Luka 17

1Yesu aliwaambia wanafunzi wake, “Mambo yanayowakwaza watu na kuwaingiza dhambini hakika yatakuja. Lakini ole wake mtu anayeyaleta! 2Ingekuwa afadhali kwa mtu huyo kutupwa baharini akiwa amefungwa jiwe la kusagia shingoni, kuliko kumkwaza mmoja wa wadogo hawa. 3Jihadharini. Ndugu yako akikosea, mwonye. Kisha akitubu, msamehe. 4Hata akikukosea mara saba kwa siku moja, na mara saba akarudi kukuambia, ‘Ninatubu,’ msamehe.”

5Mitume walimwambia Bwana, “Tupe imani zaidi!” 6Bwana alijibu, “Kama mngekuwa na imani yenye ukubwa wa mbegu ya haradali, mngeweza kuuambia mforsadi huu, ‘Jing’oe na mizizi yako, ukajipande baharini,’ nao ungefanya mnavyosema.

7Fikirini mmoja wenu ana mtumishi aliyekuwa akilima au akichunga kondoo. Anaporudi kutoka shambani, je, atamwambia, ‘Njoo moja kwa moja uketi mezani’? 8Je, hatamwambia badala yake, ‘Niandalie chakula. Kisha jifunge kibwebwe unihudumie ninapokula na kunywa. Wewe utakula na kunywa baadaye’? 9Yule bwana hana deni la shukrani kwa mtumishi wake kwa kufanya aliyoagizwa, sivyo? 10Ndivyo ilivyo kwenu pia. Mkiisha kufanya yote mliyoagizwa, semeni, ‘Sisi ni watumishi tusiostahili kitu cha ziada. Tumefanya tu yale tuliyopaswa kufanya.’”

11Yesu alipokuwa akiendelea na safari yake kuelekea Yerusalemu, alipita katika eneo lililo kati ya Samaria na Galilaya. 12Alipokuwa akiingia katika kijiji kimoja, wanaume kumi wenye ukoma walimjia. Walisimama mbali, 13wakapaza sauti, “Yesu! Mkuu! Tuhurumie!” 14Yesu aliwaona, akawaambia, “Nendeni mkachunguzwe na makuhani.” Walipokuwa njiani, walifanywa safi. 15Mmoja wao alipoona kwamba amepona, alirudi akimtukuza Mungu kwa sauti kubwa. 16Alijitupa kifudifudi miguuni pa Yesu, akamshukuru. Mtu huyo alikuwa Msamaria. 17Yesu alijibu, “Watu kumi walifanywa safi, sivyo? Basi wale tisa wengine wako wapi? 18Je, ni mgeni huyu peke yake aliyerudi kumpa Mungu utukufu?” 19Kisha akamwambia, “Simama, uende zako. Imani yako imekuponya.”

20Wakati mmoja Mafarisayo walimwuliza Yesu ufalme wa Mungu utakuja lini. Akawajibu, “Ufalme wa Mungu hauji kwa namna ambayo mnaweza kuiangalia na kuifuatilia. 21Watu hawatasema, ‘Uko hapa!’ au ‘Uko kule!’ Kwa maana ufalme wa Mungu uko kati yenu.”

22Kisha akawaambia wanafunzi, “Siku zitakuja ambapo mtatamani sana kuona hata siku moja ya Mwana wa Adamu, lakini hamtaiona. 23Watu watawaambia, ‘Tazameni kule!’ au ‘Tazameni hapa!’ Msitoke, wala msiwakimbilie. 24Umeme wa radi unapomulika, huangaza anga kutoka pembe moja hadi nyingine. Ndivyo Mwana wa Adamu atakavyokuwa katika siku yake. 25Lakini kabla ya hayo, ni lazima apitie mateso makubwa na kukataliwa na watu wa kizazi hiki. 26Yale yaliyotokea wakati wa Nuhu yatatokea tena katika siku za Mwana wa Adamu. 27Watu walikuwa wakila na kunywa, wakioa na kuozwa, mpaka siku ile Nuhu alipoingia katika safina. Kisha gharika ikaja, ikawaangamiza wote. 28Ilikuwa vivyo hivyo wakati wa Lutu. Watu walikula na kunywa, walinunua na kuuza, walipanda na kujenga. 29Kisha ikafika siku Lutu alipoondoka Sodoma. Moto na kiberiti vilianguka kutoka mbinguni kama mvua, na wote wakaangamizwa. 30Ndivyo itakavyokuwa siku ile Mwana wa Adamu atakapofunuliwa. 31Siku hiyo, mtu aliye juu ya paa asishuke ndani ya nyumba kuchukua vitu vyake. Vivyo hivyo, aliye shambani asigeuke kurudi kuchukua kilichobaki nyuma. 32Mkumbukeni mke wa Lutu. 33Mtu anayejaribu kuyashikilia maisha yake atayapoteza, na mtu anayeyapoteza atayahifadhi hai. 34Nawaambia, usiku huo watu wawili watakuwa wamelala kitanda kimoja. Mmoja atachukuliwa, na mwingine ataachwa nyuma. 35Wanawake wawili watakuwa wakisaga nafaka pamoja. Mmoja atachukuliwa, na mwingine ataachwa nyuma.” 37Walimwuliza, “Hayo yatatokea wapi, Bwana?” Akawaambia, “Mahali maiti ilipo, tai watakusanyika huko kwa wingi.”