Luka 16

1Yesu aliwaambia pia wanafunzi jambo hili: “Mtu mmoja tajiri alikuwa na msimamizi, naye akapata habari kwamba msimamizi huyo alikuwa akifuja mali zake. 2Basi alimwita, akamwambia, ‘Ni mambo gani haya ninayozidi kuyasikia kukuhusu? Lete taarifa ya jinsi ulivyosimamia mambo yangu, kwa sababu huwezi kuwa msimamizi wangu tena.’ 3Msimamizi alitafakari, ‘Bwana wangu ananinyang’anya cheo changu. Nifanye nini sasa? Kazi ya kuchimba ni ngumu mno kwangu, na ningeona aibu kuombaomba. 4Sasa najua nitakachofanya, ili nikifukuzwa kazi, watu wanifungulie milango ya nyumba zao.’ 5Basi aliwaita wadeni wa bwana wake mmoja mmoja. Akamwuliza wa kwanza, ‘Bwana wangu anakudai kiasi gani?’ 6Alijibu, ‘Karibu lita 2,200 za mafuta ya zeituni.’ Msimamizi akamwambia, ‘Hii hapa hati yako. Keti haraka uandike lita 1,100.’ 7Kisha akamwambia mwingine, ‘Na wewe je, unadaiwa kiasi gani?’ Alijibu, ‘Karibu lita 22,000 za ngano.’ Msimamizi akamwambia, ‘Chukua hati yako uandike lita 17,600 hivi.’ 8Basi bwana wake alimsifu msimamizi huyo mdanganyifu kwa kutenda kwa werevu namna hiyo. Kwa maana watu wa zama hizi ni werevu zaidi katika kushughulika na watu wa aina yao kuliko watu wa nuru. 9Nami nawaambia, tumieni mali ya ulimwengu huu usio wa haki kujipatia marafiki, ili mali hiyo itakapokwisha, wawakaribishe katika maskani ya milele.

10Mtu mwaminifu katika jambo dogo kabisa ni mwaminifu pia katika mambo makubwa, na mtu mdanganyifu katika jambo dogo kabisa ni mdanganyifu pia katika mambo makubwa. 11Basi kama hamkuwa waaminifu katika kutumia mali isiyo ya haki, ni nani atakayewakabidhi utajiri wa kweli? 12Na kama hamkuonyesha uaminifu katika mali ya mtu mwingine, ni nani atakayewakabidhi kilicho chenu? 13Hakuna mtumishi wa nyumbani anayeweza kuwatumikia mabwana wawili. Mtumishi huyo atamchukia mmoja na kumpenda mwingine, au atakuwa mwaminifu kwa mmoja na kumdharau mwingine. Hamwezi kumtumikia Mungu na mali pia.”

14Mafarisayo walikuwa wakisikiliza mambo hayo yote. Walipenda fedha, nao wakambeza. 15Aliwaambia, “Ninyi ndinyi mnaojionyesha kuwa wenye haki machoni pa watu, lakini Mungu anaijua mioyo yenu. Kile ambacho watu wanakithamini sana ni kitu cha kuchukiza machoni pa Mungu.

16Sheria na manabii vilidumu mpaka wakati wa Yohana. Tangu hapo ufalme wa Mungu unahubiriwa kama habari njema, na kila mtu anajitahidi kwa nguvu kuingia ndani yake.

17Hata hivyo, ni rahisi zaidi mbingu na dunia kutoweka kuliko kistari kidogo kabisa cha sheria kupoteza nguvu yake.

18Mwanamume yeyote anayemtaliki mke wake na kuoa mwanamke mwingine anazini, na mwanamume anayemwoa mwanamke aliyetalikiwa na mumewe anazini pia.

19Kulikuwa na mtu tajiri ambaye alivaa mavazi ya zambarau na kitani laini, akila karamu za kifahari siku baada ya siku. 20Na maskini mmoja aitwaye Lazaro alikuwa amewekwa langoni pake. Mwili wake ulikuwa umejaa madonda, 21naye alitamani kujaza tumbo lake kwa chochote kilichoanguka kutoka mezani pa yule tajiri. Badala yake, mbwa walikuja kumlamba madonda yake. 22Siku moja yule maskini alikufa, na malaika wakamchukua akae kando ya Ibrahimu. Tajiri naye alikufa, akafanyiwa mazishi. 23Kutoka Kuzimu, akiwa katikati ya mateso yake, aliinua macho akamwona Ibrahimu mbali sana, na Lazaro karibu naye. 24Basi alipaza sauti, ‘Baba Ibrahimu, nihurumie! Mtume Lazaro aje hapa. Alowanishe ncha ya kidole chake kwa maji, aupoze ulimi wangu, kwa maana mwali huu unaniumiza vibaya mno.’ 25Lakini Ibrahimu alijibu, ‘Mwanangu, kumbuka: ulipokuwa hai ulikuwa na vitu vyako vizuri, na Lazaro naye alikuwa na vitu vibaya. Sasa yeye anafarijiwa hapa, na wewe unateseka. 26Zaidi ya hayo, kati yetu na ninyi kuna korongo kubwa mno lililowekwa kudumu. Mtu angetaka kuvuka kutoka huku kwenda kwenu, asingeweza, wala hakuna awezaye kuvuka kutoka upande wenu kuja kwetu.’ 27Alisema, ‘Basi, baba, nakuomba jambo hili: mpeleke nyumbani kwa baba yangu, 28ambako nina ndugu watano. Awaonye kwa dhati, ili wao pia wasije mahali hapa pa mateso.’ 29Lakini Ibrahimu alijibu, ‘Musa na manabii wapo kwa ajili yao. Ndugu zako wasikilize maneno yao.’ 30Alijibu, ‘Hilo halitoshi, baba Ibrahimu. Ila mtu kutoka miongoni mwa wafu akiwaendea, watatubu.’ 31Ibrahimu alimwambia, ‘Ikiwa hawataki kuwasikiliza Musa na manabii, hata mtu akifufuka kutoka kwa wafu hatawasadikisha.’”