Luka 20

1Siku moja Yesu alipokuwa akiwafundisha watu hekaluni na kuwahubiria habari njema, wakuu wa makuhani na waandishi walimjia pamoja na wazee. 2Wakamwambia, “Tuambie, una mamlaka gani ya kufanya mambo haya? Ni nani aliyekupa mamlaka haya?” 3Akawajibu, “Hata mimi nitawauliza swali. Niambieni hili: 4Ubatizo wa Yohana: ulitoka mbinguni, au kwa wanadamu?” 5Wakajadiliana wao kwa wao, wakasema, “Tukijibu, ‘Ulitoka mbinguni,’ yeye atatuuliza, ‘Basi kwa nini hamkumwamini?’ 6Lakini tukijibu, ‘Ulitoka kwa wanadamu,’ umati wote utatupiga mawe, kwa sababu wana hakika kwamba Yohana alikuwa nabii.” 7Basi wakajibu kwamba hawajui ulikotoka. 8Yesu akawaambia, “Basi hata mimi sitawaambia ni kwa mamlaka gani ninafanya mambo haya.”

9Kisha akawaambia watu mfano huu: “Mtu mmoja alipanda shamba la mizabibu, akawakodishia wakulima. Kisha akaenda nchi nyingine, akakaa huko muda mrefu. 10Wakati wa mavuno ulipofika, alimtuma mtumishi kwa wakulima ili wampe sehemu yake ya mavuno ya shamba la mizabibu. Lakini wakulima walimpiga, wakamrudisha mikono mitupu. 11Basi akamtuma mtumishi wa pili, lakini huyu naye wakampiga, wakamtukana, wakamfukuza bila kitu. 12Kisha akamtuma wa tatu, nao wakamjeruhi huyu pia, wakamtupa nje. 13Kisha bwana wa shamba la mizabibu akasema, ‘Nitafanya nini? Nitamtuma mwanangu, yule ninayempenda. Yamkini yeye watamheshimu.’ 14Lakini wakulima walipomwona akija, walishauriana wao kwa wao. Wakaambiana, ‘Huyu ndiye atakayerithi. Tukimuua, mali hii itakuwa yetu.’ 15Basi wakamtupa nje ya shamba la mizabibu, wakamuua. Basi, bwana wa shamba la mizabibu atawatendea nini? 16Atakuja, awaue wakulima hao, na kuwakabidhi wengine shamba la mizabibu.” Watu waliposikia hayo, wakasema kwa sauti, “Jambo hilo lisitokee kamwe!” 17Yesu akawakazia macho, akasema, “Basi maneno haya yaliyoandikwa yana maana gani: ‘Jiwe ambalo wajenzi walilitupa limekuwa jiwe kuu la pembeni’? 18Kila mtu aangukaye juu ya jiwe hilo atavunjika vipande vipande, na likimwangukia mtu, litamsaga kuwa mavumbi.” 19Waandishi na wakuu wa makuhani walitaka kumkamata papo hapo, lakini waliwaogopa watu. Walielewa kwamba mfano huo aliusema kwa kuwalenga wao.

20Wakamvizia, wakatuma vibaraka waliojifanya kuwa watu waaminifu wanaomcha Mungu. Lengo lao lilikuwa kunasa jambo fulani katika maneno yake na kulitumia ili wamkabidhi kwa nguvu na mamlaka ya mkuu wa mkoa. 21Basi wakamwuliza swali: “Mwalimu, tuna hakika kwamba unayosema na kufundisha ni sahihi. Cheo cha mtu hakikuyumbishi, nawe unafundisha njia ya Mungu kwa kweli. 22Je, sheria inaturuhusu kulipa kodi kwa Kaisari, au la?” 23Lakini yeye aliuona ujanja wao, akawaambia, 24“Hebu nione dinari. Ina sura ya nani, na maandishi ya nani?” Wakajibu, “Ni ya Kaisari.” 25Akawaambia, “Basi mrudishieni Kaisari kilicho mali ya Kaisari, na Mungu kilicho mali ya Mungu.” 26Basi, watu wakiwa wanatazama, hawakupata chochote cha kushikilia katika maneno yake. Jibu lake liliwashangaza, wakakosa la kusema.

27Kisha baadhi ya Masadukayo, wanaosema kwamba hakuna ufufuo, walikuja, wakamwuliza swali: 28“Mwalimu, Musa alituandikia sheria hii: mtu akifa akiwa ameoa lakini hana watoto, ndugu yake anapaswa kumwoa mjane huyo na kumzalia ndugu yake aliyekufa watoto. 29Hapo zamani palikuwa na ndugu saba. Wa kwanza alioa, akafa bila kupata mtoto. 30Kisha wa pili 31na wa tatu wakamwoa, na ndivyo ilivyokuwa kwa wote saba: kila mmoja alikufa bila kuacha watoto. 32Mwisho wa yote, mwanamke huyo naye akafa. 33Basi wafu watakapofufuka, atakuwa mke wa nani? Wote saba walimwoa.”

34Yesu akawajibu, “Katika zama hizi, wanaume huoa na wanawake huozwa kwa waume. 35Lakini wale wanaohesabiwa kuwa wanastahili kushiriki zama zijazo na ufufuo kutoka kwa wafu, hawaoi wala hawaozwi. 36Hawatakufa tena kamwe, kwa sababu wako sawa na malaika; na kwa kuwa wameshiriki ufufuo, wao ni watoto wa Mungu. 37Na kwamba wafu hufufuliwa, hata Musa alilionyesha wazi katika habari ya kichaka kilichokuwa kikiwaka moto, pale anapomwita Bwana ‘Mungu wa Ibrahimu, Mungu wa Isaka na Mungu wa Yakobo.’ 38Mungu si Mungu wa watu waliokufa, bali wa walio hai, kwa kuwa wote wako hai mbele yake.” 39Baadhi ya waandishi wakajibu, “Mwalimu, hilo ni jibu zuri.” 40Tangu hapo hawakuthubutu kumwuliza maswali zaidi.

41Kisha akawaambia, “Watu wanawezaje kusema kwamba Kristo ni mwana wa Daudi? 42Daudi mwenyewe anasema katika kitabu cha Zaburi, ‘Bwana alimwambia Bwana wangu: “Kaa kitini upande wa kulia wangu 43hadi nitakapowaweka adui zako chini ya miguu yako kama kiti cha kuwekea miguu.”’ 44Basi kama Daudi anamwita ‘Bwana,’ yeye anawezaje kuwa mwana wa Daudi?” 45Watu wote wakiwa wanasikia, aliwaambia wanafunzi, 46“Jihadharini na waandishi. Wanapenda kuzunguka wakiwa wamevaa majoho marefu. Wanafurahi watu wanapowasalimu sokoni, na wanapenda viti vya mbele katika masinagogi na nafasi bora katika karamu. 47Wanameza mali za wajane, na ili kuficha hilo wanaomba maombi marefu. Watu hawa watapata hukumu nzito zaidi.”