Luka 12

1Wakati huo umati ulikuwa umefika maelfu mengi, nao ulikuwa umesongamana hata watu wakakanyagana. Yesu alianza kusema, kwanza kabisa na wanafunzi wake: “Jihadharini na chachu ya Mafarisayo, yaani unafiki wao. 2Kila kitu kilichofunikwa sasa kitafunuliwa, na kila siri itajulikana wazi. 3Kwa hiyo chochote mlichosema gizani kitasikika mchana kweupe. Chochote mlichomnong’oneza mtu katika chumba cha ndani kitatangazwa kutoka juu ya mapaa ya nyumba.

4Rafiki zangu, nawaambia hivi: msiwaogope watu wanaoweza kuua mwili, lakini baada ya hapo hawawezi kufanya kitu kingine. 5Nitawaonyesha mnayepaswa kumwogopa. Mwogopeni yule ambaye, baada ya kuua, ana haki ya kuwatupa jehanamu. Ndiyo, nawaambia, yeye ndiye mnayepaswa kumwogopa. 6Mnaweza kununua shomoro watano kwa mshahara wa saa moja hivi, sivyo? Hata hivyo, Mungu hamsahau hata mmoja wao. 7Naam, kila unywele wa kichwa chenu umehesabiwa. Kwa hiyo msiogope. Ninyi ni wa thamani kuliko shomoro wengi mno.

8Nawaambia, mtu yeyote atakayesimama upande wangu waziwazi mbele ya wengine, Mwana wa Adamu atasimama upande wake mbele ya malaika wa Mungu. 9Lakini yeyote atakayekana kunijua mbele ya wengine atakataliwa mbele ya malaika wa Mungu. 10Yeyote atakayesema jambo dhidi ya Mwana wa Adamu atasamehewa. Lakini yeyote atakayemkufuru Roho Mtakatifu hatasamehewa. 11Watu watawapeleka mbele ya masinagogi, watawala na maafisa. Wakifanya hivyo, msiwe na wasiwasi juu ya jinsi ya kujibu mashtaka wala maneno ya kutumia. 12Wakati huo ukifika, Roho Mtakatifu atawafundisha mnachopaswa kusema.”

13Mtu mmoja katika umati alimwambia, “Mwalimu, mwambie ndugu yangu tugawane mali ya baba yetu.” 14Yesu akamjibu, “Rafiki, ni nani aliyenifanya kuwa mwamuzi wenu, au aliyeniweka kuwagawanyia mali yenu?” 15Kisha akawaambia, “Kuweni waangalifu! Jilindeni na kila aina ya tamaa ya mali. Hata mtu akiwa na zaidi ya anachohitaji, uzima hautokani na vitu anavyomiliki.” 16Kisha akawaambia mfano: “Palikuwa na mtu tajiri ambaye shamba lake lilitoa mavuno mengi mno. 17Akaendelea kulifikiria moyoni mwake: ‘Nifanye nini? Sina mahali pa kuhifadhi mavuno yangu.’ 18Kisha akasema, ‘Nimepata mpango: nitazivunja ghala zangu na kujenga nyingine kubwa zaidi, na humo nitaweka nafaka yangu yote na mali zangu. 19Kisha nitajiambia, “Una mali nzuri nyingi zilizowekwa akiba kwa miaka mingi ijayo. Sasa pumzika. Ule, unywe, na ujifurahishe.”’ 20Lakini Mungu akamwambia, ‘Wewe mpumbavu! Usiku huu huu uhai wako unadaiwa urudishwe. Na vitu ulivyojiandalia vitakuwa vya nani basi?’ 21Ndivyo ilivyo kwa kila mtu anayejirundikia mali, lakini si tajiri machoni pa Mungu.”

22Kisha Yesu akawaambia wanafunzi wake, “Ndiyo sababu nawaambia: acheni kuwa na wasiwasi juu ya uhai wenu na mtakachokula, wala juu ya miili yenu na mtakachovaa. 23Uhai una thamani kuliko chakula, na mwili una thamani kuliko mavazi. 24Fikirieni kunguru. Hawapandi wala hawavuni. Hawana chumba cha akiba wala ghala. Hata hivyo Mungu huwalisha. Nanyi mna thamani kubwa mno kuliko ndege! 25Ni nani kati yenu anayeweza kuyaongeza maisha yake hata saa moja kwa kuwa na wasiwasi? 26Ikiwa hamwezi hata jambo dogo hivyo, kwa nini mna wasiwasi juu ya mengine yote? 27Angalieni jinsi maua ya porini yanavyokua. Hayafanyi kazi ngumu wala hayasokoti nyuzi. Lakini nawaambia, hata Sulemani mwenyewe, pamoja na utukufu wake wote, hakuwahi kuvaa vazi zuri kama ua moja kati ya hayo. 28Ikiwa Mungu huyavika hivyo majani ya porini, yaliyopo shambani leo na kesho ni kuni za tanuru, yeye atawafanyia ninyi zaidi sana. Imani yenu ni ndogo kweli! 29Kwa hiyo msiwe kila mara mkitafuta mtakula nini na mtakunywa nini, wala msihangaike juu ya hayo. 30Hayo ndiyo mambo ambayo watu wa mataifa ya ulimwengu huyakimbilia, lakini Baba yenu anajua kwamba mnayahitaji. 31Badala yake, iwekeni mioyo yenu katika ufalme wake, nanyi mtapewa mambo hayo pia.

