Luka 2

1Siku hizo Kaisari Augusto alitoa agizo kwamba ifanyike orodha ya watu wa himaya nzima. 2Huu ulikuwa uandikishaji wa kwanza, nao ulifanyika wakati Kwirinio alipokuwa gavana wa Siria. 3Watu wote waliondoka kwenda kuandikishwa, kila mtu katika mji wake.

4Basi Yusufu naye alipanda kutoka Nazareti ya Galilaya kwenda Yudea, mpaka mji wa Daudi, Bethlehemu, kwa kuwa alikuwa wa nyumba na ukoo wa Daudi. 5Alienda kuandikishwa pamoja na Mariamu, ambaye alikuwa amechumbiwa naye, naye alikuwa akitarajia mtoto. 6Walipokuwa huko, wakati wake wa kujifungua ulifika, 7akamzaa mwana wake wa kwanza. Akamfunga vizuri kwa vitambaa, akamlaza katika hori ya kulishia wanyama, kwa sababu chumba cha wageni hakikuwa na nafasi kwa ajili yao.

8Katika eneo hilo hilo kulikuwa na wachungaji waliokuwa wakiishi nje mbugani, wakipokezana kulinda kundi lao usiku kucha. 9Malaika wa Bwana alisimama mbele yao, na utukufu wa Bwana ukawaka kwa nuru kuwazunguka, wakashikwa na hofu kubwa. 10Lakini malaika akawaambia, “Msiogope. Ninawatangazia habari njema, furaha kubwa kwa ajili ya watu wote. 11Leo Mwokozi amezaliwa kwa ajili yenu katika mji wa Daudi. Yeye ni Kristo, Bwana. 12Ishara kwenu itakuwa hii: mtamwona mtoto mchanga, amefungwa vizuri kwa vitambaa, amelala katika hori ya kulishia wanyama.” 13Mara moja kundi kubwa la jeshi la mbinguni likaungana na malaika yule, likimsifu Mungu na kusema, 14“Utukufu kwa Mungu katika mbingu za juu kabisa, na duniani amani kwa watu anaowafadhili!”

15Malaika walipokwisha kurudi mbinguni, wachungaji waliambiana, “Haya, tuvuke mpaka Bethlehemu tuone jambo hili lililotokea, ambalo Bwana ametufahamisha.” 16Waliharakisha kwenda, wakawapata Mariamu na Yusufu, na mtoto mchanga akiwa amelazwa katika hori ya kulishia wanyama. 17Walipomwona mtoto, waliwaeleza watu wote yale waliyokuwa wameambiwa kuhusu yeye. 18Wote waliosikia walishangazwa na yale wachungaji waliyowaambia. 19Lakini Mariamu aliyatunza mambo haya yote, akiyawaza tena na tena moyoni mwake. 20Wachungaji walirejea wakimtukuza Mungu na kumhimidi kwa yote waliyokuwa wamesikia na kuona. Yote yalikuwa kama walivyoelezwa.

21Siku nane baadaye, wakati wa kumtahiri ulipofika, alipewa jina Yesu, jina ambalo malaika alikuwa amempa kabla mimba yake haijatungwa.

22Siku za kutakaswa kwao kwa mujibu wa sheria ya Musa zilipofika, walimpeleka Yerusalemu ili kumtoa kwa Bwana. 23Kwa maana sheria ya Bwana inasema, “Kila mzaliwa wa kwanza wa kiume ataitwa mtakatifu kwa Bwana.” 24Walikwenda pia kutoa dhabihu ambayo sheria ya Bwana inaagiza: “jozi ya hua au makinda mawili ya njiwa.”

