2 Mambo ya Nyakati 36

1Kisha watu wa nchi wakamchukua Yehoahazi mwana wa Yosia, wakamtawaza kuwa mfalme huko Yerusalemu mahali pa baba yake. 2Yehoahazi alikuwa na umri wa miaka ishirini na mitatu alipoanza kutawala, naye akatawala miezi mitatu huko Yerusalemu. 3Mfalme wa Misri alimwondoa katika ufalme huko Yerusalemu, akaitoza nchi malipo ya karibu kilo 3,400 za fedha na karibu kilo 34 ya dhahabu. 4Mfalme wa Misri alimtawaza Eliakimu, nduguye Yehoahazi, kuwa mfalme juu ya Yuda na Yerusalemu, akabadilisha jina la Eliakimu kuwa Yehoyakimu. Lakini Neko akamchukua Yehoahazi, nduguye Eliakimu, akampeleka Misri.

5Yehoyakimu alikuwa na umri wa miaka ishirini na mitano alipoanza kutawala, naye akatawala miaka kumi na mmoja huko Yerusalemu. Alifanya maovu machoni pa BWANA Mungu wake. 6Nebukadneza mfalme wa Babeli alipanda kumshambulia, akamfunga kwa minyororo ya shaba ili kumpeleka Babeli. 7Nebukadneza alichukua pia baadhi ya vyombo vya nyumba ya BWANA, akavipeleka Babeli, akaviweka katika hekalu lake huko. 8Mambo mengine ya Yehoyakimu, mambo ya kuchukiza aliyoyafanya na yale yaliyoonekana dhidi yake, yameandikwa katika Kitabu cha Wafalme wa Israeli na Yuda. Na mwanawe Yehoyakini akawa mfalme mahali pake.

9Yehoyakini alikuwa na umri wa miaka minane alipoanza kutawala, naye akatawala miezi mitatu na siku kumi huko Yerusalemu. Alifanya maovu machoni pa BWANA. 10Wakati wa majira ya kuchipua mfalme Nebukadneza alituma watu wamlete Babeli, pamoja na vyombo vya thamani vya nyumba ya BWANA. Akamtawaza Sedekia, jamaa ya Yehoyakini, kuwa mfalme juu ya Yuda na Yerusalemu.

11Sedekia alikuwa na umri wa miaka ishirini na mmoja alipoanza kutawala, naye akatawala miaka kumi na mmoja huko Yerusalemu. 12Alifanya maovu machoni pa BWANA Mungu wake. Hakujinyenyekeza mbele ya nabii Yeremia, aliyesema neno lililotoka kinywani mwa BWANA. 13Pia alimwasi mfalme Nebukadneza, aliyekuwa amemwapisha kwa jina la Mungu. Akaifanya shingo yake kuwa ngumu na moyo wake kuwa mgumu, wala hakukubali kumgeukia BWANA, Mungu wa Israeli. 14Vivyo hivyo viongozi wote wa makuhani na watu walizidi kukosa uaminifu, wakifuata desturi zote za kuchukiza za mataifa, nao wakaitia unajisi nyumba ya BWANA aliyoiweka wakfu huko Yerusalemu. 15BWANA, Mungu wa babu zao, aliwatumia ujumbe kupitia wajumbe wake tena na tena, kwa sababu aliwahurumia watu wake na makao yake. 16Lakini waliwadhihaki wajumbe wa Mungu, wakayadharau maneno yake na kuwacheka manabii wake, mpaka ghadhabu ya BWANA ikapanda juu ya watu wake, wala hapakuwa na kitu cha kuwaponya. 17Kwa hiyo alimleta mfalme wa Wakaldayo dhidi yao, naye mfalme akawaua vijana wao kwa upanga ndani ya patakatifu pao. Hakumhurumia kijana wala msichana, mzee wala aliyedhoofika. Mungu aliwatia wote mkononi mwake. 18Alipeleka Babeli vyombo vyote vya nyumba ya Mungu, vikubwa na vidogo, hazina za nyumba ya BWANA, na hazina za mfalme na za maafisa wake. 19Waliiteketeza nyumba ya Mungu na kuubomoa ukuta wa Yerusalemu. Waliyateketeza kwa moto majumba yake yote ya kifalme, wakaviharibu vitu vyake vyote vya thamani.

20Aliwachukua uhamishoni mpaka Babeli wale walioponyoka upanga, nao wakawa watumishi wake na wa wanawe mpaka ufalme wa Uajemi ulipoanza kutawala, 21ili kutimiza neno la BWANA lililosemwa na Yeremia, mpaka nchi ilipofurahia Sabato zake. Siku zote ilipokuwa ukiwa ilishika Sabato, mpaka miaka sabini ilipotimia.

22Katika mwaka wa kwanza wa Koreshi mfalme wa Uajemi, ili neno la BWANA lililosemwa na Yeremia litimie, BWANA aliiamsha roho ya Koreshi mfalme wa Uajemi, naye akaagiza tangazo litangazwe katika ufalme wake wote na kuandikwa pia:

23“Hivi ndivyo asemavyo Koreshi mfalme wa Uajemi: BWANA, Mungu wa mbinguni, amenipa falme zote za dunia, naye ameniagiza nimjengee nyumba huko Yerusalemu, ulioko Yuda. Yeyote kati yenu aliye wa watu wake, BWANA Mungu wake na awe pamoja naye, naye apande.”