2 Mambo ya Nyakati 35

1Yosia alimfanyia BWANA Pasaka huko Yerusalemu. Walimchinja mwana-kondoo wa Pasaka siku ya kumi na nne ya mwezi wa kwanza. 2Aliwaweka makuhani katika nafasi zao, akawatia moyo katika huduma ya nyumba ya BWANA. 3Aliwaambia Walawi, waliowafundisha Israeli wote na waliokuwa watakatifu kwa BWANA, “Liwekeni sanduku takatifu katika nyumba aliyoijenga Sulemani mwana wa Daudi, mfalme wa Israeli. Hamhitaji kulibeba mabegani. Sasa mtumikieni BWANA Mungu wenu, na kuwatumikia watu wake Israeli. 4Jiandaeni kwa jamaa zenu, katika zamu zenu, mkifuata maagizo yaliyoandikwa na Daudi mfalme wa Israeli na mwanawe Sulemani. 5Simameni katika patakatifu, zamu kwa zamu za jamaa za ndugu zenu, watu wa kawaida, na sehemu ya jamaa ya Walawi kwa kila mmoja. 6Mchinjeni mwana-kondoo wa Pasaka, mjitakase, mkamwandae kwa ajili ya ndugu zenu Waisraeli, ili kufanya yale BWANA aliyosema kupitia Musa.”

7Yosia aliwapa watu wa kawaida wanyama wa kundi, wana-kondoo na wana-mbuzi, wote kwa ajili ya sadaka za Pasaka kwa kila mtu aliyekuwapo, jumla yao 30,000, pamoja na ng’ombe 3,000. Hawa walitoka katika mali ya mfalme mwenyewe.

8Maafisa wake nao walitoa kwa hiari kwa watu, makuhani na Walawi. Hilkia, Zekaria na Yehieli, wasimamizi wakuu wa nyumba ya Mungu, waliwapa makuhani sadaka za Pasaka 2,600 na ng’ombe 300. 9Konania, pamoja na ndugu zake Shemaya na Nethaneli, na Hashabia, Yeieli na Yozabadi, viongozi wa Walawi, waliwapa Walawi sadaka za Pasaka 5,000 na ng’ombe 500. 10Basi huduma ikawa tayari. Makuhani walisimama mahali pao, na Walawi kwa zamu zao, kama mfalme alivyoamuru. 11Waliwachinja wana-kondoo wa Pasaka, nao makuhani wakairushia madhabahu damu waliyopokea kutoka kwa Walawi, huku Walawi wakiwachuna ngozi wanyama hao. 12Walitenga sadaka za kuteketezwa ili kuzigawa kwa zamu za jamaa za watu wa kawaida, wamtolee BWANA, kama ilivyoandikwa katika kitabu cha Musa. Vivyo hivyo walifanya na ng’ombe. 13Waliwaoka wana-kondoo wa Pasaka motoni kulingana na agizo, wakazichemsha sadaka takatifu katika vyungu, masufuria na vikaango, wakawaletea upesi watu wote wa kawaida. 14Baadaye walijiandalia wenyewe na makuhani, kwa sababu makuhani, wana wa Haruni, walikuwa na shughuli ya kutoa sadaka za kuteketezwa na mafuta mpaka usiku. Kwa hiyo Walawi walijiandalia wenyewe na makuhani, wana wa Haruni. 15Waimbaji, wana wa Asafu, walikuwa mahali pao, kama Daudi, Asafu, Hemani na Yeduthuni mwonaji wa mfalme walivyoamuru. Mabawabu walisimama katika kila lango. Hawakulazimika kuacha nafasi zao, kwa sababu Walawi wenzao waliwaandalia Pasaka. 16Basi huduma yote ya BWANA ilikuwa tayari siku ile, kwa ajili ya kufanya Pasaka na kutoa sadaka za kuteketezwa juu ya madhabahu ya BWANA, kwa amri ya mfalme Yosia. 17Waisraeli waliokuwapo walifanya Pasaka wakati ule, na Sikukuu ya Mikate Isiyotiwa Chachu kwa siku saba. 18Hapakuwa na Pasaka iliyofanywa kama hiyo katika Israeli tangu siku za nabii Samweli. Hakuna hata mmoja wa wafalme wa Israeli aliyefanya Pasaka kama ile aliyoifanya Yosia pamoja na makuhani na Walawi, pamoja na Yuda wote na Waisraeli waliokuwapo, na pamoja na watu wa Yerusalemu.

19Pasaka hii ilifanywa katika mwaka wa kumi na nane wa utawala wa Yosia. 20Baada ya hayo yote, Yosia alipokwisha kulipanga hekalu vizuri, Neko mfalme wa Misri alipanda kupigana huko Karkemishi karibu na mto Frati, naye Yosia akatoka kwenda kumkabili. 21Lakini Neko akatuma wajumbe kwake kumwambia, “Nina nini nawe, mfalme wa Yuda? Sikuji kukushambulia wewe leo, bali nyumba ambayo ninapigana nayo vita, naye Mungu ameniambia niharakishe. Kwa faida yako mwenyewe, acha kumpinga Mungu, aliye pamoja nami, ili yeye asikuangamize.” 22Lakini Yosia hakukubali kugeuka mbali naye. Badala yake alijibadilisha ili apigane naye. Hakuyasikiliza maneno ya Neko, yaliyotoka kinywani mwa Mungu, akaenda kupigana katika uwanda wa Megido. 23Wapiga upinde walimpiga mfalme Yosia, naye akawaambia maafisa wake, “Niondoeni, kwa sababu nimejeruhiwa vibaya.” 24Basi maafisa wake walimtoa garini, wakamweka katika gari lake la pili, wakampeleka Yerusalemu. Huko akafa, akazikwa katika makaburi ya babu zake. Yuda wote na Yerusalemu wakamwombolezea Yosia.

25Yeremia aliimba wimbo wa maombolezo kwa ajili ya Yosia, na waimbaji wote wanaume na wanawake humtaja Yosia katika nyimbo zao za maombolezo mpaka leo. Wakazifanya kuwa desturi katika Israeli, nazo zimeandikwa katika kitabu cha Nyimbo za Maombolezo. 26Mambo mengine ya Yosia, na matendo yake ya uaminifu kulingana na yaliyoandikwa katika sheria ya BWANA, 27na matendo yake, tangu mwanzo hadi mwisho, yameandikwa katika Kitabu cha Wafalme wa Israeli na Yuda.