2 Mambo ya Nyakati 6

1Ndipo Sulemani akasema, “BWANA amesema kwamba atakaa katika giza nene. 2Mimi mwenyewe nimekujengea nyumba iliyotukuka, mahali pa wewe kukaa milele.” 3Kisha mfalme akageuka, akalibariki kusanyiko lote la Israeli, nalo kusanyiko lote la Israeli lilikuwa limesimama pale. 4Akasema, “Na abarikiwe BWANA, Mungu wa Israeli, ambaye kwa kinywa chake mwenyewe alimwahidi baba yangu Daudi, na kwa mikono yake mwenyewe sasa ameitimiza ahadi hiyo. Kwa maana alisema, 5‘Tangu siku nilipowatoa watu wangu kutoka nchi ya Misri, sikuchagua mji wowote katika kabila lolote la Israeli ili kujenga humo nyumba ambamo jina langu lingekaa, wala sikumchagua mtu yeyote awe kiongozi juu ya watu wangu Israeli. 6Lakini nimeichagua Yerusalemu kuwa mahali jina langu litakapokaa, nami nimemchagua Daudi atawale watu wangu Israeli.’ 7Baba yangu Daudi alikuwa na nia moyoni mwake ya kujenga nyumba kwa ajili ya jina la BWANA, Mungu wa Israeli. 8Lakini BWANA akamwambia baba yangu Daudi, ‘Ulitaka kujenga nyumba kwa ajili ya jina langu, nawe ulifanya vyema kuwa na nia hiyo moyoni mwako. 9Lakini si wewe utakayeijenga nyumba hiyo. Mwanao, mzao wako mwenyewe, ndiye atakayeijenga nyumba kwa ajili ya jina langu.’ 10Sasa BWANA ameitimiza ahadi aliyoitoa. Nimechukua nafasi ya baba yangu Daudi na kuketi juu ya kiti cha enzi cha Israeli, kama BWANA alivyoahidi, nami nimeijenga nyumba hii kwa ajili ya jina la BWANA, Mungu wa Israeli. 11Huko nimeliweka sanduku lililo na agano la BWANA alilofanya na Waisraeli.” 12Kisha Sulemani akasimama mbele ya madhabahu ya BWANA, mbele ya kusanyiko lote la Israeli, akainyoosha mikono yake. 13Sulemani alikuwa ametengeneza jukwaa la shaba lenye urefu wa karibu mita 2.25, upana wa karibu mita 2.25 na kimo cha karibu mita 1.35, akaliweka katikati ya ua. Akasimama juu yake, kisha akapiga magoti mbele ya kusanyiko lote la Israeli, akainyoosha mikono yake kuelekea mbinguni. 14Akasema, “BWANA, Mungu wa Israeli, hakuna Mungu mbinguni wala duniani aliye kama wewe. Wewe unashika agano lako na kuwaonyesha fadhili watumishi wako wanaoenenda mbele yako kwa moyo wao wote, 15Wewe umemtimizia mtumishi wako, baba yangu Daudi, ahadi uliyompa. Kwa kinywa chako uliahidi, na kwa mkono wako umeitimiza, kama ilivyo leo. 16Sasa, BWANA, Mungu wa Israeli, mtimizie mtumishi wako, baba yangu Daudi, ahadi uliyompa: ‘Hutakosa kamwe mtu wa ukoo wako wa kuketi mbele yangu juu ya kiti cha enzi cha Israeli, ikiwa wazao wako watakuwa waangalifu jinsi wanavyoishi na kuenenda katika sheria yangu kama wewe ulivyoenenda mbele yangu.’ 17Basi sasa, BWANA, Mungu wa Israeli, ahadi uliyompa mtumishi wako Daudi na ithibitike. 18Lakini je, kweli Mungu ataishi duniani pamoja na wanadamu? Mbingu zenyewe, hata mbingu za juu kabisa, haziwezi kukutosha. Sembuse nyumba hii niliyoijenga! 19Lakini sikiliza sala ya mtumishi wako na dua yake ya rehema, BWANA Mungu wangu. Sikia kilio na sala anayoiomba mtumishi wako mbele yako, 20ili mchana na usiku macho yako yawe wazi kuelekea nyumba hii, mahali ulipopasema kwamba utaliweka jina lako. Sikiliza sala ambayo mtumishi wako anaiomba akielekea mahali hapa. 21Sikiliza dua za mtumishi wako na za watu wako Israeli wanapoomba wakielekea mahali hapa. Usikie kutoka mbinguni, makao yako; nawe ukisikia, usamehe. 22Mtu akimkosea jirani yake na kutakiwa kuapa, naye akaja na kuapa kiapo mbele ya madhabahu yako katika nyumba hii, 23basi usikie kutoka mbinguni, ukatende. Uwahukumu watumishi wako: umlipe mwenye hatia kwa kuleta juu ya kichwa chake yale aliyoyatenda, na umtangaze asiye na hatia kuwa yuko sawa kwa kumlipa kwa kadiri ya haki yake.

