Luka 13

1Wakati huohuo baadhi ya watu waliokuwapo walimweleza Yesu habari za Wagalilaya ambao Pilato alikuwa amechanganya damu yao na damu ya dhabihu zao. 2Aliwajibu, “Je, mnadhani Wagalilaya hao walipatwa na hayo kwa sababu walikuwa wenye dhambi kuliko watu wengine wote wa Galilaya? 3Hapana, nawaambia. Lakini msipotubu, nyote mtaangamia kama wao. 4Au fikirini wale kumi na wanane waliouawa mnara wa Siloamu ulipowaangukia. Mnadhani walikuwa na hatia zaidi kuliko watu wengine wote waliokaa Yerusalemu? 5Hapana, nawaambia. Lakini msipotubu, nyote mtaangamia sawasawa na wao.”

6Kisha alitoa mfano huu: “Mtu mmoja alikuwa na mtini uliokua katika shamba lake la mizabibu. Alikuja kutafuta matunda juu yake, lakini hakupata hata moja. 7Basi akamwambia mtu aliyetunza shamba la mizabibu, ‘Kwa miaka mitatu sasa nimekuwa nikija kutafuta matunda katika mtini huu, na sipati hata moja. Ukate! Kwa nini uendelee kupoteza ardhi nzuri?’ 8Yule mtunzaji akamjibu, ‘Bwana, uuache mwaka huu pia, nami nitachimba kuuzunguka na kuutilia samadi. 9Ukizaa matunda mwaka ujao, vema; usipozaa, unaweza kuukata.’”

10Siku moja ya Sabato, Yesu alikuwa akifundisha katika mojawapo ya masinagogi ya mahali pale. 11Palikuwa na mwanamke ambaye pepo alikuwa amemfanya mgonjwa kwa miaka kumi na minane. Mgongo wake ulikuwa umepinda, wala hakuweza kusimama wima kabisa. 12Yesu alipomwona, alimwita, akamwambia, “Mama, umefunguliwa kutoka katika ugonjwa wako.” 13Kisha akaweka mikono yake juu yake, na mara moja akasimama wima, akaanza kumtukuza Mungu. 14Lakini kiongozi wa sinagogi alikasirika kwa sababu Yesu alikuwa amemponya mtu siku ya Sabato. Akasimama akauambia umati, “Kazi inaweza kufanywa siku sita. Njooni mponywe siku yoyote kati ya hizo, lakini si siku ya Sabato.” 15Bwana alimjibu, “Ninyi wanafiki! Kila mmoja wenu siku ya Sabato humfungua ng’ombe wake au punda wake kutoka zizini na kumpeleka akanywe maji, sivyo? 16Na huyu hapa ni binti wa Ibrahimu ambaye Shetani amemfunga kwa miaka kumi na minane mizima. Je, hakupaswa kufunguliwa kifungo hiki siku ya Sabato?” 17Aliposema hayo, wote waliokuwa wamejiweka kumpinga waliaibika, nao umati wote ulifurahia mambo yote matukufu aliyokuwa akiyatenda.

18Basi alisema, “Ufalme wa Mungu unafanana na nini? Niutolee mfano gani? 19Ni kama hivi: mtu mmoja alichukua mbegu ya haradali akaipanda katika bustani yake mwenyewe. Ikaendelea kukua mpaka ikawa mti, na ndege wa angani wakaja kujenga viota katikati ya matawi yake.”

20Alisema tena, “Ufalme wa Mungu niulinganishe na nini? 21Ni kama chachu. Mwanamke mmoja alichukua kidogo akaificha katika karibu kilo 18 za unga, na baada ya muda unga wote ukaumka.”

22Yesu aliendelea na safari kutoka mji hadi mji na kijiji hadi kijiji, akifundisha na kusonga mbele kuelekea Yerusalemu. 23Mtu mmoja alimwuliza, “Bwana, je, ni wachache tu wanaookolewa?” Aliwaambia, 24“Jitahidini sana kuingia kupitia mlango mwembamba. Nawaambia, wengi watatafuta njia ya kuingia lakini hawataweza. 25Mwenye nyumba akishainuka na kuufunga mlango, mtajikuta mko nje. Mtabisha mlango na kuita, ‘Bwana, tufungulie!’ Naye atawajibu, ‘Siwajui; sijui mtokako.’ 26Ndipo mtaanza kudai, ‘Tulikula na kunywa pamoja nawe, na ni katika mitaa yetu ulipofundisha!’ 27Lakini atawaambia, ‘Sijui mtokako. Ondokeni kwangu, ninyi nyote ambao kazi yenu ni kutenda maovu!’ 28Huko mtalia na kusaga meno mtakapowaona Ibrahimu, Isaka na Yakobo, na manabii wote ndani ya ufalme wa Mungu, nanyi wenyewe mmefukuzwa nje. 29Na wengine watafika kutoka mashariki na magharibi, kutoka kaskazini na kusini, nao watakaa kula karamu katika ufalme wa Mungu. 30Baadhi ya walio wa mwisho sasa watakuwa wa kwanza, na baadhi ya walio wa kwanza sasa watakuwa wa mwisho.”

31Wakati huohuo baadhi ya Mafarisayo walimjia na onyo: “Ondoka hapa, uendelee na safari yako, kwa sababu Herode anakusudia kukuua.” 32Aliwajibu, “Nendeni mkamwambie mbweha huyo, ‘Leo na kesho ninatoa pepo na kuponya wagonjwa, na siku ya tatu ninamaliza mwendo wangu.’ 33Hata hivyo, ni lazima niendelee na safari yangu leo, kesho na kesho kutwa, kwa maana haiwezekani nabii afe mahali pengine isipokuwa Yerusalemu. 34Yerusalemu, Yerusalemu! Unawaua manabii na kuwapiga mawe wajumbe wanaotumwa kwako. Mara ngapi nilitaka kuwakusanya watoto wako, kama kuku anavyowahifadhi vifaranga wake chini ya mabawa yake! Lakini mlikataa. 35Sasa nyumba yenu imeachwa mikononi mwenu. Nawaambia, hamtaniona mpaka wakati utakapofika mtakaposema, ‘Amebarikiwa yeye anayekuja kwa jina la Bwana.’”