2 Mambo ya Nyakati 14

1Kisha Abiya akapumzika pamoja na babu zake, akazikwa katika mji wa Daudi. Na mwanawe Asa akawa mfalme mahali pake. Katika siku zake nchi ilikuwa na amani miaka kumi.

2Asa alifanya yaliyo mema na yaliyo sawa machoni pa BWANA Mungu wake. 3Aliziondoa madhabahu za kigeni na mahali pa juu, akazivunjavunja nguzo za mawe na kuikata miti ya Ashera. 4Aliwaamuru Yuda wamtafute BWANA, Mungu wa babu zao, na kuitekeleza sheria na amri zake. 5Aliondoa mahali pa juu na madhabahu za kufukizia uvumba katika miji yote ya Yuda, na ufalme ukawa na amani chini yake. 6Alijenga miji yenye ngome katika Yuda, kwa kuwa nchi ilikuwa na amani. Hakuna aliyepigana naye vita miaka ile, kwa sababu BWANA alikuwa amempa raha. 7Akawaambia Yuda, “Na tuijenge miji hii na kuizungushia kuta, pamoja na minara, malango na makomeo. Nchi bado ni yetu, kwa kuwa tumemtafuta BWANA Mungu wetu. Tulimtafuta, naye ametupa raha pande zote.” Basi wakajenga, wakafanikiwa.

8Asa alikuwa na jeshi la watu 300,000 kutoka Yuda, wenye ngao kubwa na mikuki, na watu 280,000 kutoka Benyamini, waliobeba ngao ndogo na kupiga pinde. Wote hao walikuwa wapiganaji hodari. 9Zera Mkushi alitoka kupigana nao akiwa na jeshi la watu milioni moja na magari ya vita 300, akafika mpaka Maresha. 10Asa alitoka kukutana naye, nao wakajipanga kwa vita katika Bonde la Sefatha karibu na Maresha. 11Kisha Asa akamlilia BWANA Mungu wake: “BWANA, hakuna mwingine ila wewe wa kusaidia wanyonge wanaposimama dhidi ya wenye nguvu. Utusaidie, BWANA Mungu wetu, kwa sababu tunakutegemea wewe; ni kwa jina lako tumetoka kupigana na jeshi hili kubwa. BWANA, wewe ndiwe Mungu wetu. Mwanadamu yeyote asisimame dhidi yako.”

12BWANA aliwapiga Wakushi mbele ya Asa na mbele ya Yuda, na Wakushi wakakimbia. 13Asa na askari waliokuwa pamoja naye waliwafukuza mpaka Gerari. Wakushi wengi sana walianguka hata wasiweze kujirudia; walivunjwa mbele ya BWANA na jeshi lake. Watu wa Yuda wakachukua nyara nyingi sana. 14Waliishambulia miji yote iliyozunguka Gerari, kwa kuwa hofu ya BWANA ilikuwa juu yao. Wakaiteka nyara miji hiyo yote, kwa kuwa ndani yake kulikuwa na nyara nyingi. 15Waliyashambulia pia makambi ya wachungaji, wakachukua kondoo na mbuzi wengi sana, na ngamia. Kisha wakarudi Yerusalemu.