24Watu wako Israeli wakishindwa na adui kwa sababu wamekutenda dhambi, nao wakakurudia, wakalikiri jina lako, wakaomba na kukusihi mbele yako katika nyumba hii, 25basi usikie kutoka mbinguni, uwasamehe watu wako Israeli dhambi yao, ukawarudishe katika nchi uliyowapa wao na babu zao.

26Anga litakapofungwa na mvua isinyeshe kwa sababu wamekutenda dhambi, nao wakaomba wakielekea mahali hapa, wakalikiri jina lako na kuiacha dhambi yao kwa sababu umewanyenyekeza, 27basi usikie ukiwa mbinguni, uisamehe dhambi ya watumishi wako, watu wako Israeli, unapowafundisha njia njema ya kuienenda. Ukanyeshe mvua juu ya nchi yako, nchi uliyowapa watu wako kuwa urithi wao.

28Kukiwa na njaa katika nchi, au tauni, au ukungu wa mimea au koga, nzige au panzi, au adui zao wakiwazingira katika mji wao wowote, pigo lolote au ugonjwa wowote ukitokea, 29sala yoyote au dua yoyote ya rehema itakayoombwa na mtu yeyote, au na watu wako wote Israeli, kila mmoja akijua mateso yake mwenyewe na uchungu wake, na kuinyoosha mikono yake kuelekea nyumba hii, 30basi usikie kutoka mbinguni, makao yako, usamehe. Umpe kila mmoja kwa kadiri ya njia zake zote, kwa kuwa unaujua kila moyo. Wewe peke yako unaijua mioyo ya wanadamu, 31ili wakuche na kuenenda katika njia zako siku zote watakazoishi katika nchi uliyowapa babu zetu.

32Kuhusu mgeni ambaye si mmoja wa watu wako Israeli lakini anakuja kutoka nchi ya mbali kwa sababu ya jina lako kuu, mkono wako wenye nguvu na mkono wako ulionyoshwa, wanapokuja na kuomba wakielekea nyumba hii, 33basi usikie kutoka mbinguni, makao yako, ukatende yote anayokuomba mgeni huyo. Ndipo mataifa yote ya dunia yatalijua jina lako na kukucha kama watu wako Israeli, nayo yatajua kwamba jina lako limeitwa juu ya nyumba hii niliyoijenga. 34Watu wako watakapotoka kupigana na adui zao, popote utakapowatuma, nao wakakuomba wakielekea mji huu ulioichagua na nyumba niliyoijenga kwa ajili ya jina lako, 35basi usikie kutoka mbinguni sala yao na dua yao, ukawapatie haki yao. 36Watakapokutenda dhambi (na hakuna mtu asiyetenda dhambi kamwe), nawe ukawakasirikia na kuwatia mikononi mwa adui, na watekaji wao wakawachukua mateka mpaka nchi iliyo mbali au karibu, 37nao wakapata akili tena katika nchi walikochukuliwa mateka, wakageuka na kukusihi katika nchi wanamoshikiliwa mateka, wakisema, ‘Tumetenda dhambi; tumekosa na kutenda uovu,’ 38wakikurudia kwa moyo wao wote na kwa roho yao yote katika nchi ya uhamisho wao walikochukuliwa, wakaomba wakielekea nchi yao uliyowapa babu zao, na mji ulioichagua, na nyumba niliyoijenga kwa ajili ya jina lako, 39basi usikie kutoka mbinguni, makao yako, sala yao na dua zao, ukawapatie haki yao, ukawasamehe watu wako waliokutenda dhambi. 40Sasa, Mungu wangu, tafadhali macho yako na yawe wazi, na masikio yako yasikilize kwa makini sala inayoombwa mahali hapa.

41Basi sasa inuka, BWANA Mungu! Uje mahali utakapopumzika, wewe na sanduku la uweza wako. Makuhani wako, BWANA Mungu, na wavae wokovu, na wale walio waaminifu kwako wafurahie mema. 42BWANA Mungu, usiwakatae wafalme uliowatia mafuta. Kumbuka fadhili ulizomwonyesha Daudi mtumishi wako.”