Luka 3

1Ilikuwa mwaka wa kumi na tano wa utawala wa Tiberio Kaisari. Pontio Pilato alikuwa gavana wa Uyahudi; Herode alikuwa mtawala wa Galilaya, ndugu yake Filipo alitawala eneo la Iturea na Trakoniti, na Lisania alitawala Abilene. 2Anasi na Kayafa walishika ukuhani mkuu. Mwaka huo neno la Mungu lilimfikia Yohana mwana wa Zakaria huko nyikani. 3Alipita katika nchi yote iliyo kando ya Yordani, akitangaza ubatizo wa toba ili watu wasamehewe dhambi zao. 4Ilikuwa kama ilivyoandikwa katika kitabu cha maneno ya nabii Isaya: “Sauti inaita nyikani: ‘Mtengenezeeni Bwana barabara, nyoosheni mapito kwa ajili yake; 5Kila bonde litafukiwa, na kila mlima na kilima vitashushwa; njia zilizopinda zitanyooshwa, na njia zisizo sawa zitasawazishwa, 6na wanadamu wote wataona wokovu wa Mungu.’”

7Basi Yohana alikuwa akiwaambia makundi ya watu waliokuja ili awabatize, “Ninyi watoto wa nyoka! Ni nani aliyewaambia mkimbie ghadhabu inayokuja? 8Basi zaeni matunda yanayolingana na toba yenu. Wala msianze kujiambia, ‘Ibrahimu ni baba yetu.’ Nawaambia, Mungu anaweza kuinua watoto wa Ibrahimu kutoka katika mawe haya. 9Shoka limeshawekwa tayari kwenye mizizi ya miti, na mti wowote usiotoa matunda mazuri unakatwa na kutupwa motoni.”

10Makundi ya watu yalimwuliza, “Basi, tufanye nini?” 11Aliwajibu, “Mtu mwenye mashati mawili lazima ashiriki na mtu asiye na shati, na mwenye chakula lazima afanye hivyo pia.” 12Watoza ushuru nao walikuja kubatizwa. Wakamwambia, “Mwalimu, sisi tufanye nini?” 13Aliwaambia, “Msichukue zaidi ya kiasi mlichoagizwa kukusanya.” 14Baadhi ya askari nao walimwuliza, “Na sisi je? Tufanye nini?” Aliwaambia, “Msimtishe mtu yeyote ili awape fedha, wala msiwasingizie watu mashtaka ya uongo. Ridhikeni na mshahara wenu.”

15Watu walikuwa wakitazamia kwa hamu, na wote walijiuliza mioyoni mwao kama huenda Yohana ndiye Kristo. 16Yohana aliwajibu wote, “Mimi nawabatiza kwa maji. Lakini anakuja mwenye nguvu kuliko mimi, nami sifai hata kufungua kamba za ndara zake. Yeye atawabatiza kwa Roho Mtakatifu na moto. 17Ameshika mkononi chombo chake cha kupepetea, ili kusafisha uwanja wake wa kupuria na kuhifadhi ngano ghalani mwake. Lakini makapi atayachoma kwa moto ambao hauzimiki kamwe.”

18Kwa maneno mengine mengi ya kuwasihi, Yohana aliwahubiria watu habari njema. 19Lakini Yohana alikuwa amemkemea Herode mtawala kwa kumchukua Herodia, mke wa ndugu yake, na kwa maovu mengine yote aliyokuwa ametenda. 20Kwa hiyo Herode akaongeza jambo hili kwenye mengine yote: akamtia Yohana gerezani.

21Watu wote walipokuwa wakibatizwa, Yesu pia alibatizwa. Alipokuwa akiomba, mbingu zilifunguka, 22na Roho Mtakatifu akashuka juu yake kwa umbo la mwili, kama njiwa. Kisha sauti ikasikika kutoka mbinguni: “Wewe ni Mwana wangu mpendwa; wewe unaufurahisha moyo wangu.”

23Yesu alikuwa na umri wa karibu miaka thelathini alipoanza kazi yake. Alikuwa mwana, kama watu walivyodhani, wa Yusufu, mwana wa Eli, 24mwana wa Mathati, mwana wa Lawi, mwana wa Melki, mwana wa Yanai, mwana wa Yusufu, 25mwana wa Matathia, mwana wa Amosi, mwana wa Nahumu, mwana wa Esli, mwana wa Nagai, 26mwana wa Maathi, mwana wa Matathia, mwana wa Semeini, mwana wa Yoseki, mwana wa Yoda, 27mwana wa Yoanani, mwana wa Resa, mwana wa Zerubabeli, mwana wa Shealtieli, mwana wa Neri, 28mwana wa Melki, mwana wa Adi, mwana wa Kosamu, mwana wa Elmadamu, mwana wa Eri, 29mwana wa Yoshua, mwana wa Eliezeri, mwana wa Yorimu, mwana wa Mathati, mwana wa Lawi, 30mwana wa Simeoni, mwana wa Yuda, mwana wa Yusufu, mwana wa Yonamu, mwana wa Eliakimu, 31mwana wa Melea, mwana wa Mena, mwana wa Matatha, mwana wa Nathani, mwana wa Daudi, 32mwana wa Yese, mwana wa Obedi, mwana wa Boazi, mwana wa Sala, mwana wa Nashoni, 33mwana wa Aminadabu, mwana wa Admini, mwana wa Arni, mwana wa Hesroni, mwana wa Peresi, mwana wa Yuda, 34mwana wa Yakobo, mwana wa Isaka, mwana wa Ibrahimu, mwana wa Tera, mwana wa Nahori, 35mwana wa Serugi, mwana wa Reu, mwana wa Pelegi, mwana wa Eberi, mwana wa Shela, 36mwana wa Kainani, mwana wa Arfaksadi, mwana wa Shemu, mwana wa Nuhu, mwana wa Lameki, 37mwana wa Methusela, mwana wa Henoko, mwana wa Yaredi, mwana wa Mahalaleli, mwana wa Kainani, 38mwana wa Enoshi, mwana wa Sethi, mwana wa Adamu, mwana wa Mungu.