Luka 8

1Muda mfupi baadaye Yesu alizunguka katika mji mmoja baada ya mwingine na kijiji kimoja baada ya kingine, akihubiri na kutangaza habari njema za ufalme wa Mungu. Wale Kumi na Wawili walikuwa pamoja naye, 2na pia wanawake kadhaa waliokuwa wameponywa kutoka kwa pepo wabaya na magonjwa: Mariamu, anayeitwa Magdalene, ambaye pepo saba walikuwa wametoka ndani yake; 3Yoana, mke wa Kuza, msimamizi wa Herode; Susana; na wengine wengi. Wanawake hao walikuwa wakiwahudumia kwa kutumia mali yao wenyewe.

4Umati mkubwa ulikuwa ukikusanyika, na watu kutoka mji mmoja baada ya mwingine walikuwa wakimjia. Naye akawaambia mfano huu: 5“Mpandaji mmoja alitoka kwenda kutawanya mbegu zake. Alipokuwa akipanda, baadhi ya mbegu zilianguka kando ya njia, zikakanyagwa, nao ndege wakazila zote. 6Nyingine ilianguka juu ya mwamba, na mara ilipochipuka ikanyauka, kwa sababu ardhi haikuwa na unyevu. 7Nyingine ilianguka kati ya miiba, nayo miiba ikaota pamoja nayo, ikaisonga. 8Na nyingine ilianguka kwenye udongo mzuri, ikaota, ikatoa mavuno mara mia.” Alipokuwa akisema hayo, alipaza sauti, “Yeyote mwenye masikio ya kusikia, na asikilize!”

9Wanafunzi wake walimwuliza maana ya mfano huo. 10Akasema, “Ninyi mmejaliwa kuzijua siri za ufalme wa Mungu, lakini wengine wanazipokea kwa mifano, ili watazame lakini wasione, wasikilize lakini wasielewe.

11Maana ya mfano huo ni hii: mbegu ni neno la Mungu. 12Wale wa kando ya njia ni watu waliosikia, lakini kisha Ibilisi huja na kulinyakua neno kutoka mioyoni mwao, ili wasiamini na kuokolewa. 13Wale walio juu ya mwamba ni watu ambao wanaposikia neno hulipokea kwa furaha, lakini hawana mizizi. Huamini kwa muda fulani, na wakati wa kujaribiwa unapofika, hurudi nyuma. 14Zile zilizoanguka kati ya miiba ni watu wanaosikia, lakini wanapoendelea na maisha, masumbufu, mali na anasa za maisha huwasonga, hata matunda yao hayakomai kamwe. 15Zile zilizo katika udongo mzuri ni watu wenye moyo mwema na mnyoofu. Wanalisikia neno, wanalishika, na kwa saburi wanazaa matunda.

16Hakuna mtu anayewasha taa kisha akaifunika kwa bakuli au kuiweka chini ya kitanda. Taa huwekwa juu ya kinara, ili wanaoingia wauone mwanga wake. 17Kila kilichofichwa kitaonyeshwa waziwazi, na kila kilichowekwa siri hakika kitajulikana na kuletwa nuruni. 18Basi zingatieni jinsi mnavyosikiliza. Walio na kitu watapewa zaidi, na wasio na kitu watanyang’anywa hata kile wanachoonekana kuwa nacho.”

19Mama yake na ndugu zake walikuja kwake, lakini umati uliwazuia wasimfikie. 20Mtu mmoja alimwambia, “Mama yako na ndugu zako wako nje, nao wanataka kukuona.” 21Lakini yeye aliwajibu, “Wale wanaolisikia neno la Mungu na kulitenda ndio mama yangu na ndugu zangu.”

22Siku moja Yesu aliingia katika mashua pamoja na wanafunzi wake, akawaambia, “Tuvuke twende ng’ambo ya ziwa.” Basi wakaanza safari. 23Walipokuwa wakisafiri, alipitiwa na usingizi. Dhoruba kali ya upepo ilishuka juu ya ziwa. Mashua ikawa inajaa maji, nao wakawa hatarini. 24Walimwendea, wakamwamsha, wakilia, “Mkuu, Mkuu, tumekwisha!” Yeye akaamka, akatoa amri kali kwa upepo na kwa maji yaliyochafuka. Vikatulia, na ziwa likawa shwari. 25Kisha aliwauliza, “Imani yenu iko wapi?” Wakiwa wamejaa hofu na mshangao, waliulizana, “Basi huyu ni nani, ambaye upepo na maji vinamtii anapotoa amri?” 26Walitia nanga katika nchi ya Wagerasi, ng’ambo ya ziwa kuelekeana na Galilaya. 27Yesu alipotoka katika mashua na kukanyaga nchi kavu, mtu mmoja wa mjini alikuja kukutana naye. Alikuwa na pepo, na kwa muda mrefu alikuwa havai nguo, wala hakuishi nyumbani, bali makaburini. 28Alipomwona Yesu, alipiga yowe, akajitupa chini mbele yake, akasema kwa sauti kubwa, “Una shughuli gani nami, Yesu, Mwana wa Mungu Aliye Juu Kabisa? Nakusihi, usinitese!” 29Kwa kuwa yeye alikuwa amekwisha kumwamuru yule pepo mchafu amtoke mtu huyo. Mara nyingi pepo huyo alikuwa amemshika. Watu walimweka chini ya ulinzi na kumfunga kwa minyororo na pingu, lakini yeye alivunja vifungo hivyo, na pepo akamswaga mpaka nyikani. 30Yesu alimwuliza, “Jina lako ni nani?” Akajibu, “Legioni,” kwa maana pepo wengi sana walikuwa wamemwingia. 31Pepo hao waliendelea kumsihi asiwaamuru waende kilindini.

