaribisha, kuleni chakula chochote watakachowaandalia. 9Waponyeni wagonjwa waliomo, mkawaambie watu, ‘Ufalme wa Mungu umewakaribia.’ 10Lakini mkiingia katika mji nao wasiwakaribishe, tokeni mwende katika mitaa yake mseme, 11‘Tunapangusa dhidi yenu hata vumbi la mji wenu lililoganda miguuni mwetu. Hata hivyo, jueni kwa hakika: ufalme wa Mungu umekaribia.’ 12Nawaambia, siku ile Sodoma itapata nafuu kuliko mji huo.

13Ole wako, Korazini! Ole wako, Bethsaida! Kama matendo ya nguvu yaliyofanyika kwenu yangefanyika katika Tiro na Sidoni, watu wa huko wangekuwa wametubu zamani sana, wakivaa magunia na kuketi katika majivu. 14Lakini wakati wa hukumu Tiro na Sidoni zitapata nafuu kuliko ninyi. 15Na wewe, Kapernaumu, je, utapandishwa juu hadi mbinguni? Hapana, utashushwa hadi Kuzimu.

16Yeyote anayewasikiliza ninyi ananisikiliza mimi. Yeyote anayewakataa ninyi ananikataa mimi, na yeyote anayenikataa mimi anamkataa yule aliyenituma.”

17Wale sabini na wawili walirudi wakiwa wamejaa furaha. Wakasema, “Bwana, tunapotumia jina lako, hata pepo wanatutii!” 18Aliwaambia, “Nilimwona Shetani akianguka kutoka mbinguni kama mwako wa umeme wa radi. 19Nimewapa mamlaka ya kuwakanyaga nyoka na nge, na mamlaka juu ya nguvu zote za adui. Hakuna kitu chochote kitakachoweza kuwadhuru. 20Lakini msifurahi kwa sababu roho hao wanawatii. Afadhali furahini kwa sababu majina yenu yameandikwa mbinguni.”

21Wakati huo huo Yesu alijawa na furaha kuu katika Roho Mtakatifu, akasema, “Ninakusifu, Baba, Bwana wa mbingu na dunia, kwa sababu mambo haya umeyaweka sirini kwa wenye hekima na wenye elimu, na umeyafunua kwa watoto wadogo. Ndiyo, Baba, kwa kuwa hivi ndivyo ulivyoona vyema. 22Baba yangu ameweka vitu vyote mikononi mwangu. Mwana ni nani, anajua Baba peke yake; na Baba ni nani, anajua Mwana peke yake, pamoja na wale ambao Mwana yuko tayari kuwajulisha habari zake.”

23Kisha akawageukia wanafunzi, akasema nao peke yao, “Heri macho yanayoona yale mnayoyaona sasa. 24Nawaambia, manabii wengi na wafalme walitamani sana kuona mambo mnayoona sasa, lakini hawakuyaona; walitamani kusikia mambo mnayosikia, lakini hawakuyasikia.”

25Kisha mtaalamu mmoja wa sheria alisimama ili amjaribu Yesu. Akasema, “Mwalimu, nitende nini ili nipate kurithi uzima wa milele?” 26Yesu alimjibu, “Ni nini kilichoandikwa katika sheria? Unasoma nini humo?” 27Alijibu, “’Umpende Bwana Mungu wako kwa moyo wako mzima, kwa nafsi yako nzima, kwa nguvu zako zote na kwa akili yako nzima,’ na ‘umpende jirani yako kama unavyojipenda mwenyewe.’” 28Yesu alimwambia, “Jibu lako ni sahihi. Fanya hivyo, nawe utaishi.”

29Lakini mtu huyo alitaka kuonyesha kwamba yuko sahihi, kwa hiyo akamwuliza Yesu, “Je, ni nani anayehesabiwa kuwa jirani yangu?” 30Yesu alilijibu swali hilo, akasema, “Mtu mmoja alikuwa safarini akiteremka kutoka Yerusalemu kwenda Yeriko, majambazi wakamvamia. Walimvua nguo, wakampiga, kisha wakaenda zao, wakamwacha amelala pale nusu mfu. 31Ilitokea kwamba kuhani mmoja alikuwa akiteremka kwa njia hiyo hiyo. Alimwona yule mtu, lakini akapita, akishika upande wa pili wa njia. 32Mlawi naye alifanya vivyo hivyo. Alifika mahali pale, akamwona, akapita upande wa pili. 33Lakini Msamaria mmoja aliyekuwa akisafiri alifika pale yule mtu alipokuwa amelala. Alipomwona, moyo wake ulijaa huruma. 34Alimwendea, akamimina mafuta na divai kwenye majeraha yake, akayafunga. Kisha akampakia juu ya mnyama wake mwenyewe, akampeleka kwenye nyumba ya wageni, akamtunza. 35Kesho yake alitoa dinari mbili akampa mwenye nyumba ya wageni. Akamwambia, ‘Mwangalie vizuri, na ukitumia chochote zaidi, nitakurudishia nikirudi.’ 36Basi, kwa maoni yako, ni yupi kati ya hawa watatu aliyejionyesha kuwa jirani wa yule mtu aliyevamiwa na majambazi?” 37Alijibu, “Yule aliyemhurumia.” Yesu alimwambia, “Basi, nenda ukafanye vivyo hivyo wewe pia.”

38Walipokuwa wakiendelea na safari, Yesu aliingia katika kijiji kimoja, na mwanamke mmoja aitwaye Martha akamkaribisha kama mgeni wake. 39Martha alikuwa na dada yake, Mariamu, aliyeketi chini miguuni pa Yesu, akaendelea kusikiliza maneno yake. 40Lakini Martha alikuwa akivutwa huku na huku na kazi zote za kuhudumia. Alimjia, akasema, “Bwana, je, hujali kwamba dada yangu ameniachia kazi ya kuhudumu peke yangu? Basi mwambie aje anisaidie.” 41Bwana alimjibu, “Martha, Martha, unajisumbua na kuhangaika kwa mambo mengi mno. 42Lakini yanahitajika mambo machache tu, au hata moja tu. Mariamu amechagua sehemu iliyo nzuri, nayo haitachukuliwa kutoka kwake.”