Luka 24

1Siku ya kwanza ya juma, mapema sana alfajiri, kulipoanza kupambazuka, wale wanawake walikwenda kaburini. Walichukua manukato waliyokuwa wameyaandaa. 2Walikuta jiwe limevingirishwa mbali na kaburi. 3Lakini walipoingia ndani hawakuukuta mwili. 4Walipokuwa wakishangaa wasijue maana yake, wanaume wawili walisimama karibu nao, mavazi yao yakimetameta kwa mwanga. 5Wale wanawake waliogopa sana, wakaendelea kuinamisha nyuso zao chini. Lakini wale wanaume wakawaambia, “Kwa nini mnamtafuta aliye hai miongoni mwa wafu? 6Hayupo hapa; amefufuliwa. Kumbukeni alivyowaambia alipokuwa bado yuko Galilaya: 7kwamba ilimpasa Mwana wa Adamu akabidhiwe mikononi mwa watu wenye dhambi, asulubiwe, kisha siku ya tatu afufuke.” 8Ndipo walipoyakumbuka maneno yake. 9Walirudi kutoka kaburini, wakawaeleza wale Kumi na Mmoja na wengine wote mambo hayo yote. 10Wanawake hao walikuwa Mariamu Magdalene, Yoana, Mariamu mama yake Yakobo, na wengine waliokuwa pamoja nao. Hao ndio walioendelea kuwaeleza mitume mambo hayo. 11Lakini kwa mitume, habari hiyo ilionekana kama upuuzi, wakakataa kuwaamini wale wanawake.

12Lakini Petro aliinuka, akakimbia kaburini. Akainama kuchungulia ndani, akaona vitambaa vya kitani tu. Kisha akarudi nyumbani, akistaajabu kwa yale yaliyotokea.

13Siku hiyo hiyo wawili wao walikuwa wakienda Emau, kijiji kilichokuwa kama kilomita kumi na moja kutoka Yerusalemu. 14Walikuwa wakizungumza kwa makini juu ya yote yaliyotokea. 15Walipokuwa wakizungumza na kujadiliana, Yesu mwenyewe aliwakaribia, akaanza kutembea pamoja nao. 16Lakini macho yao yalizuiliwa, wakashindwa kumtambua. 17Akawauliza, “Ni mazungumzo gani haya mnayofanya njiani mnapotembea?” Wakasimama, nyuso zao zikiwa na huzuni nzito. 18Mmoja wao, mtu aitwaye Kleopa, akamjibu, “Je, wewe ni mgeni pekee katika Yerusalemu usiyejua mambo yaliyotokea humo siku hizi chache?” 19“Mambo gani?” akawauliza. Wakamjibu, “Mambo ya Yesu wa Nazareti. Alikuwa nabii, mtu ambaye matendo na maneno yake yalikuwa na nguvu nyingi mbele za Mungu na mbele ya watu wote. 20Wakuu wetu wa makuhani na viongozi wetu walimkabidhi ili ahukumiwe kifo, wakamsulubisha. 21Sisi tulikuwa tumetumaini kwamba yeye ndiye angewakomboa Israeli. Tena, juu ya hayo yote, leo ni siku ya tatu tangu mambo hayo yatokee. 22Tena, baadhi ya wanawake wa kundi letu wametushtua. Walikwenda kaburini alfajiri 23wakakuta mwili wake haupo. Wakarudi, wakasema kwamba wameona hata malaika katika maono, nao malaika hao wanasema kwamba yeye yu hai. 24Baadhi ya watu wetu walikwenda kaburini pia, wakakuta kila kitu kama wanawake walivyoeleza, lakini yeye hawakumwona.” 25Kisha akawaambia, “Mnakosa ufahamu kweli! Mioyo yenu inachelewa mno kuamini yote ambayo manabii walisema! 26Kristo ilimpasa kuteswa hivi na kuingia katika utukufu wake, sivyo?” 27Kisha, akianza na Musa na kuendelea na manabii wote, aliwaeleza yaliyoandikwa juu yake katika kila sehemu ya Maandiko.

28Walipokaribia kijiji walichokuwa wakielekea, yeye alionyesha kana kwamba anaendelea na safari. 29Lakini hawakumwacha aendelee. “Baki nasi,” wakasema, “kwa maana jioni inaingia na mwanga wa mchana unafifia.” Basi akaingia ndani ili kukaa nao. 30Alipoketi mezani pamoja nao, aliuchukua mkate, akasema baraka. Kisha akaumega, akawapa. 31Ndipo macho yao yalipofumbuliwa, wakajua kwamba ni yeye. Kisha hakuonekana tena. 32Wakaambiana, “Je, hatukuhisi mioyo yetu ikiwaka moto ndani yetu alipokuwa akizungumza nasi njiani na kutufunulia maana ya Maandiko?” 33Bila kukawia waliondoka, wakarudi Yerusalemu. Wakawakuta wale Kumi na Mmoja wamekusanyika pamoja na wenzao, 34ambao walikuwa wakisema, “Kweli Bwana amefufuliwa, naye amemtokea Simoni!” 35Kisha wale wawili wakaeleza yaliyowapata njiani, na jinsi alivyotambulika kwao alipoumega mkate.

36Walipokuwa wakiyazungumza hayo, Yesu mwenyewe alikuwa amesimama katikati yao. 37Lakini walishtuka na kujawa na hofu, kwa sababu walidhani wanaona roho. 38Akawaambia, “Mbona mmetaharuki hivyo? Kwa nini mioyo yenu ina mashaka haya? 39Tazameni mikono yangu na miguu yangu, mjue kwamba ni mimi kweli. Nipapaseni muone. Roho haina nyama na mifupa, lakini mnaona kwamba mimi nina nyama na mifupa.” 40Baada ya kusema hayo, aliwaonyesha mikono na miguu yake. 41Furaha na mshangao wao ulikuwa mkubwa kiasi kwamba bado hawakuweza kuamini. Kisha akawauliza, “Mna kitu cha kula hapa?” 42Wakampa kipande cha samaki wa kuchoma. 43Akakichukua, akakila wakimtazama.

44Kisha akawaambia, “Hili ndilo nililokuwa nikiwaambia nilipokuwa bado pamoja nanyi: kila kilichoandikwa juu yangu katika Sheria ya Musa, katika Manabii na katika Zaburi lazima kitimie.” 45Kisha akafungua akili zao waweze kuyaelewa Maandiko. 46Akawaambia, “Maandiko yanasema hivi: Kristo atapata mateso, kisha atafufuka kutoka kwa wafu siku ya tatu; 47na kwa jina lake mataifa yote yatatangaziwa toba na msamaha wa dhambi, kuanzia Yerusalemu. 48Ninyi ni mashahidi wa mambo haya yote. 49Ninawaletea kile ambacho Baba yangu aliahidi. Lakini ninyi, bakini hapa mjini mpaka nguvu kutoka juu iwavike.”

50Akawatoa nje mpaka walipokaribia Bethania. Huko akainua mikono yake, akawabariki. 51Alipokuwa bado akiwabariki, aliachana nao, akachukuliwa juu mbinguni. 52Wakamsujudia na kumwabudu, kisha wakarudi Yerusalemu kwa furaha kubwa. 53Wakawa wakikaa hekaluni muda wote, wakimhimidi Mungu.