Luka 19

1Yesu aliingia Yeriko, akawa anapita katikati ya mji huo. 2Huko kulikuwa na mtu mmoja jina lake Zakayo. Alikuwa mkuu wa watoza ushuru, tena alikuwa tajiri. 3Alitaka sana kumwona Yesu ni nani, lakini hakuweza kuona kwa sababu ya umati wa watu, kwa kuwa alikuwa mtu mfupi. 4Kwa hiyo alikimbia mbele, akapanda mkuyu ili amwone, kwa sababu Yesu angepita njia hiyo. 5Yesu alipofika mahali hapo, alitazama juu, akamwambia, “Zakayo, shuka upesi. Leo ndiyo siku ambayo lazima nikae nyumbani kwako.” 6Basi alishuka upesi, akamkaribisha kwa furaha. 7Kila mtu aliyeona jambo hilo alianza kunung’unika na kulalamika. “Amekwenda kuwa mgeni nyumbani kwa mtu mwenye dhambi!” wakasema. 8Lakini Zakayo alisimama, akamwambia Bwana, “Bwana, tazama: nusu ya mali yangu ninawapa maskini. Na kama nimemdhulumu mtu yeyote kitu, ninamlipa mara nne.” 9Yesu akamwambia, “Leo wokovu umeifikia jamaa hii. Mtu huyu naye ni mmoja wa wana wa Ibrahimu. 10Mwana wa Adamu alikuja kutafuta kilichopotea na kukiokoa.”

11Walipokuwa wakisikiliza maneno hayo, Yesu aliendelea, akawaambia mfano. Alifanya hivyo kwa sababu alikuwa karibu na Yerusalemu, nao walidhani kwamba ufalme wa Mungu ungetokea mara moja. 12Basi akasema, “Mtu mmoja wa jamaa ya heshima alisafiri kwenda nchi ya mbali ili afanywe mfalme huko, kisha arudi nyumbani. 13Kabla ya kuondoka, aliwaita watumishi wake kumi, akawapa mina kumi, kila mmoja mina moja. Akawaambia, ‘Zitumieni fedha hizi kufanya biashara mpaka nitakaporudi.’ 14Lakini watu wa nchi yake walimchukia. Wakatuma wajumbe wamfuate waseme, ‘Hatutaki mtu huyu awe mfalme wetu.’ 15Alifanywa mfalme, akarudi nyumbani. Kisha akaagiza waitwe wale watumishi aliokuwa amewapa fedha, ili ajue kila mmoja amepata faida gani kwa biashara yake. 16Yule wa kwanza akaja, akasema, ‘Bwana, mina yako imeleta faida ya mina kumi.’ 17Akamjibu, ‘Hongera, mtumishi mwema! Umekuwa mwaminifu katika jambo dogo sana, kwa hiyo utakuwa na mamlaka juu ya miji kumi.’ 18Yule wa pili akaja, akasema, ‘Bwana, mina yako imeleta mina tano.’ 19Huyu naye akamwambia, ‘Wewe utakuwa juu ya miji mitano.’ 20Kisha mwingine akaja, akasema, ‘Bwana, mina yako hii hapa. Niliiweka nikaihifadhi ndani ya kitambaa. 21Nilikuogopa, kwa sababu wewe ni mtu mkali. Unachukua kile ambacho hukuweka, na kuvuna kile ambacho hukupanda.’ 22Akamjibu, ‘Maneno yako mwenyewe yanakuhukumu, wewe mtumishi mwovu! Kumbe ulijua kwamba mimi ni mtu mkali, ninayechukua kile ambacho sikuweka na kuvuna kile ambacho sikupanda? 23Basi kwa nini hukuweka fedha zangu benki? Ndipo nikirudi, ningezichukua pamoja na riba.’ 24Kisha akawaambia wale waliokuwa wamesimama pale, ‘Mnyang’anyeni mina hiyo, mkampe yule mwenye mina kumi.’ 25Wakamwambia, ‘Bwana, tayari ana mina kumi!’ 26‘Nawaambia, kila aliye na kitu ataongezewa. Lakini asiye na kitu atanyang’anywa hata kile alicho nacho. 27Na kuhusu adui zangu hawa ambao hawakutaka niwe mfalme wao, waleteni hapa, mkawaue mbele yangu.’”

28Baada ya kusema hayo, Yesu aliendelea mbele yao, akipanda kwenda Yerusalemu.

29Alipokaribia Bethfage na Bethania, karibu na kilima kiitwacho Mlima wa Mizeituni, aliwatuma wanafunzi wawili. 30Akawaambia, “Nendeni katika kijiji kilicho mbele yenu. Mtakapoingia humo, mtamkuta mwana-punda amefungwa, ambaye hajawahi kupandwa na mtu yeyote. Mfungueni, mmlete hapa. 31Mtu yeyote akiwauliza, ‘Kwa nini mnamfungua?’ mwambieni, ‘Bwana anamhitaji.’” 32Wale waliotumwa walikwenda, wakakuta mambo yote kama alivyowaambia. 33Walipokuwa wakimfungua mwana-punda, wenye mwana-punda waliwauliza, “Kwa nini mnamfungua mwana-punda?” 34Wakajibu, “Bwana anamhitaji.” 35Walimleta mwana-punda kwa Yesu, wakatandika mavazi yao ya nje juu yake, wakamsaidia Yesu kupanda. 36Alipokuwa akiendelea na safari, watu walitandika mavazi yao ya nje barabarani. 37Alipokaribia mji, mahali ambapo njia inateremka kutoka Mlima wa Mizeituni, umati wote wa wanafunzi wake ulianza kumsifu Mungu kwa furaha na kwa sauti kubwa, kwa sababu ya matendo yote ya nguvu waliyoyaona. 38Walipaza sauti, “Amebarikiwa Mfalme anayekuja kwa jina la Bwana! Amani mbinguni, na utukufu huko juu kabisa!” 39Baadhi ya Mafarisayo waliokuwa katika umati walimwambia, “Mwalimu, waambie wanafunzi wako waache!” 40Akajibu, “Nawaambia, kama watu hawa wangenyamaza, mawe yenyewe yangepiga kelele.”

41Alipokaribia zaidi na kuuona mji, aliulilia. 42Akasema, “Laiti wewe nawe ungalitambua katika siku hii mambo yaletayo amani! Lakini sasa yamefichwa usiyaone. 43Kwa maana wakati unakuja ambapo adui zako watajenga ukuta wa kukuzingira. Watakuzunguka na kukubana kila upande. 44Watakusawazisha na ardhi, wewe na watoto wako walio ndani yako. Hawataacha jiwe juu ya jiwe jingine ndani yako, kwa sababu hukutambua wakati ambapo Mungu alikuja kukutembelea.”

45Kisha Yesu aliingia hekaluni, akaanza kuwafukuza watu waliokuwa wakiuza humo. 46Akawaambia, “Maandiko yanasema, ‘Nyumba yangu itakuwa nyumba ya maombi.’ Lakini ninyi mmeigeuza kuwa maficho ya wanyang’anyi.”

47Kila siku alikuwa akifundisha hekaluni. Wakuu wa makuhani na waandishi walitaka kumwua, na viongozi wa watu vilevile. 48Lakini hawakupata njia ya kufanya hivyo, kwa sababu watu wote walishikamana naye, wakisikiliza kila neno.