2 Mambo ya Nyakati 27

1Yothamu alikuwa na umri wa miaka ishirini na mitano alipoanza kutawala, naye akatawala miaka kumi na sita huko Yerusalemu. Mama yake aliitwa Yerusha binti Sadoki. 2Alifanya yaliyo sawa machoni pa BWANA, kama baba yake Uzia alivyofanya, isipokuwa hakuingia katika hekalu la BWANA. Lakini watu waliendelea kutenda kwa upotovu. 3Yeye alijenga Lango la Juu la nyumba ya BWANA, akafanya kazi kubwa ya ujenzi juu ya ukuta wa Ofeli. 4Katika nchi ya milima ya Yuda alijenga miji, na katika maeneo ya misitu alijenga ngome na minara. 5Alipigana na mfalme wa Waamoni, akawashinda. Mwaka ule Waamoni walimpa karibu kilo 3,400 za fedha, karibu lita milioni 2.2 za ngano na karibu lita milioni 2.2 za shayiri. Waamoni walimlipa vivyo hivyo katika mwaka wa pili na wa tatu pia. 6Yothamu alipata nguvu, kwa sababu aliziweka njia zake imara mbele za BWANA Mungu wake. 7Mambo mengine ya Yothamu, pamoja na vita vyake vyote na njia zake, yameandikwa katika Kitabu cha Wafalme wa Israeli na Yuda. 8Alikuwa na umri wa miaka ishirini na mitano alipoanza kutawala, naye akatawala miaka kumi na sita huko Yerusalemu. 9Kisha Yothamu alipumzika pamoja na babu zake, wakamzika katika mji wa Daudi. Na mwanawe Ahazi akawa mfalme mahali pake.