Luka 22

1Wakati wa Sikukuu ya Mikate Isiyotiwa Chachu, inayojulikana kama Pasaka, ulikuwa unakaribia. 2Wakuu wa makuhani na waandishi walikuwa wakitafuta njia ya kumwua, kwa sababu waliwaogopa watu.

3Kisha Shetani alimwingia Yuda, aliyeitwa Iskariote, ambaye alikuwa mmoja wa wale Kumi na Wawili. 4Akaenda, akazungumza na wakuu wa makuhani na wakuu wa walinzi wa hekalu jinsi ambavyo angeweza kumsaliti na kumtia mikononi mwao. 5Walifurahi, wakakubali kumlipa fedha. 6Alikubali, na tangu hapo akawa akitafuta nafasi nzuri ya kumsaliti na kumtia mikononi mwao wakati ambapo hakuna umati wa watu.

7Kisha ikafika siku ya Mikate Isiyotiwa Chachu, siku ambayo ilibidi mwanakondoo wa Pasaka achinjwe kuwa dhabihu. 8Basi Yesu aliwatuma Petro na Yohana, akawaagiza, “Nendeni mkatuandalie chakula cha Pasaka tukile.” 9Wakamwuliza, “Unataka tuiandae wapi?” 10Akawaambia, “Mnapoingia mjini, mtu mmoja anayebeba mtungi wa maji atakutana nanyi. Mfuateni mpaka nyumba yoyote atakayoingia. 11Mwambieni mwenye nyumba, ‘Mwalimu anakuuliza, “Kiko wapi chumba cha wageni ambamo nitakula Pasaka pamoja na wanafunzi wangu?”’ 12Yeye atawaonyesha chumba kikubwa cha ghorofani, ambamo kila kitu kimepangwa tayari. Andaeni chakula humo.” 13Basi wakaenda, wakakuta kila kitu kama alivyokuwa amewaambia, wakaiandaa Pasaka.

14Saa ilipowadia, aliketi mahali pake mezani, na mitume pamoja naye. 15Akawaambia, “Jinsi nilivyotamani sana kuila Pasaka hii pamoja nanyi kabla sijateswa! 16Kwa maana nawaambia, sitaila tena mpaka itakapopata utimilifu wake katika ufalme wa Mungu.” 17Kisha alichukua kikombe, akashukuru, akasema, “Chukueni hiki mgawane kati yenu. 18Nawaambia, tangu sasa sitakunywa tunda la mzabibu mpaka ufalme wa Mungu utakapokuja.” 19Kisha alichukua mkate, na baada ya kushukuru akaumega, akawapa, akisema, “Huu ni mwili wangu, unaotolewa kwa ajili yenu. Fanyeni hivi ili mnikumbuke mimi.” 20Vivyo hivyo alichukua kikombe baada ya chakula, akasema, “Kikombe hiki ni agano jipya lililofanywa kwa damu yangu, ambayo inamwagwa kwa ajili yenu. 21Hata hivyo, mkono wa mtu anayenisaliti uko hapa pamoja nami mezani. 22Mwana wa Adamu anaenda njia aliyowekewa. Lakini ole wake mtu yule anayemsaliti!” 23Wakaanza kuulizana wao kwa wao ni nani kati yao ambaye angeweza kufanya jambo kama hilo.

24Pia kukazuka ugomvi kati yao kuhusu ni nani kati yao ahesabiwe kuwa mkuu kuliko wote. 25Lakini akawaambia, “Wafalme wa watu wa mataifa huwatawala watu wao kama mabwana, na wale wenye mamlaka juu yao hupewa cheo cha ‘Mfadhili.’ 26Lakini kwenu isiwe hivyo. Badala yake, aliye mkubwa kati yenu awe kama aliye mdogo kuliko wote, na aliye kiongozi awe kama yule anayewahudumia wengine. 27Fikirini: ni nani mkubwa zaidi, mgeni aliyeegemea mezani, au yule anayewahudumia chakula? Bila shaka ni yule aliye mezani. Hata hivyo mimi niko hapa kati yenu kama yule anayehudumu.

28Ninyi ndio mliosimama pamoja nami katika majaribu yangu. 29Na kama vile Baba yangu alivyonipa ufalme, ndivyo mimi ninavyowapa ninyi. 30Mtakula na kunywa katika meza yangu katika ufalme wangu, na mtaketi juu ya viti vya enzi, mkiyahukumu makabila kumi na mawili ya Israeli. 31Simoni, Simoni, Shetani ameomba awapate ninyi nyote, ili awapepete kama ngano. 32Lakini mimi nimekuombea ili imani yako isikome. Nawe, utakapokuwa umerudi, uwatie nguvu ndugu zako.” 33Petro akamjibu, “Bwana, niko tayari kwenda gerezani pamoja nawe, na hata kufa pamoja nawe.” 34Yesu akajibu, “Nakuambia, Petro, kabla jogoo hajawika leo, utakuwa umesema mara tatu kwamba hunijui.”

