Luka 18

1Yesu aliwaambia mfano kuhusu jinsi wanavyopaswa kuomba wakati wote bila kukata tamaa. 2Akasema, “Katika mji mmoja kulikuwa na hakimu ambaye hakumwogopa Mungu, wala hakumheshimu mtu yeyote. 3Katika mji huo pia palikuwa na mjane aliyemwendea tena na tena, akisema, ‘Uamue kesi yangu kwa haki dhidi ya mpinzani wangu.’ 4Kwa muda alikataa. Lakini baadaye alijisemea, ‘Mimi simwogopi Mungu, wala simjali mtu yeyote. 5Hata hivyo, mjane huyu ananiudhi mno, kwa hiyo nitamtendea haki. La sivyo, ataendelea kuja mpaka anichoshe kabisa.’” 6Bwana alisema, “Sikilizeni anachosema yule hakimu dhalimu. 7Basi, hakika Mungu atawapatia hukumu ya haki watu wake waliochaguliwa, wanapomlilia mchana na usiku. Je, atachelewa kuwasaidia? 8Nawaambia, atawatendea haki, tena bila kukawia. Hata hivyo, Mwana wa Adamu atakapokuja, je, atakuta imani ya namna hii duniani?” 9Kulikuwa na watu fulani waliojiamini wenyewe, wakiwa na hakika kwamba ni wenye haki, nao waliwaona wengine wote kuwa duni. Yesu aliwaambia mfano huu: 10“Wanaume wawili walikwenda juu hekaluni kuomba. Mmoja alikuwa Mfarisayo, na mwingine alikuwa mtoza ushuru. 11Mfarisayo alisimama, akaomba hivi juu yake mwenyewe: ‘Mungu, nakushukuru kwamba sifanani na wanadamu wengine walio matapeli, wahalifu na wazinzi, wala sifanani na huyu mtoza ushuru. 12Kila wiki ninafunga siku mbili, na ninatoa sehemu ya kumi ya kila kitu ninachopokea.’ 13Lakini yule mtoza ushuru alibaki amesimama kwa mbali, wala hakutaka hata kutazama juu mbinguni. Badala yake aliendelea kujipiga kifua, akisema, ‘Mungu, nihurumie mimi, mwenye dhambi!’ 14Nawaambia, ni huyu, wala si yule mwingine, aliyerudi nyumbani akiwa amekubaliwa na Mungu kuwa mwenye haki. Kwa maana kila anayejiinua atashushwa chini, na anayejinyenyekeza atainuliwa.”

15Watu walikuwa wakimletea hata watoto wao wachanga ili awaguse. Wanafunzi walipoona hivyo, wakaanza kuwakemea. 16Lakini Yesu aliwaita, akasema, “Waacheni watoto wadogo wanijie. Msijaribu kuwazuia. Ufalme wa Mungu ni mali ya watu walio kama wao. 17Kweli nawaambia, mtu yeyote asiyeukaribisha ufalme wa Mungu jinsi mtoto anavyoukaribisha, hataingia ndani yake kamwe.”

18Kiongozi mmoja alimwuliza, “Mwalimu mwema, nifanye nini ili niurithi uzima wa milele?” 19Yesu alijibu, “Kwa nini unaniita mwema? Hakuna aliye mwema ila Mungu peke yake. 20Unazijua amri: ‘Usizini. Usiue. Usiibe. Usitoe ushahidi wa uongo. Waheshimu baba yako na mama yako.’” 21Yule mtu alijibu, “Nimezishika amri hizi zote tangu ujana wangu.” 22Yesu aliposikia hayo, alimwambia, “Bado unakosa jambo moja. Uza mali yako yote, uwagawie maskini fedha hizo. Ndipo utakuwa na hazina mbinguni. Baada ya hapo, njoo unifuate.” 23Yule mtu aliposikia maneno hayo alijawa na huzuni, kwa maana alikuwa na utajiri mwingi.

24Yesu alipoona hivyo, alisema, “Ni jambo gumu kama nini kwa wenye mali kuingia katika ufalme wa Mungu! 25Kwa kweli, ngamia angepita katika tundu la sindano kwa urahisi zaidi kuliko mtu tajiri angeingia katika ufalme wa Mungu.”

26Wale waliokuwa wakisikiliza waliuliza, “Basi ni nani anayeweza kuokolewa?” 27Yesu alijibu, “Kile ambacho binadamu hawawezi kufanya, kwa Mungu kinawezekana.”

28Petro alisema, “Lakini sisi tumeacha vyote tulivyokuwa navyo, tukakufuata!” 29Aliwajibu, “Kweli nawaambia, mtu yeyote aliyeacha nyumba, mke, ndugu, wazazi au watoto kwa ajili ya ufalme wa Mungu, 30hakika atapewa zaidi sana katika maisha haya, na katika zama zijazo atapokea uzima wa milele.”

31Aliwachukua wale Kumi na Wawili kando, akawaambia, “Sasa tunapanda kwenda Yerusalemu, na kila kitu ambacho manabii waliandika kuhusu Mwana wa Adamu kitatimia. 32Atakabidhiwa kwa watu wa mataifa, nao watamdhihaki, watamtendea kwa aibu na kumtemea mate. 33Baada ya kumpiga mijeledi watamuua, na siku ya tatu atafufuka.” 34Lakini wale Kumi na Wawili hawakuelewa lolote kati ya hayo. Maneno yake yalifichika kwao, wala hawakutambua alichomaanisha.

35Yesu alipokuwa akikaribia Yeriko, kipofu mmoja alikuwa ameketi pale kando ya njia, akiomba msaada. 36Aliposikia umati wa watu ukipita, aliuliza kuna nini. 37Walimwambia, “Yesu wa Nazareti anapita.” 38Basi alipiga kelele, “Yesu, Mwana wa Daudi, nihurumie!” 39Watu waliokuwa mbele walimkemea vikali anyamaze, lakini yeye alipaza sauti zaidi na zaidi, “Mwana wa Daudi, nihurumie!” 40Yesu alisimama, akaamuru wamlete yule mtu kwake. Yule mtu alipokaribia, Yesu alimwuliza, 41“Ungependa nikufanyie nini?” Alijibu, “Bwana, nataka kuona tena.” 42Yesu alimwambia, “Ona tena. Imani yako imekuponya.” 43Mara moja aliweza kuona, akamfuata, akimpa Mungu utukufu. Watu wote walipoona yaliyotokea, walimsifu Mungu.