Luka 5

1Siku moja Yesu alipokuwa amesimama kando ya ziwa la Genesareti, umati wa watu ulikuwa ukimsonga ili kulisikia neno la Mungu. 2Akaona mashua mbili zimekaa ukingoni mwa ziwa. Wavuvi walikuwa wametoka ndani yake, wakiosha nyavu zao. 3Alipanda katika mojawapo ya mashua, ile iliyokuwa ya Simoni, akamwomba aisukume mbali kidogo kutoka ufuoni. Kisha akaketi, akawafundisha makundi ya watu akiwa ndani ya mashua. 4Alipokwisha kusema, alimwambia Simoni, “Ipeleke mashua mahali penye kina kirefu, kisha mshushe nyavu zenu mvue samaki.” 5Simoni alijibu, “Mkuu, tumefanya kazi kwa bidii usiku kucha, wala hatukupata kitu. Lakini kwa kuwa wewe umesema, nitazishusha nyavu.” 6Basi walifanya hivyo, wakazungushia nyavu kundi kubwa la samaki. Nyavu zao zikaanza kuchanika. 7Waliwapungia mikono wenzao waliokuwa katika mashua nyingine ili waje kuwasaidia. Nao wakaja, wakazijaza samaki mashua zote mbili hata zikaanza kuzama. 8Simoni Petro alipoona hayo, alijitupa chini magotini pa Yesu, akasema, “Bwana, niache! Mimi ni mtu aliyejaa dhambi.” 9Alisema hivyo kwa sababu yeye na wote waliokuwa pamoja naye walishangaa mno kwa wingi wa samaki waliowavua. 10Wana wa Zebedayo, Yakobo na Yohana, washirika wa Simoni, nao walishangaa vivyo hivyo. “Usiogope,” Yesu alimwambia Simoni. “Tangu sasa utakuwa ukivua watu.” 11Walipozifikisha mashua ufuoni, waliacha kila kitu, wakamfuata.

12Yesu alipokuwa katika mji mmoja, palikuwa na mtu aliyekuwa na ukoma mwili mzima. Alipomwona Yesu, alianguka kifudifudi, akamsihi, “Bwana, wewe unaweza kunifanya safi, ukipenda.” 13Alinyoosha mkono wake, akamgusa yule mtu. “Ndiyo, nataka,” akasema. “Uwe safi.” Saa ile ile ukoma ukamwacha. 14Yesu alimwagiza kwa nguvu asimwambie mtu yeyote. “Badala yake,” akasema, “nenda kwa kuhani akuchunguze. Kisha utoe sadaka ambayo Musa aliamuru kwa ajili ya kutakaswa kwako, iwe uthibitisho kwao.” 15Lakini habari za Yesu zilienea kuliko wakati wowote. Makundi makubwa ya watu yaliendelea kukusanyika ili kusikiliza na kuponywa magonjwa yao. 16Lakini yeye alikuwa akijiondoa mara kwa mara, akaenda mahali pa nyika ili kuomba.

17Siku moja kati ya siku hizo, alipokuwa akifundisha, Mafarisayo na walimu wa sheria walikuwa wameketi pale. Walikuwa wametoka katika vijiji vyote vya Galilaya, na Uyahudi, na Yerusalemu. Nguvu za Bwana zilikuwa pamoja naye ili aponye. 18Mara watu fulani walifika wamembeba juu ya machela mtu aliyepooza. Walitaka kumwingiza ndani na kumweka mbele ya Yesu. 19Umati haukuwaachia njia yoyote ya kumwingiza. Basi walipanda juu ya paa, wakaondoa baadhi ya vigae, wakamshusha pamoja na machela yake mpaka katikati ya watu wote, mbele ya Yesu. 20Yesu alipoona imani yao, alisema, “Rafiki yangu, dhambi zako zimesamehewa.” 21Waandishi na Mafarisayo walianza kujadiliana wao kwa wao: “Mtu huyu ni nani, anayesema makufuru namna hii? Ni nani aliye na uwezo wa kusamehe dhambi? Mungu peke yake!” 22Yesu alijua yaliyokuwa yakipita mawazoni mwao, akawajibu, “Mbona mnajadiliana hivi mioyoni mwenu? 23Ni lipi rahisi zaidi kusema: ‘Dhambi zako zimesamehewa,’ au ‘Simama, utembee’? 24Lakini ili mwone kwamba Mwana wa Adamu ana mamlaka duniani ya kusamehe dhambi,” alimwambia yule aliyepooza, “nakuambia, simama, chukua machela yako, uende nyumbani kwako.” 25Mara moja yule mtu alisimama mbele yao, akachukua machela aliyokuwa amelalia, akaenda nyumbani kwake akimtukuza Mungu. 26Wote walishikwa na mshangao mkubwa. Wakamtukuza Mungu, na wakiwa wamejaa uchaji, wakasema, “Tuliyoyaona leo hayaaminiki!”

27Baadaye Yesu alitoka, akamwona mtoza ushuru mmoja aitwaye Lawi, ameketi mahali alipokuwa akitoza ushuru. Yesu akamwambia, “Nifuate.” 28Aliinuka, akaacha kila kitu, akaanza kumfuata.

29Kisha Lawi alimwandalia Yesu karamu kubwa nyumbani kwake. Umati mkubwa wa watoza ushuru na watu wengine walikuwa wageni mezani pamoja nao. 30Jambo hilo liliwafanya Mafarisayo na waandishi wao wenyewe kunung’unika. Wakawaambia wanafunzi wake, “Mnawezaje kula na kunywa pamoja na watoza ushuru na wenye dhambi?” 31“Watu walio wazima hawana kazi na daktari,” Yesu aliwajibu, “bali wagonjwa ndio wanaomhitaji. 32Nimekuja kuwaita wenye dhambi ili watubu, wala si wenye haki.”

33Kisha walimwambia, “Wanafunzi wa Yohana hufunga mara nyingi na kuomba dua, na wanafunzi wa Mafarisayo hufanya vivyo hivyo. Lakini wanafunzi wako wanaendelea kula na kunywa.” 34Aliwajibu, “Je, mngewalazimisha wageni wa harusi kufunga wakati bwana harusi bado yuko pamoja nao? 35Lakini siku zinakuja ambapo bwana harusi ataondolewa kutoka kwao. Hapo, siku hizo, watafunga.” 36Aliwaambia pia mfano: “Hakuna mtu anayekata kiraka kutoka kwenye vazi jipya ili akishone juu ya vazi kuukuu. Mtu akifanya hivyo, ataharibu vazi jipya, na kiraka cha lile jipya hakitapatana na vazi kuukuu. 37Wala hakuna mtu anayehifadhi divai mpya katika viriba vikuukuu. Hiyo ingefanya viriba vipasuke; divai mpya ingemwagika, na viriba vingeharibika. 38Badala yake, divai mpya lazima iwekwe katika viriba ambavyo havijatumika. 39Na hakuna mtu ambaye amekuwa akinywa divai ya zamani anayetaka mpya. Husema, ‘Ya zamani ni nzuri.’”