35Kisha akawaambia, “Nilipowatuma bila mfuko wa fedha, bila mkoba wa safari, wala viatu, je, mlikosa kitu chochote?” Wakajibu, “Hatukukosa kitu chochote.” 36Akawaambia, “Lakini sasa, aliye na mfuko wa fedha na auchukue, pamoja na mkoba wake wa safari. Na asiye na upanga auze vazi lake la nje, ajinunulie upanga. 37Kwa maana nawaambia, lazima yatimizwe kwangu yale Maandiko yanayosema: ‘Alihesabiwa pamoja na wahalifu.’ Naam, yaliyoandikwa juu yangu yanafikia mwisho wake.” 38Wakasema, “Bwana, tazama, hapa kuna panga mbili.” Akawaambia, “Basi, inatosha.”

39Kisha akatoka, akaenda kama ilivyokuwa desturi yake, mpaka Mlima wa Mizeituni, na wanafunzi wakaenda pamoja naye. 40Alipofika mahali hapo, akawaambia, “Ombeni ili msiingie majaribuni.” 41Kisha akaenda mbali nao kiasi cha mtu kutupa jiwe, akapiga magoti, akaanza kuomba, 42“Baba, ukipenda, kiondoe kikombe hiki kwangu. Lakini mapenzi yako ndiyo yafanyike, si yangu.” 43Kisha malaika kutoka mbinguni alimtokea, akamtia nguvu. 44Akiwa katika uchungu mwingi, aliomba kwa bidii zaidi, na jasho lake likawa kama matone mazito ya damu yakidondoka ardhini. 45Alipoinuka kutoka katika maombi na kurudi kwa wanafunzi, aliwakuta wamelala, wamechoshwa na huzuni. 46Akawaambia, “Mbona mmelala? Amkeni mwombe, ili msiingie majaribuni.”

47Alipokuwa bado akisema, umati wa watu ukatokea. Yule aitwaye Yuda, mmoja wa wale Kumi na Wawili, alikuwa akiwaongoza, naye akamkaribia Yesu ili ambusu. 48Lakini Yesu akamwambia, “Yuda, je, ni kwa busu unamsaliti Mwana wa Adamu?” 49Wale waliokuwa pamoja naye walipoona kitakachotokea, wakasema, “Bwana, tuwapige kwa panga zetu?” 50Na mmoja wao akampiga mtumishi wa kuhani mkuu, akamkata sikio la kulia. 51Lakini Yesu akasema, “Inatosha hivyo!” Akaligusa sikio la mtu yule, akamponya. 52Kisha Yesu akawaambia wakuu wa makuhani, wakuu wa walinzi wa hekalu na wazee waliokuja dhidi yake, “Ilibidi mje na panga na marungu, kana kwamba mimi ni mnyang’anyi? 53Siku baada ya siku nilikuwa pamoja nanyi hekaluni, wala hamkuninyooshea mkono. Lakini hii ndiyo saa yenu, na saa ya mamlaka ya giza.”

54Walimkamata, wakamchukua, wakamwingiza nyumbani kwa kuhani mkuu. Petro akafuata kwa mbali. 55Watu walikuwa wamewasha moto katikati ya ua na kuketi kuuzunguka, naye Petro akaketi pamoja nao. 56Mtumishi mmoja wa kike alimwona ameketi kwenye mwanga wa moto. Akamkazia macho, akasema, “Huyu naye alikuwa pamoja naye.” 57Lakini akakana. “Mama, simjui,” akasema. 58Baada ya muda mfupi mtu mwingine alimwona, akasema, “Wewe pia ni mmoja wao.” Lakini Petro akasema, “Ndugu, si mimi.” 59Baada ya saa moja hivi, mtu mwingine alisisitiza, “Hii ni kweli: mtu huyu alikuwa pamoja naye. Yeye pia ni Mgalilaya.” 60Lakini Petro akasema, “Ndugu, sijui hata unazungumza nini.” Papo hapo, alipokuwa bado anasema, jogoo akawika. 61Bwana akageuka, akamtazama Petro. Ndipo Petro akakumbuka maneno ya Bwana, jinsi alivyokuwa amemwambia, “Leo, kabla jogoo hajawika, utanikana mara tatu.” 62Akatoka nje, akalia kwa uchungu mwingi.

63Wale watu waliokuwa wakimlinda Yesu walimfanyia dhihaka huku wakimpiga. 64Wakamfunika macho, wakawa wakimwuliza, “Tabiri! Ni nani aliyekupiga?” 65Wakamwambia pia mambo mengine mengi ya kumtukana.

66Kulipopambazuka, wazee wa watu walikusanyika, wakuu wa makuhani pamoja na waandishi, wakampeleka mbele ya baraza lao. 67Wakasema, “Kama wewe ndiye Kristo, tuambie.” Lakini akawaambia, “Nikiwaambia, hamtaamini. 68Na nikiwauliza swali, hamtajibu. 69Lakini kuanzia sasa Mwana wa Adamu ataketi upande wa kulia wa uweza wa Mungu.” 70Wote wakasema, “Kwa hiyo wewe ni Mwana wa Mungu?” Akawajibu, “Ninyi mnasema kwamba mimi ndiye.” 71Kisha wakasema, “Tunahitaji mashahidi wengine wa nini? Sisi wenyewe tumesikia kutoka kinywani mwake mwenyewe.”