Luka 7

1Yesu alipomaliza kuwaambia watu waliokuwa wakisikiliza mambo hayo yote, aliingia Kapernaumu.

2Kulikuwa na akida mmoja ambaye mtumishi wake alikuwa mpendwa sana kwake, na mtumishi huyo alikuwa mgonjwa, karibu kufa. 3Aliposikia habari za Yesu, alimtumia baadhi ya wazee wa Wayahudi ili wamwombe aje kuyaokoa maisha ya mtumishi wake. 4Walifika kwa Yesu, wakamsihi kwa bidii, wakisema, “Mtu huyu anastahili umfanyie jambo hili. 5Analipenda taifa letu, na yeye ndiye aliyetujengea sinagogi letu.” 6Basi Yesu akaenda pamoja nao. Alipokuwa karibu kufika nyumbani, akida aliwatuma rafiki zake wamwambie, “Bwana, usijisumbue. Sistahili uingie chini ya paa langu. 7Ndiyo sababu sikujiona kuwa ninafaa kuja kwako mimi mwenyewe. Toa amri tu, na mtumishi wangu apone. 8Kwa maana mimi mwenyewe ninatumika chini ya watu wenye mamlaka juu yangu, na nina askari walio chini ya amri yangu. Nikimwambia mmoja, ‘Nenda!’ huenda; na mwingine, ‘Njoo hapa!’ huja; na mtumishi wangu, ‘Fanya hivi!’ hufanya.” 9Yesu aliposikia hayo, alimshangaa mtu huyo. Akaugeukia umati wa watu uliokuwa ukimfuata, akasema, “Nawaambia, sijaona imani kubwa kama hii hata katika Israeli.” 10Wajumbe waliporudi nyumbani, walimkuta mtumishi akiwa mzima.

11Muda mfupi baadaye Yesu alikwenda katika mji mmoja uitwao Naini. Wanafunzi wake walikwenda pamoja naye, na umati mkubwa wa watu pia. 12Alipolikaribia lango la mji, mtu aliyekufa alikuwa akibebwa kupelekwa nje. Alikuwa mwana pekee wa mama yake, naye mama huyo alikuwa mjane. Umati mkubwa wa watu wa mji ulikuwa pamoja naye. 13Bwana alipomwona, moyo wake ulijaa huruma kwa ajili yake, akamwambia, “Acha kulia.” 14Kisha akasogea, akaigusa machela, na wale waliokuwa wakiibeba wakasimama. Akasema, “Kijana, nakuambia, amka!” 15Yule aliyekuwa amekufa aliketi, akaanza kuzungumza, na Yesu akamrudisha kwa mama yake. 16Wote walijawa na hofu kuu, wakamtukuza Mungu, wakisema, “Nabii mkuu ametokea kati yetu!” na, “Mungu amekuja kuwasaidia watu wake!” 17Habari hizi kumhusu yeye zilienea katika Uyahudi wote na katika eneo lote lililouzunguka.

18Wanafunzi wa Yohana walimweleza mambo hayo yote. Basi Yohana aliwaita wanafunzi wake wawili, 19akawatuma kwa Bwana wamwulize, “Je, wewe ndiye yule atakayekuja, au tumsubiri mtu mwingine?” 20Wale watu walipomfikia, walisema, “Yohana Mbatizaji ametutuma kwako tukuulize, ‘Je, wewe ndiye yule atakayekuja, au tumsubiri mtu mwingine?’” 21Wakati huo huo aliwaponya watu wengi waliokuwa na magonjwa, maradhi yenye maumivu makali na pepo wabaya, na akawapa vipofu wengi zawadi ya kuona. 22Basi aliwajibu, “Rudini mkamweleze Yohana mambo mliyoyaona na kuyasikia. Vipofu wanaona tena, viwete wanatembea, wenye ukoma wanafanywa safi, viziwi wanasikia, wafu wanafufuliwa, na maskini wanasikia habari njema. 23Na heri mtu yeyote asiyepata ndani yangu sababu ya kuniacha.”