32Pale kulikuwa na kundi kubwa la nguruwe likila malisho kwenye mteremko wa mlima. Pepo hao walimsihi awaruhusu kuwaingia nguruwe hao, naye akawaruhusu. 33Pepo walimtoka mtu huyo, wakawaingia nguruwe. Kisha kundi zima likatimua mbio kuteremka genge hadi ziwani, likazama.

34Wachungaji wa nguruwe walipoona yaliyotokea, walikimbia, wakaeneza habari mjini na mashambani. 35Watu walitoka kwenda kuona yaliyotokea. Walipofika kwa Yesu, walimkuta yule mtu aliyetokwa na pepo ameketi miguuni pa Yesu, amevaa nguo na akili zake zikiwa timamu. Nao wakaogopa. 36Wale walioyaona waliwaeleza jinsi yule mtu aliyekuwa ametawaliwa na pepo alivyoponywa. 37Kisha watu wote wa nchi ya Wagerasi walimwomba aondoke kwao, kwa sababu hofu kuu ilikuwa imewashika. Basi akaingia katika mashua, akarudi. 38Yule mtu aliyetokwa na pepo aliendelea kumsihi amruhusu aende pamoja naye, lakini Yesu alimuaga, akamwambia, 39“Rudi nyumbani, ukasimulie habari ya yote ambayo Mungu amekutendea.” Basi aliondoka, akatangaza katika mji wote mambo yote ambayo Yesu alikuwa amemtendea.

40Yesu aliporudi ng’ambo ya ziwa, watu walimkaribisha kwa furaha, kwa maana wote walikuwa wakimngoja. 41Kisha akaja mtu mmoja aitwaye Yairo, kiongozi wa sinagogi. Alijitupa miguuni pa Yesu, akamsihi aje nyumbani kwake, 42kwa sababu binti yake wa pekee, mwenye umri wa miaka kama kumi na miwili, alikuwa karibu kufa. Alipokuwa akienda huko, makundi ya watu yalimsongasonga pande zote. 43Kati yao alikuwemo mwanamke aliyekuwa akitokwa damu kwa miaka kumi na miwili. Alikuwa ametumia mali yake yote kwa matabibu, lakini hakuna aliyeweza kumponya. 44Alikuja nyuma ya Yesu, akagusa kishada cha joho lake, na mara damu yake ikaacha kutoka. 45Yesu aliuliza, “Ni nani aliyenigusa?” Wote walipokana, Petro alisema, “Mkuu, makundi ya watu yanakuzunguka na kukusukuma!” 46Lakini Yesu alisema, “Kuna mtu aliyenigusa kweli. Nimehisi nguvu ikinitoka.” 47Yule mwanamke alipotambua kwamba amegunduliwa, alikuja akitetemeka, akajitupa chini mbele yake. Mbele ya watu wote alieleza sababu ya kumgusa, na jinsi alivyoponywa papo hapo. 48Yesu alimwambia, “Binti, kwa imani yako umepona. Nenda kwa amani.”

49Yesu alipokuwa bado akizungumza, mjumbe alifika kutoka nyumbani kwa kiongozi wa sinagogi na kusema, “Binti yako amekufa. Hakuna haja ya kumsumbua Mwalimu tena.” 50Lakini Yesu aliposikia hayo, alimjibu Yairo, “Usikubali hofu ikushinde. Amini tu, naye atapona.” 51Alipofika nyumbani, hakumruhusu mtu yeyote kuingia pamoja naye isipokuwa Petro, Yohana na Yakobo, pamoja na baba na mama wa msichana. 52Wote walikuwa wakilia na kumwombolezea kwa sauti. Lakini yeye aliwaambia, “Msilie. Hajafa. Amelala.” 53Walimcheka kwa dharau, kwa kuwa walijua kwamba amekufa. 54Lakini yeye alimshika mkono, akaita, “Mtoto, amka!” 55Roho yake ilimrudia, akaamka papo hapo, naye akaagiza apewe chakula. 56Wazazi wake walishangaa kupita kiasi. Lakini yeye aliwaagiza wasimweleze mtu yeyote yaliyotokea.