Luka 4

1Yesu alirejea kutoka Yordani akiwa amejawa na Roho Mtakatifu, na Roho akawa anamwongoza katika nyika 2kwa siku arobaini, huku Ibilisi akimjaribu. Hakula chakula chochote muda wote huo, na siku hizo zilipoisha, alikuwa na njaa. 3Ibilisi alimwambia, “Kama wewe ni Mwana wa Mungu, liamuru jiwe hili ligeuke kuwa mkate.” 4Yesu alimjibu, “Maandiko yanasema, ‘Binadamu haishi kwa mkate peke yake.’”

5Kisha Ibilisi alimpeleka juu, na kwa kitambo kimoja akamwonyesha falme zote za dunia. 6Ibilisi alimwambia, “Nitakupa wewe mamlaka juu ya falme hizi zote, pamoja na utukufu wake wote. Nimekabidhiwa mamlaka hayo, nami nampa yeyote ninayependa. 7Basi, ukiniinamia na kuniabudu, vyote hivyo vitakuwa mali yako.” 8Yesu alimjibu, “Maandiko yanasema, ‘Mwabudu Bwana Mungu wako, wala usimtumikie mwingine ila yeye.’”

9Kisha Ibilisi alimpeleka Yerusalemu, akamweka kwenye ukingo wa juu kabisa wa hekalu, akamwambia, “Kama wewe ni Mwana wa Mungu, ruka chini kutoka hapa. 10Kwa maana Maandiko yanasema, ‘Atawapa malaika wake amri juu yako, wakulinde salama,’ 11na, ‘Watakushikilia juu kwa mikono yao, ili mguu wako usigonge jiwe.’” 12Yesu alimjibu, “Imesemwa, ‘Hupaswi kumjaribu Bwana Mungu wako.’” 13Ibilisi alipokwisha kumjaribu kwa kila namna, alimwacha ili angoje nafasi nyingine iliyo bora.

14Yesu alirudi Galilaya, na nguvu ya Roho ilikuwa pamoja naye. Watu wa nchi yote iliyozunguka walianza kuzungumza habari zake. 15Aliendelea kufundisha katika masinagogi yao, na wote waliomsikia walimsifu.

16Kisha alifika Nazareti, mji alikokulia. Siku ya Sabato aliingia katika sinagogi, kama alivyozoea kufanya siku zote, akasimama ili kusoma Maandiko. 17Mtu mmoja alimpa gombo la nabii Isaya. Akalifungua, akaipata sehemu inayosema: 18“Roho wa Bwana anakaa juu yangu, kwa kuwa amenipaka mafuta ili niwapelekee maskini habari njema. Amenituma kuwatangazia wafungwa kwamba wako huru, na vipofu kwamba wataona tena, kuwaweka huru wanaokandamizwa, 19na kutangaza mwaka wa fadhili za Bwana.” 20Alilikunja gombo tena, akamrudishia mhudumu, akaketi. Watu wote ndani ya sinagogi walikuwa wakimtazama kwa makini. 21Alianza kwa kuwaambia, “Leo, mlipokuwa mkisikiliza, maneno haya ya Maandiko yametimia.” 22Kila mtu pale alimsema vizuri, na walishangazwa na maneno ya neema yaliyotoka kinywani mwake. Wakawa wakisema, “Je, huyu si mwana wa Yusufu?” 23Aliwaambia, “Bila shaka mtanitajia msemo huu: ‘Daktari, jitibu mwenyewe!’ Tena mtaniambia, ‘Yafanye hapa katika mji wako wa nyumbani yale tuliyosikia ulifanya Kapernaumu.’” 24Aliongeza, “Kweli nawaambia, nabii hakaribishwi kamwe katika mji wa kwao. 25Lakini nawaambia hakika: katika siku za Eliya, anga lilipokaa limefungwa kwa miaka mitatu na miezi sita, na njaa kali ikaikumba nchi yote, Israeli ilikuwa na wajane wengi. 26Hata hivyo Eliya hakutumwa kwa yeyote kati yao, bali kwa mjane mmoja wa Sarepta katika nchi ya Sidoni. 27Na nyakati za nabii Elisha, Israeli ilikuwa na watu wengi wenye ukoma, lakini hakuna hata mmoja aliyetakaswa isipokuwa Naamani, mtu wa Siria.” 28Waliposikia hayo, wote waliokuwa katika sinagogi walikasirika mno. 29Wakasimama, wakamfukuza nje ya mji. Wakampeleka mpaka ukingo wa mlima ambapo mji wao ulijengwa, wakikusudia kumtupa chini kutoka hapo. 30Lakini yeye alipenya katikati yao, akaondoka.

31Kisha aliteremka mpaka mji wa Kapernaumu ulioko Galilaya. Huko alikuwa akiwafundisha watu siku ya Sabato. 32Mafundisho yake yaliwashangaza mno, kwa maana maneno yake yalikuwa na mamlaka. 33Katika sinagogi kulikuwa na mtu aliyekuwa na roho ya pepo mchafu, naye alipiga kelele kwa sauti kubwa, 34“Lo! Una nini nasi, Yesu wa Nazareti? Je, umekuja kutuangamiza? Ninajua wewe ni nani: Mtakatifu wa Mungu!” 35Yesu alimpa amri kali, “Nyamaza! Toka ndani yake!” Pepo alimbwaga mtu huyo chini katikati ya chumba, kisha akamtoka, naye hakuumia hata kidogo. 36Wote walishangaa sana. Wakaulizana, “Ujumbe huu ni wa namna gani? Anawapa pepo wachafu amri kwa mamlaka na nguvu, nao wanatoka!” 37Watu walizungumza habari zake kila mahali katika eneo lile lote.

38Kutoka sinagogi Yesu alikwenda nyumbani kwa Simoni. Mama mkwe wa Simoni alikuwa akiugua homa kali sana, wakamsihi amsaidie. 39Alisimama karibu naye, akaiamuru homa iondoke, nayo ikamwacha. Mara moja akainuka, akaanza kuwahudumia.

40Jua lilipokuwa likishuka, wote waliokuwa na watu nyumbani wenye magonjwa ya kila aina waliwaleta kwake. Naye akamwekea kila mmoja mikono, akawaponya. 41Pepo pia waliwatoka watu wengi, wakipaza sauti, “Wewe ni Mwana wa Mungu!” Aliwakemea na kuwanyamazisha, wala hakuwaacha waseme, kwa maana walijua kwamba yeye ni Kristo.

42Kulipopambazuka alitoka, akaenda mahali pa upweke. Lakini makundi ya watu yalienda kumtafuta. Walipomwona, walijaribu kumshikilia ili asiwaache. 43Lakini yeye aliwaambia, “Inanibidi niipeleke habari njema ya ufalme wa Mungu katika miji mingine pia. Hiyo ndiyo kazi niliyotumwa kuifanya.” 44Naye aliendelea kutangaza ujumbe wake katika masinagogi ya Uyahudi.