2 Mambo ya Nyakati 29

1Hezekia alianza kutawala alipokuwa na umri wa miaka ishirini na mitano, naye akatawala miaka ishirini na tisa huko Yerusalemu. Mama yake aliitwa Abiya binti Zekaria. 2Alifanya yaliyo sawa machoni pa BWANA, katika kila jambo kama babu yake Daudi alivyofanya. 3Katika mwaka wake wa kwanza wa utawala, katika mwezi wa kwanza, aliifungua milango ya nyumba ya BWANA, akaifanya imara tena. 4Aliwaleta makuhani na Walawi, akawakusanya katika uwanja ulio upande wa mashariki. 5Akawaambia, “Nisikilizeni, enyi Walawi! Jitakaseni sasa. Kisha itakaseni nyumba ya BWANA, Mungu wa babu zenu, mkatoe nje kila kitu kichafu kutoka patakatifu. 6Baba zetu hawakuwa waaminifu, wakafanya maovu machoni pa BWANA Mungu wetu. Walimwacha; waligeuza nyuso zao mbali na mahali BWANA anapokaa, wakapapa kisogo. 7Hata waliifunga milango ya ukumbi na kuzima taa. Hawakufukiza uvumba wala kutoa sadaka za kuteketezwa katika patakatifu kwa Mungu wa Israeli. 8Kwa hiyo ghadhabu ya BWANA ikaja juu ya Yuda na Yerusalemu, naye akawafanya kuwa kitu cha kutisha, cha kushangaza na cha kuzomewa, kama mnavyoona kwa macho yenu wenyewe. 9Kwa sababu ya hili baba zetu wameanguka kwa upanga, na wana wetu, binti zetu na wake zetu wako utumwani. 10Sasa nimeazimu moyoni mwangu kufanya agano na BWANA, Mungu wa Israeli, kwa matumaini kwamba ukali wa hasira yake utageuka mbali nasi. 11Wanangu, msilegee sasa, kwa maana BWANA amewachagua ninyi msimame mbele yake na kumtumikia, mwe wahudumu wake na kufukiza uvumba.”

12Kisha Walawi wakaanza kazi: kutoka kwa wazao wa Wakohathi, Mahathi mwana wa Amasai na Yoeli mwana wa Azaria; kutoka kwa wazao wa Merari, Kishi mwana wa Abdi na Azaria mwana wa Yehaleleli; kutoka kwa Wagershoni, Yoa mwana wa Zima na Edeni mwana wa Yoa; 13kutoka kwa wazao wa Elisafani, Shimri na Yeieli; kutoka kwa wazao wa Asafu, Zekaria na Matania;

14kutoka kwa wazao wa Hemani, Yehieli na Shimei; na kutoka kwa wazao wa Yeduthuni, Shemaya na Uzieli. 15Waliwakusanya jamaa zao, wakajitakasa, wakaja kuitakasa nyumba ya BWANA, kama mfalme alivyoamuru kwa maneno ya BWANA. 16Makuhani waliingia sehemu ya ndani ya nyumba ya BWANA ili kuitakasa. Kila kitu kichafu walichokikuta katika hekalu la BWANA walikitoa nje mpaka ua wa nyumba ya BWANA, nao Walawi wakakipokea, wakakipeleka nje mpaka Bonde la Kidroni. 17Kazi ya kutakasa ilianza siku ya kwanza ya mwezi wa kwanza, na kufikia siku ya nane ya mwezi walikuwa wamefika kwenye ukumbi wa BWANA. Kisha kwa siku nane wakaitakasa nyumba ya BWANA, nao wakamaliza siku ya kumi na sita ya mwezi wa kwanza.

18Kisha wakaingia kwa mfalme Hezekia, wakasema, “Tumeitakasa nyumba yote ya BWANA: madhabahu ya sadaka ya kuteketezwa pamoja na vyombo vyake vyote, na meza ya safu za mikate pamoja na vyombo vyake vyote, 19na vyombo vyote ambavyo mfalme Ahazi alivitupa wakati wa utawala wake, alipokosa uaminifu, tumevitengeneza na kuvitakasa. Viko pale mbele ya madhabahu ya BWANA.”

