Luka 9

1Yesu aliwaita pamoja wale Kumi na Wawili, akawapa nguvu na mamlaka juu ya kila pepo, na ya kuponya magonjwa. 2Akawatuma waende kutangaza ufalme wa Mungu na kuwaponya wagonjwa. 3Akawaambia, “Msichukue chochote kwa ajili ya safari: wala fimbo ya kutembelea, wala mkoba wa safari, wala mkate, wala pesa. Na kila mmoja wenu asiwe na kanzu mbili. 4Nyumba yoyote mtakayoingia, kaeni humo mpaka mtakapoondoka katika mji huo. 5Watu wasipowakaribisha, mnapoondoka katika mji huo, kung’uteni vumbi lake miguuni mwenu. Hilo litakuwa ushahidi dhidi yao.” 6Basi waliondoka, wakaenda kijiji hadi kijiji, wakihubiri Injili na kuwaponya watu kila mahali.

7Herode mtawala alisikia habari za mambo yote yaliyokuwa yakitendeka, naye hakujua la kufikiri. Watu wengine walikuwa wakisema kwamba Yohana amefufuliwa kutoka kwa wafu; 8wengine, kwamba Eliya ametokea; na wengine, kwamba mmoja wa manabii wa zamani za kale amefufuka. 9Lakini Herode alisema, “Yohana nilimkata kichwa mimi mwenyewe. Basi, ni nani mtu huyu ninayeendelea kusikia mambo kama haya kumhusu?” Naye aliendelea kutafuta njia ya kumwona.

10Mitume walirudi, wakamweleza kwa kina yote waliyoyafanya. Aliwachukua pamoja naye, akaondoka faraghani kwenda mji unaoitwa Bethsaida. 11Lakini makundi ya watu walipata habari, wakamfuata. Aliwakaribisha, akasema nao kuhusu ufalme wa Mungu, akawaponya wale waliohitaji kuponywa.

12Jua lilipokuwa likielekea kutua, wale Kumi na Wawili walimwendea, wakamwambia, “Waruhusu watu waondoke, ili waende katika vijiji na mashamba ya jirani wakatafute mahali pa kulala na chakula. Hapa tuko mahali pasipo na watu.” 13Lakini akawaambia, “Ninyi wenyewe wapeni chakula.” Wakajibu, “Hatuna kitu ila mikate mitano na samaki wawili, isipokuwa twende sisi wenyewe tukanunue chakula kwa ajili ya umati huu wote.” 14Walikuwapo wanaume wapatao elfu tano. Aliwaambia wanafunzi wake, “Waketisheni katika makundi ya watu wapatao hamsini.” 15Walifanya hivyo, na watu wote wakaketi. 16Alichukua ile mikate mitano na wale samaki wawili, akatazama juu mbinguni, akavibariki. Akavimega, akaendelea kuwapa wanafunzi ili wawagawie watu. 17Wote walikula, wakashiba. Kisha vipande vilivyobaki vikakusanywa: vikapu kumi na viwili vilivyojaa.

18Wakati mmoja Yesu alikuwa akiomba mahali pa faragha, na wanafunzi peke yao walikuwa pamoja naye. Akawauliza, “Watu husema mimi ni nani?” 19Walijibu, “Yohana Mbatizaji. Wengine husema Eliya. Na wengine husema kwamba mmoja wa manabii wa zamani za kale amefufuka.” 20Kisha akawauliza, “Na ninyi je? Mnasema mimi ni nani?” Petro akajibu, “Wewe ni Kristo wa Mungu.”

21Aliwaagiza kwa mkazo wasimwambie mtu yeyote jambo hilo. 22Akasema, “Ni lazima Mwana wa Adamu apate mateso mengi. Wazee, wakuu wa makuhani na waandishi watamkataa. Atauawa, na siku ya tatu atafufuliwa.”

23Kisha akawaambia wote, “Yeyote anayetaka kuja nyuma yangu ni lazima ajikane, aubebe msalaba wake kila siku, na aendelee kunifuata. 24Yeyote anayejitahidi kuyaokoa maisha yake mwenyewe atayapoteza. Lakini yeyote atakayeyapoteza maisha yake kwa ajili yangu atayaokoa. 25Tuseme mtu ameupata ulimwengu wote lakini ameangamia na kujipoteza mwenyewe. Amepata faida gani? 26Mtu yeyote akinionea aibu na kuyaonea aibu maneno yangu, Mwana wa Adamu atamwonea aibu mtu huyo atakapokuja katika utukufu wake mwenyewe, na utukufu wa Baba na wa malaika watakatifu. 27Nawaambia kwa kweli, miongoni mwa wale waliosimama hapa wapo wengine ambao hawataonja kifo kabla ya kuuona ufalme wa Mungu.”

