2 Mambo ya Nyakati 25

1Amazia alikuwa na umri wa miaka ishirini na mitano alipoanza kutawala, naye akatawala miaka ishirini na tisa huko Yerusalemu. Mama yake aliitwa Yehoadani; alikuwa wa Yerusalemu. 2Alifanya yaliyo sawa machoni pa BWANA, lakini si kwa moyo mkamilifu. 3Mara ufalme ulipokuwa imara chini ya mamlaka yake, aliwaua maafisa wale waliomwua baba yake mfalme. 4Lakini hakuwaua watoto wao. Katika hilo alishika sheria kama ilivyoandikwa katika kitabu cha Musa, ambamo BWANA aliamuru, “Wazazi wasife kwa ajili ya watoto wao, wala watoto wasife kwa ajili ya wazazi wao. Kila mtu atakufa kwa ajili ya dhambi yake mwenyewe tu.”

5Amazia aliwakusanya watu wa Yuda, akawapanga kwa jamaa zao za mababu chini ya wakuu wa maelfu na wakuu wa mamia, kwa ajili ya Yuda wote na Benyamini. Akawahesabu wale wenye umri wa miaka ishirini na zaidi, akapata watu wateule 300,000 wanaofaa kwa vita, wenye uwezo wa kutumia mkuki na ngao kubwa. 6Pia aliajiri mashujaa hodari 100,000 kutoka Israeli kwa karibu kilo 3,400 za fedha. 7Lakini mtu wa Mungu alimjia akasema, “Ee mfalme, jeshi la Israeli lisiende pamoja nawe, kwa maana BWANA hayuko pamoja na Israeli, pamoja na yeyote wa watu wa Efraimu. 8Hata ukienda ukapigana, ukawa hodari vitani, Mungu atakuangusha mbele ya adui, kwa maana Mungu ana uwezo wa kusaidia na wa kuangusha.” 9Amazia akamwuliza mtu wa Mungu, “Lakini je, fedha niliyowalipa askari wa Israeli, ile karibu kilo 3,400?” Mtu wa Mungu akajibu, “BWANA anaweza kukupa zaidi sana kuliko hiyo.” 10Basi Amazia akawaruhusu askari waliojiunga naye kutoka Efraimu, akawarudisha nyumbani. Waliikasirikia Yuda sana, wakarudi nyumbani wakiwaka hasira.

11Kisha Amazia alipiga moyo konde, akawaongoza askari wake. Akaenda Bonde la Chumvi, akawaua watu 10,000 wa Seiri. 12Watu wa Yuda waliteka pia watu 10,000 wakiwa hai. Wakawapandisha juu ya kilele cha mwamba, wakawatupa chini kutoka huko, nao wote wakavunjika vipande vipande.

13Wakati huo askari ambao Amazia alikuwa amewarudisha, asiwaruhusu kwenda pamoja naye vitani, waliivamia miji ya Yuda tangu Samaria mpaka Beth-horoni. Wakaua watu 3,000 na kuchukua nyara nyingi.

14Amazia aliporudi kutoka kuwashinda Waedomu, aliileta miungu ya watu wa Seiri, akaisimamisha kuwa miungu yake mwenyewe. Akaisujudia na kuifukizia uvumba. 15Basi hasira ya BWANA ikawaka juu ya Amazia, akamtuma nabii kwake, aliyesema, “Kwa nini umeitafuta miungu ya watu hawa, miungu isiyoweza kuwaokoa watu wake wenyewe kutoka mkononi mwako?” 16Nabii alipokuwa bado akisema, mfalme akamwambia, “Je, tumekufanya mshauri wa mfalme? Acha! Kwa nini upigwe?” Basi nabii akanyamaza, lakini akaongeza, “Najua kwamba Mungu ameamua kukuangamiza, kwa kuwa umefanya hivi, ukakataa kusikiliza shauri langu.”

17Kisha Amazia mfalme wa Yuda alifanya shauri, akatuma ujumbe kwa Yoashi mwana wa Yehoahazi mwana wa Yehu, mfalme wa Israeli: “Njoo, tukutane uso kwa uso.” 18Yoashi mfalme wa Israeli akamjibu Amazia mfalme wa Yuda: “Mbigili mmoja huko Lebanoni ulituma ujumbe kwa mwerezi huko Lebanoni: ‘Mpe mwanangu binti yako awe mke wake.’ Kisha mnyama wa mwituni wa Lebanoni akapita, akaukanyaga mbigili huo. 19Unajiambia kwamba umewashinda Waedomu, na moyo wako umekufanya ujivune na kutamani utukufu. Sasa kaa nyumbani. Kwa nini kuchochea taabu itakayokuangusha tu, wewe na Yuda pamoja nawe?” 20Lakini Amazia hakutaka kusikiliza, kwa maana jambo hilo lilitoka kwa Mungu, ili awatie mikononi mwa adui yao, kwa sababu walikuwa wameitafuta miungu ya Edomu. 21Basi Yoashi mfalme wa Israeli akapanda dhidi yake, nao wafalme hao wawili, yeye na Amazia mfalme wa Yuda, wakakutana uso kwa uso huko Beth-shemeshi, ulio wa Yuda. 22Yuda walishindwa na Israeli, na kila mtu akakimbilia nyumbani kwake. 23Yoashi mfalme wa Israeli alimkamata Amazia mfalme wa Yuda huko Beth-shemeshi; Amazia alikuwa mwana wa Yoashi mwana wa Yehoahazi. Kisha Yoashi akamleta Yerusalemu, akabomoa ukuta wa Yerusalemu kwa urefu wa karibu mita 180, kutoka Lango la Efraimu mpaka Lango la Pembeni. 24Akachukua dhahabu yote na fedha, na kila chombo kilichoonekana katika nyumba ya Mungu chini ya utunzaji wa Obed-edomu, pamoja na hazina za ikulu. Akachukua pia mateka kama rehani, kisha akarudi Samaria.

25Amazia mwana wa Yoashi mfalme wa Yuda aliishi miaka kumi na mitano baada ya kifo cha Yoashi mwana wa Yehoahazi mfalme wa Israeli. 26Mambo mengine ya Amazia, tangu mwanzo hadi mwisho, yameandikwa katika Kitabu cha Wafalme wa Yuda na Israeli. 27Tangu wakati Amazia alipoacha kumfuata BWANA, watu fulani huko Yerusalemu walifanya njama dhidi yake, naye akakimbilia Lakishi. Lakini wakatuma watu wamfuate huko Lakishi, wakamwua huko. 28Wakauleta mwili wake juu ya farasi, wakamzika pamoja na babu zake katika mji wa Yuda.