25Basi, huko Yerusalemu aliishi mtu mmoja jina lake Simeoni, mnyofu na mchaji wa Mungu, aliyekuwa akiitamani siku ambayo Mungu angewafariji Israeli. Roho Mtakatifu alikuwa juu yake. 26Roho Mtakatifu alikuwa amemjulisha kwamba hatakufa mpaka amwone Kristo wa Bwana. 27Akiongozwa na Roho, Simeoni aliingia hekaluni. Wazazi wa Yesu walikuwa wakimleta mtoto ndani ili kumfanyia yale ambayo desturi ya sheria ilidai. 28Simeoni akamchukua mikononi mwake, akamhimidi Mungu, akisema, 29“Bwana Mkuu, sasa unamruhusu mtumishi wako aende zake kwa amani, kama ulivyoahidi, 30kwa kuwa kwa macho yangu nimeuona wokovu utokao kwako, 31ambao umeuandaa mbele ya watu wa kila taifa, waone: 32nuru ya ufunuo kwa mataifa, na utukufu wa watu wako Israeli.” 33Baba yake na mama yake walishangazwa na yale yaliyosemwa kuhusu yeye. 34Kisha Simeoni akawabariki, akamwambia Mariamu, mama yake, “Mtoto huyu amewekwa ili wengi katika Israeli waanguke na kuinuka tena. Atakuwa ishara ambayo watu wataipinga, 35na upanga utachoma nafsi yako mwenyewe pia, ili mawazo ya mioyo mingi yawekwe wazi.”

36Pia palikuwa na nabii wa kike, Ana binti wa Fanueli, wa kabila la Asheri. Alikuwa mzee sana. Aliolewa akiwa msichana, akaishi na mumewe miaka saba, 37na tangu hapo alikuwa mjane; sasa alikuwa na miaka themanini na minne. Hakuwahi kuondoka hekaluni, bali alimtumikia Mungu mchana na usiku kwa kufunga na kuomba. 38Wakati huo huo alifika, akamshukuru Mungu, akaendelea kuwaeleza habari zake wote waliokuwa wakisubiri Mungu aikomboe Yerusalemu.

39Walipokwisha kufanya kila kitu ambacho sheria ya Bwana iliagiza, walirudi Galilaya, Nazareti, mji wao.

40Mtoto akaendelea kukua na kupata nguvu. Alijaa hekima, na neema ya Mungu ilikaa juu yake.

41Kila mwaka wazazi wake walikuwa na desturi ya kupanda Yerusalemu kwa ajili ya sikukuu ya Pasaka. 42Alipokuwa na miaka kumi na miwili, walipanda kama ilivyokuwa desturi ya sikukuu. 43Siku za sikukuu zilipokwisha, walianza safari ya kurudi nyumbani, lakini kijana Yesu alibaki Yerusalemu bila wazazi wake kujua. 44Wakidhani kwamba alikuwa pamoja na wenzao njiani, walisafiri siku nzima; kisha wakaanza kumtafuta kati ya jamaa zao na watu waliowajua. 45Wasipompata, walirudi Yerusalemu, wakiendelea kumtafuta. 46Siku tatu baadaye walimpata hekaluni, akiwa ameketi pamoja na walimu, akiwasikiliza huku akiwauliza maswali. 47Kila aliyemsikia alishangazwa jinsi alivyoelewa mambo mengi na majibu aliyotoa. 48Wazazi wake walipomwona walipigwa na bumbuazi, na mama yake akamwambia, “Mwanangu, kwa nini umetutendea namna hii? Baba yako nami tumekuwa tukikutafuta, tukiwa na wasiwasi mwingi.” 49Akawaambia, “Kwa nini mlikuwa mkinitafuta? Hamkujua kwamba sina budi kuwa katika nyumba ya Baba yangu?” 50Lakini hawakuelewa maana ya maneno yake. 51Basi alishuka pamoja nao hadi Nazareti, akaishi chini ya mamlaka yao. Mama yake aliyatunza mambo haya yote moyoni mwake.

52Yesu aliendelea kukua katika hekima na kimo, akipata kibali kwa Mungu na kwa watu.