32Usiogope, ewe kundi langu dogo. Baba yenu ameamua kwa furaha kuwapa ufalme. 33Uzeni mlivyo navyo, mkawape wahitaji fedha hizo. Jipatieni mifuko ya fedha isiyochakaa kamwe, hazina mbinguni isiyokwisha. Huko hakuna mwizi anayeweza kuikaribia, wala nondo anayeweza kuiharibu. 34Moyo wenu utakuwa pale ilipo hazina yenu.

35Kaeni tayari kwa kazi, mkiwa mmejifunga mishipi na taa zenu zikiwaka. 36Mwe kama watu wanaomngoja bwana wao arudi nyumbani kutoka karamu ya harusi, wakiwa tayari kumfungulia mlango mara tu atakapofika na kubisha hodi. 37Heri watumishi wale ambao bwana wao atawakuta macho akija. Kweli nawaambia, atajifunga nguo ya kazi, atawaketisha mezani, na yeye mwenyewe atakuja kuwahudumia. 38Huenda akaja usiku wa manane au hata baadaye, lakini akiwakuta wako tayari, heri watumishi hao.

39Mnaweza kuwa na hakika na hili: kama mwenye nyumba angalijua saa ambayo mwizi angekuja, asingemwacha mtu yeyote atoboe ukuta wa nyumba yake. 40Basi ninyi pia kuweni tayari. Mwana wa Adamu anakuja saa ambayo hamdhani kwamba atakuja.”

41Petro akauliza, “Bwana, je, mfano huu ni kwa ajili yetu, au wewe unamwambia kila mtu?” 42Bwana akajibu, “Basi, ni nani msimamizi anayeaminika na anayetenda kwa busara? Bwana wake atamweka kuwa msimamizi wa wafanyakazi wengine wa nyumba, awape mgao wao wa chakula wakati unapofika. 43Heri mtumishi huyo ikiwa bwana wake atarudi nyumbani na kumkuta akifanya hivyo hasa. 44Nawaambia kwa kweli, atamweka kuwa msimamizi wa kila kitu alicho nacho. 45Lakini huenda mtumishi yule akafikiri, ‘Bwana wangu atakawia sana bado.’ Huenda akaanza kuwapiga watumishi wa kiume na wa kike, na kula na kunywa hata kulewa. 46Ndipo bwana wake atakapofika siku ambayo mtumishi huyo hamtarajii, saa asiyoikisia. Atamkatakata vipande na kumweka pamoja na wasio waaminifu. 47Mtumishi aliyejua matakwa ya bwana wake, lakini hakujiandaa wala hakuyatimiza, atapigwa sana. 48Lakini mtumishi asiyejua, ingawa alitenda yanayostahili kupigwa, atapigwa kidogo. Kila aliyepewa mengi, mengi yatatakiwa kwake. Na mtu aliyekabidhiwa mengi atadaiwa zaidi hata kuliko hayo.

49Nilikuja kuwasha moto duniani, na jinsi ninavyotamani uwe tayari unawaka! 50Lakini kwanza lazima nipitie ubatizo, na ninasongwa sana mpaka umalizike! 51Je, mnadhani nilikuja kuleta amani duniani? Hapana, nawaambia, nilikuja kuleta mgawanyiko. 52Tangu sasa jamaa ya watu watano itagawanyika, watatu dhidi ya wawili na wawili dhidi ya watatu. 53Baba atampinga mwana na mwana atampinga baba, mama atampinga binti na binti atampinga mama, mama mkwe atampinga mkaza mwana wake na mkaza mwana atampinga mama mkwe wake.”

54Yesu akawaambia pia makundi ya watu, “Mnapoona wingu likitokea magharibi, mnasema mara moja, ‘Mvua itanyesha,’ na ndivyo inavyotokea. 55Na upepo wa kusini unapovuma, mnasema, ‘Siku ya joto kali inakuja,’ na ndivyo inavyokuwa. 56Enyi wanafiki! Mnaweza kusoma sura ya nchi na ya anga. Inakuwaje basi hamwezi kusoma maana ya wakati huu? 57Kwa nini hamwezi kuamua wenyewe lililo sawa? 58Mtu anapokupeleka mahakamani mbele ya hakimu, fanya bidii mpatane mngali njiani. Usipofanya hivyo, mshtaki wako anaweza kukukokota mbele ya mwamuzi. Mwamuzi anaweza kukukabidhi kwa afisa, na afisa akakutia gerezani. 59Nakuambia, hutapata njia ya kutoka mpaka senti ya mwisho itakapolipwa.”