2 Mambo ya Nyakati 9

1Malkia wa Sheba alisikia habari za umaarufu wa Sulemani, akaja Yerusalemu kumjaribu Sulemani kwa maswali magumu. Alikuja na msafara mkubwa sana, ngamia wakibeba manukato, dhahabu nyingi sana na vito vya thamani. Alipofika kwa Sulemani, alizungumza naye juu ya kila kitu kilichokuwa moyoni mwake. 2Sulemani alijibu maswali yake yote; hakuna jambo lililokuwa gumu mno kwa Sulemani kumweleza. 3Malkia wa Sheba alipoona hekima ya Sulemani, na ikulu aliyoijenga, 4chakula cha mezani pake, jinsi maafisa wake walivyoketi, huduma ya wahudumu wake na mavazi yao, wanyweshaji wake na mavazi yao, na sadaka za kuteketezwa alizotoa katika nyumba ya BWANA, aliishiwa na pumzi. 5Akamwambia mfalme, “Habari niliyoisikia katika nchi yangu mwenyewe juu ya maneno yako na hekima yako ilikuwa kweli. 6Lakini sikuyaamini yaliyosemwa mpaka nilipokuja na kuona kwa macho yangu mwenyewe. Na kweli, sikuambiwa hata nusu ya ukuu wa hekima yako. Unazidi sana habari niliyoisikia. 7Jinsi gani watu wako walivyo na heri! Heri maafisa wako hawa, wanaosimama mbele yako daima na kusikia hekima yako! 8Na abarikiwe BWANA Mungu wako, aliyependezwa nawe na kukuweka juu ya kiti chake cha enzi uwe mfalme kwa ajili ya BWANA Mungu wako! Kwa sababu Mungu wako anawapenda Israeli na kutaka kuwaimarisha milele, amekufanya mfalme juu yao ili utende hukumu na haki.” 9Kisha akampa mfalme karibu kilo 4,080 za dhahabu, manukato mengi sana na vito vya thamani. Hakuna manukato yaliyowahi kulingana na yale ambayo malkia wa Sheba alimpa mfalme Sulemani. 10Watumishi wa Huramu na watumishi wa Sulemani, walioleta dhahabu kutoka Ofiri, walileta pia kutoka huko miti ya msandali na vito vya thamani. 11Mfalme aliitumia miti ya msandali kutengeneza ngazi za nyumba ya BWANA na za ikulu ya mfalme, pamoja na vinubi na zeze kwa ajili ya waimbaji. Hakuna kitu kama hicho kilichowahi kuonekana kabla katika nchi ya Yuda. 12Mfalme Sulemani alimpa malkia wa Sheba kila kitu alichotamani na kuomba, zaidi ya vile alivyokuwa amemletea mfalme. Kisha akageuka akarudi nchi yake, yeye na watumishi wake.

13Uzito wa dhahabu iliyomjia Sulemani katika mwaka mmoja ulikuwa karibu kilo 22,600 za dhahabu, 14bila kuhesabu yale yaliyoletwa na wachuuzi wasafiri na wafanyabiashara. Wafalme wote wa Arabia, na watawala wa nchi pia, walimletea Sulemani dhahabu na fedha. 15Mfalme Sulemani alifanya ngao kubwa 200 za dhahabu iliyofuliwa, na karibu kilo 6.9 za dhahabu iliyofuliwa ziliingia katika kila ngao. 16Alifanya pia ngao 300 za dhahabu iliyofuliwa, na karibu kilo 3.45 za dhahabu ziliingia katika kila ngao. Mfalme akaziweka katika Nyumba ya Msitu wa Lebanoni.

17Kisha mfalme akafanya kiti kikubwa cha enzi cha pembe za ndovu, akakifunika kwa dhahabu safi. 18Kiti cha enzi kilikuwa na ngazi sita na kibao cha dhahabu cha kuwekea miguu, kilichoungwa na kiti cha enzi. Pande zote mbili za kiti kulikuwa na mahali pa kuegemeza mikono, na simba wawili walisimama kando yake. 19Simba kumi na wawili walisimama huko juu ya ngazi sita, mmoja kila mwisho wa kila ngazi. Hakuna kitu kama hicho kilichowahi kufanywa kwa ufalme wowote. 20Vikombe vyote vya kunywea vya mfalme Sulemani vilikuwa vya dhahabu, na vyombo vyote katika Nyumba ya Msitu wa Lebanoni vilikuwa vya dhahabu safi. Siku za Sulemani fedha haikuhesabiwa kuwa kitu. 21Kwa maana mfalme alikuwa na merikebu zilizosafiri mpaka Tarshishi pamoja na watumishi wa Huramu. Mara moja kila miaka mitatu merikebu hizo za Tarshishi zilifika zikileta dhahabu, fedha, pembe za ndovu, nyani na tausi.

22Basi mfalme Sulemani akawazidi wafalme wote wa dunia kwa utajiri na kwa hekima. 23Wafalme wote wa dunia walitafuta kuonana na Sulemani, ili kusikia hekima ambayo Mungu alikuwa ameiweka moyoni mwake. 24Kila mmoja wao alileta zawadi: vyombo vya fedha na dhahabu, mavazi, silaha na manukato, farasi na nyumbu, kiasi fulani kila mwaka.

25Sulemani alikuwa na mabanda 4,000 ya farasi na magari ya vita, na wapanda farasi 12,000, aliowaweka katika miji ya magari ya vita na pamoja na mfalme huko Yerusalemu. 26Alitawala juu ya wafalme wote tangu Mto Frati mpaka nchi ya Wafilisti, hata mpakani mwa Misri. 27Mfalme aliifanya fedha kuwa ya kawaida huko Yerusalemu kama mawe, na mierezi akaifanya kuwa mingi kama mikuyu ya Shefela. 28Sulemani aliletewa farasi kutoka Misri na kutoka nchi zote. 29Mambo mengine ya Sulemani, tangu mwanzo hadi mwisho, yameandikwa katika kumbukumbu za nabii Nathani, katika unabii wa Ahiya Mshiloni, na katika maono ya Ido mwonaji kuhusu Yeroboamu mwana wa Nebati. 30Sulemani alitawala huko Yerusalemu juu ya Israeli wote kwa miaka arobaini. 31Kisha Sulemani akapumzika pamoja na babu zake, akazikwa katika mji wa Daudi baba yake. Na mwanawe Rehoboamu akawa mfalme mahali pake.