2 Mambo ya Nyakati 17

1Mwanawe Yehoshafati akawa mfalme mahali pake, akajiimarisha dhidi ya Israeli. 2Aliweka askari katika kila mji wenye ngome wa Yuda, akaweka vikosi vya walinzi katika nchi ya Yuda na katika miji ile ya Efraimu ambayo baba yake Asa alikuwa ameiteka. 3BWANA alikuwa pamoja na Yehoshafati, kwa sababu alifuata njia za awali za babu yake Daudi, wala hakuwatafuta Mabaali, 4bali alimtafuta Mungu wa baba yake na kufuata amri zake, wala hakutenda kama Israeli walivyotenda. 5BWANA aliuimarisha ufalme chini ya utawala wake. Yuda wote walimletea Yehoshafati zawadi, naye akawa na utajiri mwingi na heshima kubwa. 6Moyo wake ulikuwa na ujasiri katika njia za BWANA, naye akaondoa pia mahali pa juu na miti ya Ashera katika Yuda.

7Katika mwaka wa tatu wa utawala wake aliwatuma maafisa wake kufundisha katika miji ya Yuda: Ben-haili, Obadia, Zekaria, Nethaneli na Mikaya. 8Pamoja nao walikuwa Walawi Shemaya, Nethania, Zebadia, Asaheli, Shemiramothi, Yehonathani, Adoniya, Tobia na Tob-adoniya, na pamoja nao makuhani Elishama na Yehoramu. 9Walifundisha katika Yuda, wakiwa na kitabu cha sheria ya BWANA. Walizunguka katika miji yote ya Yuda wakiwafundisha watu. 10Hofu ya BWANA ilikuwa juu ya falme zote za nchi zilizozunguka Yuda, kwa hiyo hawakwenda vitani dhidi ya Yehoshafati. 11Baadhi ya Wafilisti walimletea Yehoshafati zawadi na fedha kama kodi, na Waarabu nao walimletea makundi ya wanyama: kondoo dume 7,700 na mbuzi dume 7,700.

12Yehoshafati aliendelea kuwa na nguvu zaidi na zaidi, akajenga ngome na miji ya ghala katika Yuda. 13Alikuwa na akiba kubwa katika miji ya Yuda, na askari, wapiganaji hodari, katika Yerusalemu. 14Hii ndiyo hesabu yao kwa jamaa zao. Kutoka Yuda, makamanda wa maelfu: Adna alikuwa kamanda, na pamoja naye wapiganaji hodari 300,000,

15wa pili kwake alikuwa Yehohanani kamanda, na pamoja naye 280,000,

16wa pili kwake alikuwa Amasia mwana wa Zikri, aliyekuwa amejitolea kwa ajili ya BWANA, na pamoja naye wapiganaji hodari 200,000.

17Kutoka Benyamini: Eliada, mpiganaji hodari, na pamoja naye watu 200,000 wenye silaha za pinde na ngao,

18wa pili kwake alikuwa Yehozabadi, na pamoja naye watu 180,000 wenye silaha za vita.

19Hawa ndio waliomtumikia mfalme, mbali na wale aliowaweka katika miji yenye ngome katika Yuda yote.