2 Mambo ya Nyakati 28

1Ahazi alikuwa na umri wa miaka ishirini alipoanza kutawala, naye akatawala miaka kumi na sita huko Yerusalemu. Hakufanya yaliyo sawa machoni pa BWANA, kama babu yake Daudi alivyofanya. 2Alifuata njia za wafalme wa Israeli; pia akayatengenezea Mabaali sanamu za chuma cha kuyeyusha. 3Alifukiza uvumba katika Bonde la Ben-hinomu, akawateketeza wanawe motoni, akifuata desturi za kuchukiza za mataifa ambayo BWANA aliyafukuza mbele ya Waisraeli. 4Alitoa dhabihu na kufukiza uvumba mahali pa juu, juu ya vilima na chini ya kila mti wenye majani mengi. 5Kwa hiyo BWANA Mungu wake alimtia mikononi mwa mfalme wa Aramu. Waaramu wakamshinda, wakawachukua mateka watu wake wengi sana, wakawapeleka Dameski. Pia alitiwa mikononi mwa mfalme wa Israeli, aliyempiga pigo zito.

6Kwa siku moja Peka mwana wa Remalia aliua watu 120,000 katika Yuda, wote watu mashujaa, kwa sababu walikuwa wamemwacha BWANA, Mungu wa babu zao. 7Zikri, shujaa wa Efraimu, alimwua Maaseya mwana wa mfalme, Azrikamu afisa msimamizi wa ikulu, na Elkana, aliyekuwa wa pili baada ya mfalme.

8Waisraeli waliwateka watu 200,000 wa jamaa zao wenyewe, wanawake, wana na binti. Pia walichukua nyara nyingi kutoka kwao, wakazileta nyara hizo Samaria.

9Lakini huko kulikuwa na nabii wa BWANA aliyeitwa Odedi. Alitoka kwenda kulilaki jeshi lilipokuwa likija Samaria, akawaambia, “Tazama, ni kwa sababu BWANA, Mungu wa babu zenu, aliikasirikia Yuda ndiyo maana amewatia mikononi mwenu. Lakini ninyi mmewachinja kwa ghadhabu iliyofika hata mbinguni. 10Na sasa mnakusudia kuwalazimisha watu wa Yuda na Yerusalemu kuwa watumwa wenu wa kiume na wa kike. Lakini je, ninyi wenyewe hamna hatia ya makosa dhidi ya BWANA Mungu wenu? 11Sasa nisikilizeni: warudisheni mateka mliowachukua kutoka kwa jamaa zenu wenyewe, kwa maana hasira kali ya BWANA iko juu yenu.”

12Kisha baadhi ya wakuu wa Waefraimu, Azaria mwana wa Yehohanani, Berekia mwana wa Meshilemothi, Yehizkia mwana wa Shalumu na Amasa mwana wa Hadlai, walisimama kuwakabili wale waliokuwa wakirudi kutoka vitani. 13Wakawaambia, “Msiwalete mateka hapa. Mnayokusudia yangetuletea hatia mbele za BWANA, na kuongeza dhambi zetu na hatia yetu. Hatia yetu tayari ni kubwa, na hasira kali iko juu ya Israeli.”

14Basi watu wenye silaha waliwaacha mateka na nyara mbele ya maafisa na kusanyiko lote. 15Kisha watu waliotajwa kwa majina kwa kazi hiyo waliinuka, wakawashughulikia mateka. Kutoka kwa nyara wakawavika wote waliokuwa uchi kati yao. Wakawapa nguo na viatu, chakula na kinywaji, wakawapaka mafuta. Wote waliokuwa dhaifu mno kutembea wakawapandisha juu ya punda, wakawapeleka kwa jamaa zao huko Yeriko, mji wa mitende. Kisha wakarudi Samaria.

16Wakati ule mfalme Ahazi alituma kwa wafalme wa Ashuru kuomba msaada. 17Waedomu walikuwa wamekuja tena, wakaishambulia Yuda na kuchukua mateka. 18Wafilisti walikuwa wameivamia miji ya Shefela na ya Negebu ya Yuda. Waliteka Beth-shemeshi, Aiyaloni na Gederothi, pamoja na Soko, Timna na Gimzo na vijiji vyake, wakakaa huko. 19BWANA aliishusha Yuda kwa sababu ya Ahazi mfalme wa Israeli, kwa kuwa aliiacha Yuda itupilie mbali kila kizuizi, akawa si mwaminifu kabisa kwa BWANA. 20Tiglath-pileseri mfalme wa Ashuru alikuja dhidi yake, akamletea taabu badala ya nguvu. 21Ahazi alichukua sehemu ya mali ya nyumba ya BWANA, ya ikulu ya mfalme na ya maafisa, akampa mfalme wa Ashuru, lakini haikumsaidia kitu. 22Wakati wa taabu yake, mfalme Ahazi huyo huyo aliongeza kukosa uaminifu kwa BWANA. 23Aliitolea dhabihu miungu ya Dameski, iliyokuwa imemshinda, akasema, “Kwa kuwa miungu ya wafalme wa Aramu inawasaidia, nitaitolea dhabihu ili inisaidie.” Lakini iliwaletea maangamizi yeye na Israeli wote. 24Ahazi alikusanya vyombo vya nyumba ya Mungu, akavikata vipande vipande. Akaifunga milango ya nyumba ya BWANA, akajijengea madhabahu katika kila pembe ya barabara huko Yerusalemu. 25Katika kila mji wa Yuda, mmoja mmoja, alijenga mahali pa juu pa kuifukizia miungu mingine uvumba, akamkasirisha BWANA, Mungu wa babu zake. 26Mambo yake mengine na njia zake zote, tangu mwanzo hadi mwisho, yameandikwa katika Kitabu cha Wafalme wa Yuda na Israeli. 27Kisha Ahazi akapumzika pamoja na babu zake, wakamzika mjini, katika Yerusalemu; lakini hawakumleta katika makaburi ya wafalme wa Israeli. Na mwanawe Hezekia akawa mfalme mahali pake.