2 Mambo ya Nyakati 12

1Ufalme wa Rehoboamu ulipoimarika na yeye mwenyewe alipokuwa na nguvu, aliiacha sheria ya BWANA, na Israeli wote pamoja naye.

2Katika mwaka wa tano wa mfalme Rehoboamu, kwa sababu walikuwa wamevunja uaminifu wao kwa BWANA, Shishaki mfalme wa Misri alipanda kuushambulia Yerusalemu, 3akiwa na magari ya vita 1,200 na wapanda farasi 60,000, na askari wasiohesabika walikuja pamoja naye kutoka Misri: Walibia, Wasukii na Wakushi. 4Aliiteka miji yenye ngome iliyokuwa ya Yuda, akasonga mbele mpaka Yerusalemu.

5Kisha Shemaya nabii akaja kwa Rehoboamu na maafisa wa Yuda, waliokuwa wamekusanyika Yerusalemu kwa kumwogopa Shishaki, akawaambia, “Hivi ndivyo BWANA asemavyo: Mliniacha, kwa hiyo nimewaacha mkononi mwa Shishaki.” 6Ndipo maafisa wa Israeli na mfalme wakajinyenyekeza, wakasema, “BWANA ni mwenye haki.” 7BWANA alipoona kwamba wamejinyenyekeza, neno la BWANA likamjia Shemaya: “Wamejinyenyekeza, kwa hiyo sitawaangamiza. Nitawapa wokovu kiasi, na hasira yangu haitamwagwa juu ya Yerusalemu kupitia Shishaki. 8Hata hivyo watakuwa watumishi wake, ili wajifunze kunitumikia mimi ni nini, na kuzitumikia falme za nchi nyingine ni nini.”

9Basi Shishaki mfalme wa Misri alipanda kuushambulia Yerusalemu. Alichukua hazina za nyumba ya BWANA na za ikulu ya mfalme. Alichukua kila kitu, hata ngao za dhahabu alizotengeneza Sulemani. 10Mfalme Rehoboamu akatengeneza ngao za shaba badala yake, akawakabidhi wakuu wa walinzi waliolinda lango la ikulu ya mfalme. 11Kila mara mfalme alipoingia nyumbani mwa BWANA, walinzi walikuja wakazibeba ngao hizo, kisha wakazirudisha katika chumba cha walinzi. 12Kwa sababu alijinyenyekeza, hasira ya BWANA iligeuka mbali naye, wala haikumwangamiza kabisa. Tena kulikuwa na mambo mema katika Yuda.

13Mfalme Rehoboamu alijiimarisha huko Yerusalemu, akaendelea kutawala. Rehoboamu alikuwa na umri wa miaka arobaini na mmoja alipoanza kutawala, naye akatawala miaka kumi na saba huko Yerusalemu, mji ambao BWANA aliuchagua kati ya makabila yote ya Israeli kuwa mahali pa jina lake. Mama yake aliitwa Naama Mwamoni. 14Alifanya maovu, kwa sababu hakuwa ameuelekeza moyo wake kumtafuta BWANA.

15Mambo ya Rehoboamu, tangu mwanzo hadi mwisho, yameandikwa katika kumbukumbu za Shemaya nabii na za Ido mwonaji, katika orodha za koo. Kulikuwa na vita kati ya Rehoboamu na Yeroboamu daima. 16Rehoboamu akapumzika pamoja na babu zake, akazikwa katika mji wa Daudi. Na mwanawe Abiya akawa mfalme mahali pake.