Luka 6

1Siku moja ya Sabato Yesu alikuwa akipita katika mashamba ya nafaka. Wanafunzi wake walikuwa wakichuma masuke, wakiyafikicha mikononi mwao na kula punje. 2Baadhi ya Mafarisayo walisema, “Kwa nini mnafanya jambo ambalo sheria inakataza siku ya Sabato?” 3Yesu aliwajibu, “Je, hamjasoma hata habari ya alichofanya Daudi wakati yeye na watu aliokuwa nao walipoona njaa? 4Aliingia katika nyumba ya Mungu, akaichukua mikate mitakatifu iliyowekwa mbele za Mungu, akala, akawapa na watu aliokuwa nao. Lakini sheria haimruhusu mtu yeyote kuila isipokuwa makuhani peke yao.” 5Kisha aliwaambia, “Mwana wa Adamu ni Bwana wa Sabato.”

6Katika Sabato nyingine Yesu aliingia katika sinagogi, akafundisha. Palikuwa na mtu ambaye mkono wake wa kulia ulikuwa umesinyaa. 7Waandishi na Mafarisayo walikuwa wakimvizia ili waone kama angeponya siku ya Sabato, wapate sababu ya kumshtaki. 8Lakini yeye aliyajua mawazo yao, akamwambia yule mtu mwenye mkono uliosinyaa, “Simama, uje hapa katikati.” Yule mtu akainuka, akasimama pale. 9Kisha Yesu akawaambia, “Niwaulize swali: je, siku ya Sabato sheria inaruhusu kutenda mema au kutenda mabaya? Kuokoa uhai au kuuangamiza?” 10Yesu aliwatazama wote waliokuwa pale, kisha akamwambia yule mtu, “Nyoosha mkono wako.” Akafanya hivyo, na mkono wake ukawa mzima tena. 11Lakini wao walijawa na hasira kali isiyo na busara, wakashauriana wao kwa wao ni nini wangemtendea Yesu.

12Siku hizo Yesu alikwenda mlimani kuomba, akakesha usiku mzima akimwomba Mungu. 13Kulipopambazuka, aliwaita wanafunzi wake, akachagua kumi na wawili kati yao, akawapa jina mitume. 14Hao walikuwa Simoni, ambaye alimpa jina Petro, na Andrea ndugu yake Simoni; Yakobo na Yohana; Filipo na Bartholomayo; 15Mathayo na Tomaso; Yakobo mwana wa Alfayo, na Simoni aliyejulikana kama Mzelote; 16Yuda mwana wa Yakobo, na Yuda Iskariote, yule aliyegeuka kuwa msaliti.

17Yesu alishuka mlimani pamoja nao, akasimama mahali tambarare. Kundi kubwa la wanafunzi wake lilikuwa limekusanyika pale, pamoja na umati mkubwa wa watu waliokuja kutoka kila sehemu ya Uyahudi, kutoka Yerusalemu, na kutoka pwani karibu na Tiro na Sidoni. 18Walikuja kumsikiliza na kuponywa magonjwa yao, na wale walioteswa na pepo wachafu wakapona. 19Kila mtu katika umati alijaribu kumgusa, kwa kuwa nguvu ilitoka kwake, ikawaponya wote.

20Kisha aliwatazama wanafunzi wake, akasema, “Heri yenu ninyi maskini, kwa kuwa ufalme wa Mungu ni wenu. 21Heri yenu ninyi mlio na njaa sasa, kwa kuwa mtashiba. Heri yenu ninyi mnaolia sasa, kwa kuwa mtacheka.

22Heri yenu watu wanapowachukia na kuwatenga, wanapowatukana na kulitupa jina lenu kama kitu kiovu, kwa sababu ya Mwana wa Adamu. 23Furahini siku hiyo itakapofika, mrukeruke kwa shangwe, kwa sababu ujira mkubwa unawangoja mbinguni. Mababu zao waliwatendea manabii mambo hayo hayo. 24Lakini ole wenu ninyi mlio matajiri, kwa sababu mmekwisha kupata faraja yenu yote. 25Ole wenu ninyi mlioshiba sasa, kwa kuwa mtaijua njaa. Ole wenu ninyi mnaocheka sasa, kwa kuwa mtaomboleza na kulia.

26Ole wenu watu wote wanapowasifu! Mababu zao waliwatendea manabii wa uongo vivyo hivyo.

