2 Mambo ya Nyakati 4

1Alifanya madhabahu ya shaba yenye urefu wa karibu mita 9, upana wa karibu mita 9 na kimo cha karibu mita 4.5.

2Alifanya Bahari ya shaba ya kusubu. Ilikuwa ya mviringo, karibu mita 4.5 tangu ukingo mmoja mpaka mwingine, na kimo chake karibu mita 2.25, na uzi wa karibu mita 13.5 ulihitajika kuizunguka. 3Chini ya ukingo wake kulikuwa na sanamu za ng’ombe pande zote, kumi kila sentimita 45, zikiizunguka Bahari. Ng’ombe hao walikuwa katika safu mbili, waliosubiwa pamoja nayo kipande kimoja. 4Ilisimama juu ya ng’ombe kumi na wawili: watatu walielekea kaskazini, watatu magharibi, watatu kusini na watatu mashariki. Bahari iliwekwa juu yao, na sehemu zao zote za nyuma zilielekea katikati. 5Unene wake ulikuwa karibu sentimita 7.5, na ukingo wake ulifanywa kama ukingo wa kikombe, kama ua la yungiyungi. Iliweza kupokea na kuchukua karibu lita 66,000.

6Alifanya pia mabirika kumi ya kuoshea, akaweka matano upande wa kusini na matano upande wa kaskazini. Ndani yake walisuuza vitu vilivyotumika kwa sadaka ya kuteketezwa, lakini Bahari ilikuwa kwa ajili ya makuhani kunawia.

7Alifanya vinara kumi vya taa vya dhahabu kama ilivyoagizwa, akaviweka katika ukumbi mkuu, vitano upande wa kusini na vitano upande wa kaskazini.

8Alifanya meza kumi akaziweka katika ukumbi mkuu, tano upande wa kusini na tano upande wa kaskazini. Akafanya pia mabakuli 100 ya dhahabu ya kunyunyizia. 9Alifanya ua wa makuhani na ua mkubwa, pamoja na milango ya ua huo, akaifunika milango yake kwa shaba. 10Bahari akaiweka upande wa kusini, kwenye pembe ya kusini-mashariki. 11Huramu alifanya pia vyungu, sepetu na mabakuli ya kunyunyizia. Hivyo Huramu akamaliza kazi aliyomfanyia mfalme Sulemani katika nyumba ya Mungu: 12nguzo mbili; vichwa viwili vyenye umbo la bakuli juu ya nguzo; nyavu mbili zilizofunika mabakuli mawili ya vichwa juu ya nguzo; 13makomamanga 400 kwa ajili ya nyavu mbili, safu mbili kwa kila wavu, yakifunika mabakuli mawili ya vichwa juu ya nguzo; 14vitako, pamoja na mabirika aliyoyafanya kwa ajili ya vitako; 15Bahari moja, pamoja na ng’ombe kumi na wawili chini yake; 16na vyungu, sepetu na nyuma za nyama. Vitu hivi vyote ambavyo Huramu-abi alimfanyia mfalme Sulemani kwa ajili ya nyumba ya BWANA vilikuwa vya shaba iliyosuguliwa. 17Mfalme alivisubu katika ardhi ya udongo wa mfinyanzi katika uwanda wa Yordani, kati ya Sukothi na Sereda. 18Sulemani alifanya vitu hivi vyote kwa wingi kiasi kwamba uzito wa shaba haukujulikana kamwe.

19Sulemani alifanya pia vyombo vyote vya nyumba ya Mungu: madhabahu ya dhahabu; meza za mkate wa Uwepo; 20vinara vya taa na taa zake vya dhahabu safi, viwake mbele ya Patakatifu pa Patakatifu kama ilivyoagizwa; 21maua, taa na makoleo ya dhahabu, dhahabu iliyo bora kabisa; 22makasi ya kukatia tambi, mabakuli ya kunyunyizia, sahani na vyetezo vya dhahabu safi; na mlango wa nyumba, yaani milango yake ya ndani ya Patakatifu pa Patakatifu na milango ya nyumba ya ukumbi mkuu, ya dhahabu.