24Wajumbe wa Yohana walipoondoka, Yesu alianza kuzungumza na umati wa watu kuhusu Yohana. “Mlikwenda nyikani kuona nini? Mwanzi unaoyumba kwa upepo? 25Kama sivyo, mlikwenda kuona nini? Mtu aliyevaa mavazi laini ya fahari? Wanaovaa mavazi ya fahari na kuishi maisha ya anasa hupatikana katika majumba ya wafalme. 26Basi, mlitoka kwenda kuona nini? Kumwona nabii? Ndiyo, nawaambia, na zaidi sana kuliko nabii. 27Yeye ndiye ambaye Maandiko yanasema habari zake, ‘Ninamtuma mjumbe wangu atangulie mbele yako; yeye ataitayarisha njia yako mbele yako.’ 28Nawaambia, kati ya wote waliozaliwa na wanawake, hakuna aliye mkuu kuliko Yohana. Hata hivyo, aliye mdogo kabisa katika ufalme wa Mungu ni mkuu kuliko yeye.” 29Watu wote waliosikia maneno haya, hata watoza ushuru, walikubali kwamba Mungu yuko sahihi, kwa kuwa walikuwa wamebatizwa kwa ubatizo wa Yohana. 30Lakini Mafarisayo na wataalamu wa sheria walikataa kile ambacho Mungu alikusudia kwa ajili yao, kwa kuwa hawakukubali kubatizwa na Yohana.

31Yesu aliendelea kusema, “Basi niwafananishe watu wa kizazi hiki na nini? Wao ni kama nini? 32Wao ni kama watoto wadogo wanaoketi uwanjani mjini na kuitana wao kwa wao, ‘Tuliwapigia filimbi muziki wa harusi, lakini hamkutaka kucheza. Tuliimba wimbo wa maziko, lakini hamkutaka kulia.’ 33Kwa maana Yohana Mbatizaji amekuja, hali mkate wala hanywi divai, nanyi mnasema, ‘Ana pepo ndani yake.’ 34Mwana wa Adamu amekuja akila na kunywa, nanyi mnasema, ‘Mwangalieni mtu huyu! Ni mlafi na mlevi, rafiki wa watoza ushuru na wenye dhambi!’ 35Lakini hekima inaonyeshwa kuwa sahihi na wote walio watoto wake.”

36Mmoja wa Mafarisayo alimkaribisha Yesu kula chakula pamoja naye. Basi Yesu akaingia nyumbani kwa yule Farisayo, akakaa mahali pake mezani. 37Basi kulikuwa na mwanamke mmoja katika mji ule ambaye alikuwa mwenye dhambi. Alipojua kwamba Yesu alikuwa mezani nyumbani mwa yule Farisayo, alikuja na chupa ya alabasta yenye manukato. 38Akasimama nyuma yake, karibu na miguu yake, akilia, akaanza kuilowesha miguu yake kwa machozi yake. Akaipangusa kwa nywele za kichwa chake, akaibusu miguu yake tena na tena, akaipaka manukato. 39Yule Farisayo aliyemwalika alipoona hayo, alisema moyoni, “Kama mtu huyu angekuwa nabii, angejua mwanamke huyu anayemgusa ni nani, na ni wa namna gani: ni mwenye dhambi.” 40Yesu alimjibu, “Simoni, kuna jambo nataka kukuambia.” Akajibu, “Sema, Mwalimu.” 41Yesu alisema, “Mkopeshaji mmoja alikuwa na watu wawili waliokuwa na deni lake. Mmoja alikuwa anadaiwa dinari mia tano, na mwingine hamsini. 42Hakuna hata mmoja wao aliyeweza kumlipa, kwa hiyo aliwafutia wote wawili madeni yao bila malipo. Basi ni yupi kati ya hao wawili atakayempenda zaidi?” 43Simoni alijibu, “Nadhani ni yule aliyefutiwa deni kubwa zaidi.” Yesu alimwambia, “Umeamua sawa.” 44Kisha akamgeukia yule mwanamke, akamwambia Simoni, “Je, unamwona mwanamke huyu? Nilipoingia nyumbani mwako, hukunipa maji ya kunawa miguu yangu. Lakini yeye ameilowesha miguu yangu kwa machozi yake na kuipangusa kwa nywele zake. 45Hukunikaribisha kwa busu. Lakini tangu nilipoingia, yeye hajaacha kuibusu miguu yangu. 46Hukukipaka kichwa changu mafuta ya zeituni, lakini yeye ameipaka miguu yangu manukato ya thamani. 47Kwa hiyo nakuambia, dhambi zake, ingawa ni nyingi, zimesamehewa; ndiyo maana ameonyesha upendo mwingi namna hii. Lakini mtu anayesamehewa kidogo hupenda kidogo.” 48Kisha akamwambia, “Dhambi zako zimekwisha kusamehewa.” 49Wale wengine waliokuwa mezani pamoja naye walianza kuambiana, “Mtu huyu ni nani, hata anasamehe dhambi?” 50Lakini Yesu alimwambia yule mwanamke, “Imani yako imekuokoa. Nenda kwa amani.”