28Kama siku nane baada ya maneno hayo, Yesu alipanda mlimani kuomba, akiwachukua Petro, Yohana na Yakobo. 29Alipokuwa akiomba, sura ya uso wake ilibadilika, na mavazi yake yakawa meupe, yakimetameta kama umeme wa radi. 30Ghafla wanaume wawili walikuwa wakizungumza naye: Musa na Eliya. 31Walitokea katika utukufu, wakazungumza juu ya kuondoka kwake, yaani kutoka ambako angekukamilisha huko Yerusalemu. 32Petro na wenzake walikuwa wamezidiwa na usingizi. Lakini walipoamka kabisa, waliuona utukufu wake na wale wanaume wawili waliosimama karibu naye. 33Wale wanaume wawili walipokuwa wakiondoka kwake, Petro alimwambia Yesu, “Mkuu, ni vizuri kwamba tuko hapa. Na tujenge vibanda vitatu: kimoja chako, kimoja cha Musa na kimoja cha Eliya.” Kwa kweli Petro hakujua alichokuwa akisema. 34Petro alipokuwa bado akisema hayo, wingu lilikuja, likawafunika kwa kivuli chake, nao wakaogopa walipoingia ndani ya wingu. 35Kisha sauti ikatoka katika wingu: “Huyu ni Mwana wangu, Mteule. Msikilizeni yeye.” 36Sauti ilipokwisha, Yesu alikuwa pale peke yake. Wanafunzi walinyamaza. Wakati huo hawakumwambia mtu yeyote lolote kuhusu mambo waliyoyaona.

37Siku iliyofuata, waliposhuka kutoka mlimani, umati mkubwa wa watu ulikuja kumlaki. 38Mtu mmoja katika umati alipaza sauti, “Mwalimu, nakuomba umwangalie mwanangu! Yeye ndiye mtoto wangu wa pekee. 39Roho humkamata, na ghafla hupiga yowe. Humtupatupa kwa nguvu hadi anatoa povu kinywani, na humwachilia kwa shida; humwacha akiwa amejeruhiwa vibaya. 40Niliwaomba sana wanafunzi wako waifukuze, lakini hawakuwa na uwezo.” 41Yesu akajibu, “Lo! Kizazi hiki kisicho na imani na kilichopotoka! Itanibidi niwe pamoja nanyi na kuwavumilia mpaka lini? Mlete mwanao hapa.” 42Mvulana alipokuwa bado anakuja, pepo alimwangusha chini na kumtupatupa kwa nguvu. Lakini Yesu alimkemea vikali yule pepo mchafu. Akamponya mvulana, akamrudisha kwa baba yake. 43Watu wote walistaajabia ukuu wa Mungu. Watu walipokuwa bado wakistaajabia yote aliyokuwa akiyafanya, aliwaambia wanafunzi wake, 44“Yasikieni maneno haya yaingie ndani kabisa ya masikio yenu: Mwana wa Adamu atakabidhiwa mikononi mwa wanadamu.” 45Hawakuelewa alichomaanisha. Maana yake ilikuwa imefichwa kwao, ili wasiitambue. Nao waliogopa kumwuliza juu ya maneno hayo.

46Mabishano yalizuka kati yao: ni nani miongoni mwao aliyekuwa mkuu kuliko wote? 47Yesu alijua mawazo ya mioyo yao. Akamchukua mtoto mdogo, akamsimamisha kando yake. 48Kisha akawaambia, “Yeyote anayempokea mtoto huyu kwa jina langu ananipokea mimi. Na yeyote anayenipokea mimi anampokea yule aliyenituma. Kwa maana aliye mdogo kuliko wote miongoni mwenu, huyo ndiye aliye mkuu.”

49Yohana akajibu, “Mkuu, tulimwona mtu mmoja akifukuza pepo kwa kutumia jina lako, nasi tukaendelea kumkataza, kwa sababu yeye si mmoja wetu tunaokufuata.” 50Yesu akamwambia, “Msijaribu kumzuia. Mtu yeyote asiye kinyume chenu yuko upande wenu.”

51Wakati wa kuchukuliwa kwake juu ulipokaribia, aliuelekeza uso wake Yerusalemu, akiwa ameazimia kwenda huko. 52Akatuma wajumbe watangulie mbele yake. Walienda, wakaingia katika kijiji cha Wasamaria ili kumwandalia mahali pa kukaa. 53Lakini watu wa huko walikataa kumkaribisha, kwa kuwa uso wake ulikuwa umeelekea Yerusalemu. 54Wanafunzi Yakobo na Yohana walipoona hivyo, walisema, “Bwana, je, unataka tuamuru moto ushuke kutoka mbinguni uwateketeze?” 55Lakini Yesu aligeuka, akawakemea vikali. 56Kisha wakaendelea mpaka kijiji kingine.

57Walipokuwa wakienda njiani, mtu mmoja alimwambia, “Popote utakapokwenda, nitakufuata.” 58Yesu akamwambia, “Mbweha wana mashimo yao, na ndege wa angani wana viota, lakini Mwana wa Adamu hana mahali pa kulaza kichwa chake.” 59Akamwambia mtu mwingine, “Nifuate.” Lakini mtu huyo akajibu, “Bwana, niruhusu kwanza niende kumzika baba yangu.” 60Yesu akamwambia, “Waache wafu wawazike wafu wao. Lakini wewe, nenda ukatangaze habari za ufalme wa Mungu kila mahali.” 61Mtu mwingine tena akasema, “Nitakufuata, Bwana, lakini kwanza niruhusu nikawaage watu wa nyumbani kwangu.” 62Yesu akajibu, “Hakuna mtu anayeshika plau kwa mkono kisha akaendelea kutazama nyuma anayefaa kwa ufalme wa Mungu.”