Luka 21

1Yesu aliinua macho, akawaona matajiri wakitumbukiza matoleo yao katika masanduku ya sadaka ya hekalu. 2Akamwona pia mjane mmoja mhitaji akitumbukiza sarafu mbili ndogo za shaba. 3Kisha akasema, “Kweli nawaambia, mjane huyu maskini ametoa zaidi kuliko wengine wote. 4Wote hao walitoa kutokana na ziada yao. Lakini yeye, katika uhitaji wake, ametoa kila kitu alichokuwa nacho cha kuishi.”

5Baadhi ya watu walikuwa wakizungumza juu ya hekalu, jinsi mawe yake yalivyokuwa mazuri, na jinsi lilivyopambwa kwa zawadi zilizotolewa kwa Mungu. Yesu akasema, 6“Haya yote mnayatazama sasa. Lakini siku zinakuja ambapo yote yatabomolewa, wala hakuna jiwe litakalobaki juu ya jingine.”

7Wakamwuliza swali: “Mwalimu, mambo haya yatatokea lini? Na kutakuwa na ishara gani yatakapokaribia kutokea?” 8Akajibu, “Jihadharini mtu asiwapotoshe. Wengi watakuja wakilidai jina langu na kusema, ‘Mimi ndiye!’ na, ‘Wakati umekaribia!’ Msiwafuate. 9Mtakaposikia habari za vita na maasi, msifadhaike. Hayo yote lazima yatokee kwanza, lakini haimaanishi kwamba mwisho utakuja mara moja.” 10Kisha akaendelea kuwaambia, “Taifa moja litapigana na taifa jingine, na ufalme mmoja na ufalme mwingine. 11Kutakuwa na matetemeko makubwa ya ardhi, na mahali pamoja baada ya pengine njaa na magonjwa ya kuambukiza. Mambo ya kutisha yatatokea, na ishara kubwa zitaonekana angani.

12Lakini kabla ya hayo yote watawakamata na kuwatesa. Watawakabidhi kwa masinagogi na kuwatia magerezani, nanyi mtapelekwa mbele ya wafalme na wakuu wa mikoa kwa ajili ya jina langu. 13Hii itawapa nafasi ya kutoa ushuhuda. 14Kwa hiyo kusudieni mioyoni mwenu kwamba hamtaandaa utetezi wenu mapema. 15Mimi mwenyewe nitawapa maneno na hekima ya kusema, na hakuna hata mmoja wa wapinzani wenu atakayeweza kuyapinga wala kuyajibu. 16Mtakabidhiwa hata na wazazi wenu wenyewe na ndugu zenu, na jamaa zenu na rafiki zenu, nao watawaua baadhi yenu. 17Mtachukiwa na kila mtu kwa sababu ya jina langu. 18Hata hivyo, hata unywele mmoja wa kichwa chenu hautapotea. 19Simameni imara mpaka mwisho, na hivyo mjipatie maisha yenu.

20Mtakapoona Yerusalemu imezungukwa na majeshi yaliyopiga kambi pande zote, basi jueni kwa hakika kwamba itaangamizwa hivi karibuni. 21Hapo watu walioko Uyahudi wakimbilie milimani. Walio ndani ya mji watoke, na walio mashambani wasirudi mjini. 22Kwa maana hizi ni siku za adhabu, ambapo yote yaliyoandikwa yatatimia. 23Ole wao wanawake wenye mimba na wale wanaonyonyesha watoto katika siku hizo! Taabu kubwa itaikumba nchi hii, na ghadhabu itawajia watu hawa. 24Watauawa kwa upanga na kuchukuliwa mateka kwenda katika mataifa yote. Yerusalemu itakanyagwa na watu wa mataifa mpaka nyakati za watu wa mataifa zitakapomalizika.

25Kutakuwa na ishara katika jua, mwezi na nyota. Duniani mataifa yatakuwa katika dhiki, yasijue la kufanya, bahari inapovuma na kuchafuka. 26Watu watakosa nguvu kwa hofu wanaposubiri yale yanayoujia ulimwengu, kwa maana nguvu za mbinguni zitatikiswa. 27Ndipo watu watakapomwona Mwana wa Adamu akija katika wingu, akiwa na nguvu na utukufu mkuu. 28Mambo haya yatakapoanza tu kutokea, simameni wima na kutazama juu, kwa maana siku ya ukombozi wenu imekaribia sana.”

29Akawapa mfano: “Utazameni mtini, na miti yote. 30Inapoanza kuchipua majani, mnaitazama tu, nanyi mnajua kwamba kiangazi kimekaribia. 31Ndivyo ilivyo kwenu pia. Mtakapoona mambo haya yakitokea, jueni kwa hakika kwamba ufalme wa Mungu umekaribia. 32Kweli nawaambia, mambo haya yote yatatokea kabla kizazi hiki hakijatoweka. 33Mbingu na dunia zitatoweka, lakini maneno yangu yatadumu milele.

34Jihadharini, mioyo yenu isije ikafanywa mizito na sherehe za anasa, ulevi na wasiwasi wa maisha ya kila siku, na siku ile ikawajia ghafla 35kama mtego unaonasa. Itawajia wote wanaoishi popote duniani. 36Kaeni macho nyakati zote, na ombeni mpewe nguvu ya kuvuka salama katika yote yatakayotokea, na kusimama mbele ya Mwana wa Adamu.”

37Mchana Yesu alikuwa akifundisha hekaluni. Usiku alikuwa akitoka nje ya mji na kulala kwenye kilima kiitwacho Mlima wa Mizeituni. 38Alfajiri watu wote walikuwa wakimjia hekaluni ili kumsikiliza.