27Lakini ninyi mnaosikiliza nawaambia hivi: wapendeni maadui wenu. Watendeeni mema wale wanaowachukia. 28Watakieni baraka wale wanaowalaani, na waombeeni wale wanaowatendea vibaya. 29Mtu akikupiga shavuni, mgeuzie na shavu lingine pia. Mtu akichukua koti lako, mwache achukue na shati lako pia. 30Endelea kumpa kila mtu anayekuomba kitu, na mtu akichukua kilicho chako, usimdai akurudishie. 31Kama vile mnavyotaka watu wawatendee ninyi, nanyi watendeeni vivyo hivyo.

32Mkiwapenda wale wanaowapenda, mnastahili shukrani gani? Hata wenye dhambi huwapenda wale wanaowapenda. 33Na mkiwatendea mema wale wanaowatendea mema, mnastahili shukrani gani? Hata wenye dhambi hufanya hivyo. 34Na mkiwakopesha watu mnaotarajia watawalipa, mnastahili shukrani gani? Hata wenye dhambi huwakopesha wenye dhambi wenzao ili walipwe kiasi kile kile. 35Badala yake, wapendeni maadui wenu, watendeeni mema, na mkopeshe bila kutarajia kurudishiwa chochote. Ndipo mtapata ujira mkubwa, nanyi mtakuwa wana wa Aliye Juu Kabisa, kwa kuwa yeye ni mwema kwa wasio na shukrani na kwa waovu. 36Onyesheni huruma, kama Baba yenu anavyoonyesha huruma. 37Msiwe watu wa kuwahukumu wengine, nanyi hamtahukumiwa kamwe. Msiwatie wengine hatiani, nanyi hamtatiwa hatiani. Wasameheni wengine makosa yao, nanyi mtasamehewa. 38Toeni, nanyi mtapewa: kipimo kilichojaa, kilichoshindiliwa, kilichotikiswa kikatulia, na kinachomwagika juu, kitamiminwa katika kunjo la vazi lenu. Kipimo mnachotumia kwa wengine ndicho kitakachotumiwa kwenu.”

39Pia aliwaambia mfano: “Je, kipofu anaweza kuwa kiongozi wa kipofu mwenzake? Wote wawili wataishia shimoni, sivyo? 40Hakuna mwanafunzi aliye juu ya mwalimu, lakini kila mwanafunzi aliyefundishwa kikamilifu atakuwa kama mwalimu wake. 41Kwa nini unakikodolea macho kibanzi kilicho katika jicho la ndugu yako, wala huoni gogo lililo katika jicho lako mwenyewe? 42Unawezaje kumwambia ndugu yako, ‘Ndugu yangu, hebu nikutoe kibanzi hicho jichoni,’ wakati huwezi kuliona gogo lililo katika jicho lako mwenyewe? Wewe mnafiki! Kwanza ondoa gogo katika jicho lako mwenyewe. Ndipo utaona vizuri vya kutosha kukiondoa kibanzi katika jicho la ndugu yako.

43Kwa kuwa mti wenye afya hauzai matunda mabovu, wala mti mbovu hauzai matunda mazuri. 44Kila mti hutambulika kwa matunda yake. Watu hawachumi tini kwenye miiba, wala hawachumi zabibu kwenye michongoma. 45Mtu mwema hutoa yaliyo mema kutoka katika hazina njema ya moyo wake, na mtu mwovu hutoa yaliyo maovu kutoka katika yaliyo maovu. Kwa maana kinywa hunena yale yanayoujaza moyo hadi kufurika.

46Kwa nini mnaendelea kuniita ‘Bwana, Bwana,’ wakati hamfanyi ninayowaambia? 47Nitawaonyesha jinsi alivyo mtu anayekuja kwangu, anayesikiliza maneno yangu na kuyatekeleza. 48Mtu huyo ni kama mtu anayejenga nyumba, aliyechimba, akaenda chini sana, akaweka msingi juu ya mwamba. Mafuriko yalipokuja, mto ukaigonga nyumba ile kwa nguvu, lakini haukuweza kuitikisa, kwa sababu ilikuwa imejengwa vizuri. 49Lakini mtu anayesikia na asitende ni kama mtu aliyejenga nyumba juu ya udongo mtupu bila msingi. Mto ulipoipiga kwa nguvu, mara ikaanguka, na nyumba ile ikaharibika kabisa.”