20Mfalme Hezekia aliamka mapema, akawakusanya maafisa wa mji, akapanda kwenda nyumba ya BWANA. 21Mafahali saba, kondoo dume saba, wana-kondoo saba na mabeberu saba waliletwa kuwa sadaka ya dhambi kwa ajili ya ufalme, patakatifu na Yuda. Mfalme akawaambia makuhani, wazao wa Haruni, wawatoe juu ya madhabahu ya BWANA. 22Basi wakawachinja mafahali, nao makuhani wakaipokea damu, wakairushia madhabahu. Kisha wakawachinja kondoo dume, wakairushia madhabahu damu yao, na baadaye wakawachinja wana-kondoo, wakairushia madhabahu damu yao. 23Kisha mabeberu wa sadaka ya dhambi waliletwa mbele ya mfalme na kusanyiko, nao hao wakaweka mikono yao juu yao. 24Makuhani waliwachinja mabeberu, wakaipaka madhabahu damu yao kuwa sadaka ya dhambi, wakafanya upatanisho kwa ajili ya Israeli wote. Mfalme alikuwa amesema kwamba sadaka ya kuteketezwa na sadaka ya dhambi zilikuwa kwa ajili ya Israeli wote. 25Aliwaweka Walawi katika nyumba ya BWANA wakiwa na matoazi, vinubi na zeze, kama Daudi alivyoamuru, pamoja na Gadi mwonaji wa mfalme na Nathani nabii. Amri hiyo ilikuwa imetoka kwa BWANA kupitia manabii wake.

26Walawi walisimama tayari na vyombo vya Daudi, na makuhani na tarumbeta.

27Kisha Hezekia akaamuru sadaka ya kuteketezwa itolewe juu ya madhabahu. Sadaka ya kuteketezwa ilipoanza, wimbo kwa BWANA ukaanza pia, pamoja na tarumbeta, ukifuatana na vyombo vya Daudi mfalme wa Israeli. 28Kusanyiko lote lilisujudu kuabudu huku waimbaji wakiimba na wapiga tarumbeta wakipiga tarumbeta. Hayo yote yaliendelea mpaka sadaka ya kuteketezwa ilipokwisha. 29Sadaka ilipokwisha, mfalme na wote waliokuwapo pamoja naye walipiga magoti, wakaabudu. 30Mfalme Hezekia na maafisa waliwaambia Walawi wamsifu BWANA kwa maneno ya Daudi na ya Asafu mwonaji. Wakasifu kwa furaha, wakainamisha vichwa vyao, wakaabudu.

31Kisha Hezekia akasema, “Sasa mmejiweka wakfu kwa BWANA. Karibieni; leteni dhabihu na sadaka za shukrani katika nyumba ya BWANA.” Kusanyiko likaleta dhabihu na sadaka za shukrani, na wote waliokuwa na moyo wa kupenda wakaleta sadaka za kuteketezwa. 32Hesabu ya sadaka za kuteketezwa ambazo kusanyiko lilileta ilikuwa mafahali sabini, kondoo dume 100 na wana-kondoo 200. Hawa wote walikuwa sadaka za kuteketezwa kwa BWANA. 33Sadaka zilizowekwa wakfu zilikuwa mafahali 600 na kondoo 3,000. 34Lakini makuhani walikuwa wachache mno kuweza kuchuna ngozi sadaka zote za kuteketezwa. Kwa hiyo jamaa zao Walawi waliwasaidia mpaka kazi ilipokwisha na makuhani walipokwisha kujitakasa, kwa sababu Walawi walikuwa wanyofu zaidi wa moyo katika kujitakasa kuliko makuhani. 35Sadaka za kuteketezwa nazo zilikuwa nyingi, pamoja na mafuta ya sadaka za amani na sadaka za kinywaji zilizoandamana na kila sadaka ya kuteketezwa. Hivyo huduma ya nyumba ya BWANA ikawekwa katika utaratibu. 36Hezekia na watu wote walifurahi juu ya yale ambayo Mungu alikuwa amewaandalia watu, kwa maana jambo hilo lilikuwa limetokea ghafula.